សារព័ត៌មាន នគរវត្ត តែងតែនាំមុខគេជានិច្ច
ក្រុមខ្លាំងៗនៅអង់គ្លេសចំនួន៣បានធ្លាក់ចេញពីការប្រជែងយកពានរង្វាន់អង់គ្លេស League Cup ត្រឹមជុំទី៣។ ក្រុមទាំងនោះមាន កាំភ្លើងធំ Arsenal, ក្រុមតោខៀវ Chelsea និងក្រុមមាន់ខ្នាយមាស Tottenhamក្នុងការប្រកួតកាលពីរាត្រីថ្ងៃទី៩ឈានចូលថ្ងៃទី១០ ខែវិច្ឆិកានេះ។
ក្រុមតោខៀវ Chelsea បានបរាជ័យក្រោមថ្វីជើងក្រុមម្ចាស់ផ្ទះមេឃខៀវ Manchester City ក្នុងលទ្ធផល២ទល់០។ ២គ្រាប់ជ័យជម្នះសម្រាប់ក្រុម Man City រកបានដោយកីឡាករ Riyad Mahrez និង Julian Alvarez បានផ្តួលគូប្រជែង Chelsea ក្នុងក្របខ័ណ្ឌ Premier League ជាមួយគ្នាដើម្បីឈានដល់ជុំទី៤ ។
នេះគឺជាជ័យជម្នះរបស់ Manchester City ដែលជាក្រុមធ្លាប់គ្រងជើងឯក៨សម័យកាលបានរក្សាកំណត់ត្រាមិនដែលចាញ់ក្នុងជុំទី៣ក្រោមការដឹកនាំរបស់លោក Pep Guardiola។ ទន្ទឹមនឹងនេះដែរលទ្ធផលសម្រាប់ Chelsea មានន័យថា ពួកគេបានឈ្នះតែ២ប្រកួតប៉ុណ្ណោះក្នុងចំណោមការប្រកួត៧លើកចុងក្រោយរបស់ពួកគេនៅក្នុងការប្រកួតទាំងអស់ ហើយវាមិនងាយស្រួលសម្រាប់ក្រុមរបស់លោក Graham Potter ខណៈដែលពួកគេធ្វើដំណើរទៅជួបក្រុមចំណាត់ថ្នាក់លេខ៣Newcastle ។
ចំណែកក្រុមកំពូលតារាង Premier League កាំភ្លើងធំ Arsenal ត្រូវបានធ្លាក់ចេញពីពានរង្វាន់ League Cup ដោយបានបរាជ័យក្រោមថ្វីជើងក្រុមភ្ញៀវ Brighton ក្នុងលទ្ធផលដ៏គួរឱ្យភ្ញាក់ផ្អើល៣ទល់១។
កីឡាករ Eddie Nketiah បានជួយឱ្យក្រុម Arsenal នាំមុខមុននៅនាទីទី២០ ពីការបញ្ជូនបាល់របស់ Reiss Nelson ប៉ុន្តែ Danny Welbeck ដែលធ្លាប់លេងឱ្យក្រុមកាំភ្លើងធំបានតាមស្មើវិញជាមួយនឹងការពិន័យប៉េណាល់ទីនៅនាទីទី២៧។
បន្ទាប់មកកីឡាករ Kaoru Mitoma បានជួយឲ្យក្រុម Brighton នាំមុខវិញនៅតង់ទី២នាទីទី៥៨ ហើយកីឡាករ Tariq Lamptey បានបន្ថែម១គ្រាប់ទៀតដែលជាគ្រាប់ទី៣ជួយឲ្យក្រុមភ្ញៀវ Brighton យកឈ្នះក្រុមម្ចាស់ផ្ទះមិនគួរឲ្យជឿក្នុងលទ្ធផល៣ទល់១។
ការចាញ់ក្នុងការប្រកួតជុំទី៣ គឺជាលើកទី៣ហើយក្នុងចំណោម២០ប្រកួតក្នុងការប្រកួតទាំងអស់ដែល Arsenal ត្រូវបានផ្តួលក្នុងរដូវកាលនេះ។
ដោយឡែកក្រុមមាន់ខ្នាយមាស Tottenham Hotspur ត្រូវបានទម្លាក់ចេញពីពានរង្វាន់ខាងលើនេះម្តងទៀត ក្រោមថ្វីជើងក្រុមឈរនៅបាតតារាង Nottingham Forest។ ក្រុម Nottingham Forest ជាក្រុមល្អជាង ហើយបាននាំមុខនៅនាទី៥០ តាមរយៈការស៊ុតបាល់យ៉ាងល្អពី Renan Lodi។
នៅតង់ទី២ដដែលនោះដែរកីឡាករ Jesse Lingard បានធ្វើរឿងដ៏គួរឱ្យចាប់អារម្មណ៍ដោយវាយបកយ៉ាងរហ័សដើម្បីនាំមុខ១គ្រាប់ទៀតនៅនាទីទី៥៧។
បរាជ័យរបស់ក្រុមធំៗទាំង៣ខាងលើនេះ គឺបានខកខានឱកាសក្នុងការប្រជែងពានរង្វាន់១ក្នុងចំណោមពានរង្វាន់៣នៅរដូវកាលនេះ ដោយមានក្រុមខ្លាំង២ដែលលេចធ្លោគឺ Manchester City និង Liverpool បានឆ្លងផុតទៅកាន់ជុំទី៤បន្តទៀត។ ចំណែកមួយគូទៀតគឺក្រុមបិសាចក្រហម Manchester United នឹងត្រូវបើកទ្វារស្វាគមន៍ក្រុមភ្ញៀវ Aston Villa នៅរាត្រីនេះ ដើម្បីស្វែងរក១ក្រុមឡើងទៅកាន់ជុំទី៤បន្តទៀត ៕
ដោយ៖ ភារៈ(រូបភាព ៖ BBC Sport/Reuters)
