សារព័ត៌មាន នគរវត្ត តែងតែនាំមុខគេជានិច្ច
ព្រឹត្តិការណ៍កីឡាបាល់ទាត់ពិភពលោកដែលធ្វើឡើងរៀងរាល់៤ឆ្នាំម្តងនឹងចាប់ផ្តើមនៅប៉ុន្មានថ្ងៃខាងមុខនេះហើយ។ នេះជាអ្វីដែលមិត្តអ្នកអាន និងអ្នកចូលចិត្តវិស័យកីឡាបាល់ទាត់ត្រូវដឹងអំពី FIFA World Cup 2022 ដែលនឹងប្រារព្ធឡើងនៅប្រទេសកាតា៖
*ការប្រកួតបាល់ទាត់ពិភពលោកឆ្នាំនេះនៅប្រទេសកាតានឹងធ្វើឡើងចាប់ពីថ្ងៃទី២០ ខែវិច្ឆិកា ដល់ថ្ងៃទី១៨ ខែធ្នូ ឆ្នាំ២០២២។
*ការប្រកួតនឹងចាប់ផ្តើមជាមួយនឹងការប្រកួតក្នុងពូល A រវាងម្ចាស់ផ្ទះកាតាប៉ះអេក្វាឌ័រ នៅថ្ងៃទី២០ ខែវិច្ឆិកា។
*ការប្រកួតបាល់ទាត់ពិភពលោកនឹងចាប់ផ្តើមមួយថ្ងៃលឿនជាងការគ្រោងទុកជាលើកដំបូង ដើម្បីធានាថាម្ចាស់ផ្ទះកាតានឹងប្រកួតបើកឆាក។
*ការប្រកួត World Cup នឹងមានក្រុមចំនួន៣២ ហើយនឹងចាប់ផ្តើមជាមួយនឹងការប្រកួតវគ្គចែកពូល (Group) ដោយចែកចេញជា៨ពួលក្នុង១ពូលមាន៤ក្រុម៖
ពូល A: កាតា (ម្ចាស់ផ្ទះ), អេក្វាឌ័រ, សេនេហ្គាល់, ហុល្លង់
ពូល B: អង់គ្លេស, អ៊ីរ៉ង់, អាមេរិក, វែល
ពូល C: អាហ្សង់ទីន, អារ៉ាប៊ីសាអ៊ូឌីត, ម៉ិកស៊ិក, ប៉ូឡូញ
ពូល D: បារាំង, អូស្ត្រាលី, ដាណឺម៉ាក, ទុយនេស៊ី
ពូល E: អេស្ប៉ាញ, កូស្តារីកា, អាល្លឺម៉ង់, ជប៉ុន
ពូល F: បែលហ្ស៊ិក, កាណាដា, ម៉ារ៉ុក, ក្រូអាត
ពូល G: ប្រេស៊ីល, ស៊ែប៊ី, ស្វ៊ីស, កាមេរូន
ពូល H: ព័រទុយហ្គាល់, ហ្គាណា, អ៊ុយរ៉ាហ្គាយ, កូរ៉េខាងត្បូង
*ការប្រកួតនឹងធ្វើឡើងនៅកីឡដ្ឋានចំនួន៨ក្នុងប្រទេសកាតារួមមាន កីឡដ្ឋាន Al Bayt, កីឡដ្ឋាន Khalifa International Stadium, កីឡដ្ឋាន Al Thumama, កីឡដ្ឋាន Ahmad bin Ali, កីឡដ្ឋាន Lusail Iconic, កីឡដ្ឋាន 974, កីឡដ្ឋាន Education City និងកីឡដ្ឋាន Al Janoub ។
*ជាមួយនឹងកៅអីចំនួន ៨០,០០០ កីឡដ្ឋាន Lusail Iconic គឺជាកីឡដ្ឋានដ៏ធំបំផុតក្នុងចំណោមកីឡដ្ឋានបាល់ទាត់ពិភពលោកចំនួន៨របស់ប្រទេសកាតា។
*កីឡដ្ឋានទាំងអស់ស្ថិតនៅចម្ងាយ៤០គីឡូម៉ែត្រពីកណ្តាលទីក្រុងដូហា។
*វានឹងមានទម្រង់ប្រកួតជុំវិលជុំក្នុងវគ្គចែកពូល នៅពេលដែលក្រុមនីមួយៗនៃក្រុមទាំង៣២លេង៣ប្រកួតក្នុងពូលនីមួយៗ។ ក្រុមដែលនឹងទទួលបាន៣ពិន្ទុសម្រាប់ការឈ្នះ និង១ពិន្ទុសម្រាប់ការស្មើ។ ការប្រកួតវគ្គចែកពូលចុងក្រោយនឹងត្រូវលេងនៅថ្ងៃទី២ ខែធ្នូ។
*ក្រុមឈរកំពូលតារាងចំនួន២ក្នុងពូលនីមួយៗ (លេខ១និងលេខ២ក្នុងពូល) នឹងឈានទៅវគ្គ១៦ក្រុមចុងក្រោយ។
វគ្គជម្រុះ១៦ក្រុមចុងក្រោយនឹងចាប់ផ្តើមនៅថ្ងៃទី៣ ខែធ្នូ។ បើសិនជាមានការប្រកួតស្មើនឹងអាចបន្តដល់ម៉ោងបន្ថែម ហើយអាចបន្តមកសម្រេចសេចក្តីប៉េណាល់ទីដើម្បីរកក្រុមដែលឈ្នះ។
*វគ្គផ្តាច់ព្រ័ត្រនឹងប្រព្រឹត្តទៅនៅថ្ងៃអាទិត្យ ទី១៨ ខែធ្នូ នៅកីឡដ្ឋាន LusailIconic ៕
ដោយ៖ ភារៈ(រូបភាព ៖ Reuters/CNA)
