សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តសណ្ដោងកុងតឺន័រមួយគ្រឿងបេីកបរក្នុងល្បឿនលឿនខ្វះការប្រុងប្រយ័ត្ន បានរេចង្កួតបុកឡំប្រឺតាចំពីមុខពេញទំហឹងបណ្ដាលឲ្យខូចខាតយ៉ាងដំណំ ហេីយបន្តទៅបុកបង្គោលភ្លេីងបាក់ទ្រេត១ដេីមថែមទៀត បណ្តាលឲ្យរថយន្តក្រឡាប់ផ្ងេីរជេីងឡេីងលេី និងរបួសធ្ងន់ម្នាក់ បង្កការភ្ញាក់ផ្អេីលកាលពីវេលាម៉ោង៨ និង២០ នាទីយប់ថ្ងៃទី១៧ ខែវិច្ឆិកា ឆ្នាំ២០២២ នៅតាមបណ្តោយផ្លូវជាតិលេខ១ ចំណុចខាងមុខវត្តចម្ប៉ា ភូមិជ្រោយអំពិល១ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុគេបានឃេីញបុរសម្នាក់បេីកបររថយន្តសណ្ដោងកុងតឺន័រ មួយគ្រឿង ពាក់ស្លាកលេខភ្នំពេញ 4A-0492 បានធ្វេីដំណេីរតាមបណ្តោយផ្លូវជាតិលេខ១ ទិសដៅពីលិចទៅកេីត ក្នុងល្បឿនយ៉ាងលឿន លុះមកដល់ចំណុចកេីតហេតុខាងលេី បានវ៉ាជែងមិនប្រយ័ត្នក៏រេចង្កូតទៅខាងឆ្វេងដៃបុកចំពីចំហៀងឡំប្រឺតា ពណ៌ស មួយគ្រឿង ពាក់ស្លាកលេខភ្នំពេញ1HW-2928 បេីកបរដោយបុរសម្នាក់ ធ្វេីដំណេីរតាមបណ្តោយផ្លូវជាតិលេខ១ ទិសដៅពីកេីតទៅលិច បណ្តាលឱ្យរងការខូចខាតស្ទេីរតែទាំងស្រុង និងធ្វេីឲ្យបុរសម្នាក់ជាអ្នកបេីកឡំប្រឺតារងរបួសធ្ងន់ ត្រូវបានរថយន្តសាមុយដឹងបញ្ជូនយកទៅសង្គ្រោះអាយុជីវិត ។
ដោយឡែករថយន្តបង្កនៅមិនទាន់អស់ល្បឿន ក៏បន្តជ្រុលទៅបុកបង្គោលភ្លេីងបាក់ទ្រេតអស់ចំនួន១ដេីមបន្ថែមទៀត និងបណ្តាលឱ្យរថយន្តបង្កក្រឡាប់ផ្ងេីរជេីងរងការខូចខាតទាំងស្រុង តែតៃកុងរងរបួសស្រាល និងបានចុះចេញពីលេីរថយន្តគេចខ្លួនបាត់ស្រមោល ។
ក្រោយកេីតហេតុ សមត្ថកិច្ចមូលដ្ឋាន សហការជាមួយមន្ត្រីជំនាញចរាចរណ៍ធ្វេីការវាស់វែង និងស្ទួចយករថយន្តបង្កនិងឡំប្រឺតា ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដេីម្បីរង់ចាំដោះស្រាយគ្នានៅពេលក្រោយ ៕
ដោយ ៖ ភារ៉ា ដង្កោ
