សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសជាជនសង្ស័យម្នាក់ត្រូវបានម្ចាស់រថយន្តឃាត់ខ្លួនបញ្ជូនទៅឱ្យសមត្ថកិច្ចប៉ុស្តិ៍នគរបាលរដ្ឋបាលស្វាយយា ស្រុកស្វាយជ្រំ រួមទាំងម៉ូតូបន្ទាប់ពីជនសង្ស័យរូបនេះធ្វើសកម្មភាពលួចអាគុយរថយន្តមិនបានសម្រេច។
ហេតុការណ៍នេះបានកើតឡើងកាលពីវេលាម៉ោង១០និង១១នាទីយប់ថ្ងៃទី៦ខែវិច្ឆិកាឆ្នាំ២០២២នៅចំណុចភូមិដំណាក់កន្ទួត ឃុំស្វាយយា ស្រុកស្វាយជ្រំខេត្តស្វាយរៀង។
យោងតាមសមត្ថកិច្ចនគរបាលបានឱ្យដឹងថា ជនសង្ស័យមានឈ្មោះឃឹម សឿងភេទប្រុស អាយុ៣៨ឆ្នាំ មុខរបរមិនពិតប្រាកដ ជនជាតិខ្មែរ មានទីលំនៅភូមិពន្លៃ ឃុំអង្គសរ ស្រុកមេសាងខេត្តព្រៃវែង។
ចំណែកម្ចាស់រថយន្តមានឈ្មោះនាង សុត ភេទប្រុស អាយុ៤៨ឆ្នាំ ជនជាតិខ្មែរ មុខរបរលក់គ្រឿងសំណង់ មានទីលំនៅភូមិដំណាក់កន្ទួត ឃុំស្វាយយា ស្រុកស្វាយជ្រំ។
តាមម្ចាស់ផ្ទះបានឱ្យដឹងថា មុនកើតហេតុខ្លួននិងក្រុមគ្រួសារបន្ទាប់ពីហូបបាយជុំគ្នារួច ក៏នាំគ្នាចូលសម្រាន្តរហូតដល់ម៉ោង១០និង១១នាទីយប់ស្រាប់តែឮសូរសំឡេងខុសធម្មតានៅមុខរថយន្តក៏ស្ទុះអើតមើលក៏ឃើញជនសង្ស័យកំពុងធ្វើសកម្មភាពដោះយកអាគុយរថយន្តទើបមានការភ្ញាក់ផ្អើលនាំគ្នាចាប់បានជនសង្ស័យម្នាក់និងម៉ូតូប្រគល់ឱ្យសមត្ថកិច្ចតែម្ដង។
បច្ចុប្បន្នជនសង្ស័យនិងម៉ូតូត្រូវបានសមត្ថកិច្ចឃាត់ទុកនៅអធិការដ្ឋាននគរបាលស្រុកស្វាយជ្រំដើម្បីចាត់ការបន្តតាមច្បាប់៕
ដោយ៖ សុថាន
