សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី ៤ខែវិច្ឆិកា ការិយាល័យអភិបាលរដ្ឋ Gujarat ស្ថិតនៅភាគខាងលិចប្រទេសឥណ្ឌា បានឲ្យដឹងថា អភិបាលរដ្ឋបានសម្រេចព្យួរតំណែង អភិបាលក្រុង Borbi លោក Sandeepsinh Zala ក្រោយករណីបាក់ស្ពានសម្លាប់មនុស្ស ១៣៥នាក់។
សារព័ត៌មាន AFP នៅថ្ងៃសុក្រ ទី៤ ខែវិច្ឆិកា ឆ្នាំ២០២២ បានផ្សាយថា ជំនួយការរបស់អភិបាលរដ្ឋហ្គូចារ៉ាត់ លោក Pankaj Joshi បានប្រាប់ក្រុមអ្នកសារព័ត៌មានឲ្យដឹងថា «រដ្ឋបាលនៃរដ្ឋហ្គូចារ៉ាត់ បានព្យួរការងាររបស់ លោក Sandeepsinh Zala ដែលជាអភិបាលសាលាក្រុងម័រប៊ី ដោយសារតែករណីបាក់ស្ពានកន្លងមក»។
រហូតមកដល់ពេលឥឡូវ ប៉ូលិសបានចាប់ខ្លួនមនុស្សចំនួន៩នាក់ ដែលពាក់ព័ន្ធនឹងឧប្បត្តិហេតុនេះ ដោយចោទប្រកាន់ពីបទមនុស្សឃាត។ អ្នកដែលត្រូវបានចាប់ខ្លួននោះ រួមមានអ្នកលក់សំបុត្រ សន្តិសុខ៣នាក់ ដែលកំពុងបំពេញភារកិច្ចនៅពេលបាក់ស្ពាន និងអ្នកម៉ៅការដែលទទួលបន្ទុកជួសជុលស្ពាន។
ស្ពានសម័យអាណានិគមនោះ ដែលស្ថិតនៅទីក្រុងម័រប៊ី និងលាតសន្ធឹងឆ្លងកាត់ទន្លេម៉ាចឈូ (Machchhu) ពោរពេញទៅដោយអ្នកទស្សនារាប់រយនាក់ ដែលទៅចូលរួមពិធីបុណ្យឌីវ៉ាលី (Diwali) និងពិធីបុណ្យ ឆាត ពូចា (Chhath Puja) របស់ប្រទេសឥណ្ឌា មុនពេលវាដាច់ ហើយមនុស្សម្នាធ្លាក់ចូលទៅក្នុងទឹកជម្រៅប្រហែល១០ម៉ែត្រ ៕ ដោយ៖ ធីរីណា
រូបថត ៖ TTXVN-VNA
