សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ បេីយោងតាមប្រភពព័ត៌មានពីរបាយការណ៍របស់អគ្គស្នងការដ្ឋាននគរបាលជាតិ នៅព្រឹកថ្ងៃសុក្រទី០៤ ខែវិច្ឆិកា ឆ្នាំ២០២២នេះ បានឱ្យដឹងថា កម្លាំងជំនាញស្រុកបាណន់ បានចុះធ្វើការស៊ើបអង្កេតស្រាវជ្រាវ និងឃាត់ខ្លួនជនសង្ស័យម្នាក់ ពាក់ព័ន្ធរណីលួចម៉ូតូ កាលពីថ្ងៃទី០៣ ខែវិច្ឆិកាម្សិលមិញ នៅចំណុចភូមិអន្លង់ស្វាយ ឃុំតាគ្រាម ស្រុកបាណន់ ខេត្តបាត់ដំបង។
របាយការណ៍ដដែលបន្តថា បន្ទាប់ពីកម្លាំងសមត្ថកិច្ចបានទទួលពាក្យបណ្តឹងជនរងគ្រោះឈ្មោះ សំ ចាន់រ៉ាត់ ភេទប្រុស អាយុ ២៥ឆ្នាំ ទីលំនៅភូមិអន្លង់ស្វាយ ឃុំតាគ្រាម ស្រុកបាណន់ ខេត្តបាត់ដំបង ភ្លាមនោះលោកវរសេនីយ៍ឯក ប៉ាន់ វ៉ាន់នី អធិការនគរបាលស្រុកបាណន់ បានដឹកនាំកម្លាំងអធិការដ្ឋាននគរបាលស្រុកបាណន់ សហការណ៍ជាមួយប៉ុស្តិ៍នគរបាលរដ្ឋបាលតាគ្រាម ចុះស្រាវជ្រាវរហូតឈានដល់ការឃាត់ខ្លួនជនសង្ស័យម្នាក់ ឈ្មោះ ជឿន លាងហ៑រ ភេទប្រុស (ភេទទី៣) អាយុ ២២ឆ្នាំ ទីលំនៅភូមិអន្លង់ស្វាយ ឃុំតាគ្រាម ស្រុកបាណន់ ខេត្តបាត់ដំបង។
យោងតាមការរៀបរាប់របស់ជនរងគ្រោះឈ្មោះ សំ ចាន់រ៉ាត់ បានឱ្យដឹងថា មុនពេលកើតហេតុខ្លួន(ជនរងគ្រោះ) បានខ្ចីម្ចាស់ម៉ូតូរបស់ឈ្មោះ ខន ជ័យជំនះ ភេទប្រុស អាយុ ៣៥ឆ្នាំ រស់នៅភូមិឃុំជាមួយគ្នាឌុបកូនប្រុស អាយុ ៣ឆ្នាំ មក លេងផ្ទះឈ្មោះ ជា នៅផ្សាសំណង់កំពីងពួយ ហើយដាក់ម៉ូតូនៅលើចិញ្ចើមផ្លូវមិនបានដកសោចេញពីម៉ូតូដើរចូលទៅលេងផ្ទះឈ្មោះ ជា ប្រហែលជា២០នាទី ត្រឡប់មកម៉ូតូវិញស្រាប់តែបាត់ម៉ូតូ ក៏បានទូរស័ព្ទប្រាប់ទៅម្ចាស់ម៉ូតូនាំគ្នាជួយរកស្រាប់តែឃើញម៉ូតូរុញចោលក្រោមខ្នងទំនប់កំពីងពួយបានចំងាយប្រហែល ១,០០០ម៉ែត្រ ដោយម៉ូតូអស់សាំង ឯជនសង្ស័យបានរត់គេចខ្លួនចំងាយពីម៉ូតូប្រហែល ១០០ម៉ែត្រ ត្រូវបានកម្លាំងប៉ុស្តិ៍សហការជាមួយកម្លាំងប្រជាការពារ ឃាត់ខ្លួនយកមកប៉ុស្តិនគរបាលរដ្ឋបាលតាគ្រាមដើម្បីសាកសួរបឋម។
ក្រោយឃាត់ខ្លួនជនសង្ស័យឈ្មោះ ជឿន លាងហ៑រ យកមកសាកសួរនៅអធិការដ្ឋាននគរបាលស្រុកបាណន់ រូបគេបានសារភាពថា បានលួចម៉ូតូរបស់ជនរងគ្រោះឈ្មោះ សំ ចាន់រ៉ាត់ ពិតប្រាកដមែន។ សម្ភារៈដកហូតបានរួមមាន៖ ម៉ូតូ០១គ្រឿង ម៉ូតូម៉ាក វេវអាល់ហ្វា ពណ៌ខ្មៅលាយទឹកប្រាក់ C100 ស៊េរីឆ្នាំ ២០១៧ ពាក់ស្លាកលេខ 1N-9240 បាត់ដំបង។
បច្ចុប្បន្នជនសង័្សយត្រូវបានកម្លាំងនគរបាលស្រុករៀបចំកសាងសំណុំរឿង បញ្ជូនមកការិយាល័យជំនាញខេត្ត ដើម្បីចាត់ការបន្តនីតិវិធី-ច្បាប់៕
ដោយ៖សហការី
