សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង ៖ កម្លាំងអធិការដ្ឋាននគរបាលក្រុងខេមរភូមិន្ទ នៃស្នងការដ្ឋាននគរបាលខេត្តកោះកុង កាលពីវេលាម៉ោង០០និង៤៥នាទីរំលងអធ្រាត្រឈាចូលថ្ងៃទី០៣ ខែវិច្ឆិកា ឆ្នាំ២០២២នេះ បានឃាត់ខ្លួនក្មេងទំនើង៣នាក់ ជិះម៉ូតូមានអាវុធក្នុងដៃ និងលាក់អាវុធនៅតាមខ្លួន ពេលដែលកងកម្លាំងកំពុងចេញល្បាតក្នុងភូមិសាស្ត្រ ស្ថិតនៅចំណុចភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។
បេីយោងតាមប្រភពព័ត៍មានពីរបាយការណ៍របស់អធិការដ្ឋាននគរបាលក្រុងខេមរភូមិន្ទ បានឱ្យដឹងថា ជនសង្ស័យមានឈ្មោះ ១-ណាត់ សុខណា (ហៅក្តាន់) ភេទប្រុស អាយុ២០ឆ្នាំ មុខរបរកម្មករនេសាទ(អ្នកកាន់អាវុធមុខស្រួច) ទីលំនៅភូមិ៣ ឃុំប៉ាក់ខ្លង ស្រុកមណ្ឌលសីមា ។ ២-ឈ្មោះ សួរ គីរីន ភេទប្រុស អាយុ១៦ឆ្នាំ មុខរបរនៅផ្ទះ (មានកាំបិតបុ័ងតោជាប់ខ្លួន) ទីលំនៅភូមិ២ ឃុំប៉ាក់ខ្លងស្រុកមណ្ឌលសីមា និង៣-ឈ្មោះ ពាន សុភ័ក្រ ភេទប្រុស អាយុ១៧ឆ្នាំ មុខរបរកម្មករសំណង់ ទីលំនៅភូមិ២ ឃុំប៉ាក់ខ្លង ស្រុកមណ្ឌលសីមា ។
ប្រភពដដែលបន្តថា មុនពេលឃាត់ខ្លួនក្រុមអ្នកលេងកាំបិតហោះខាងលេីនេះ កម្លាំងជំនាញបានជិះល្បាតក្នុងភូមិសាស្ត្ររបស់ខ្លួន ដេីម្បីទប់ស្កាត់បទល្មើសផ្សេងៗដែលអាចកើតមានឡើងជាយថាហេតុ លុះមកដល់ចំណុចប្រទះឃេីញមានកាន់អាវុធក្នុងដៃ ក៏ចាប់ឃាត់ខ្លួន និងដកហូតវត្ថុតាងរួមមាន ម៉ូតូ ១ គ្រឿង ; កាំបិតបុ័ងតោ១ និងកូនកាំបិតចុងស្រួច០១ដើម។
បច្ចុប្បន្ន កម្លាំងជំនាញបានកសាងសំណុំរឿងចាត់ការតាមនីតិវិធីច្បាប់ ៕
ដោយ៖សហការី
