សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ បុរសម្នាក់បានរងរបួសជើងធ្ងន់ធ្ងរក្រោយជួបគ្រោះថ្នាក់ចរាចរណ៍បង្កឡើងដោយរថយន្តGS. 300 មួយគ្រឿងបើកគេចជង្ហុកហើយជ្រុលទៅបុកម៉ូតូរបស់គាត់ពេញទំហឹង។
គ្រោះថ្នាក់ចរាចរណ៍នេះបានកើតឡើងនៅវេលាម៉ោង ២៣និង០០នាទី ថ្ងៃទី១៧ ខែវិច្ឆិកា ឆ្នាំ២០២២ នៅត្រង់ចំណុចភូមិរំចេក៤ សង្កាត់រតនៈ ក្រុងបាត់ដំបង។
ប្រភពបានឱ្យដឹងថា នៅមុនពេលកើតហេតុគេឃើញម៉ូតូម៉ាកឃ្លីច(click)ពណ៌ស មួយគ្រឿង ពាក់ស្លាកលេខ បាត់ដំបង 1AE-1465បើកបរដោយបុរសម្នាក់ក្នុងទិសដៅពីលិចទៅកើត លុះមកដល់ចំណុចកើតហេតុខាងលើភ្លាមនោះក៏ស្រាប់តែមានរថយន្តGS. 300 ពណ៌ទឹកប្រាក់មួយគ្រឿង ពាក់ស្លាកលេខ ភ្នំពេញ2BB-2577 បើកបរដោយបុរសម្នាក់ក្នុងទិសដៅពីកើត ទៅលិចនិងបានបួងចង្កូតគេចផ្លូវជង្ហុកសំបុកមាន់ ក៏ជ្រុលទៅបុកម៉ូតូពេញទំហឹងបណ្តាលឱ្យអ្នកបើកបរម៉ូតូដួលបោករងរបួសជើងធ្ងន់ធ្ងរ ចំណែកម៉ូតូនិងរថយន្តខូចខាតផងដែរ។
ក្រោយពេលកើតហេតុសមត្ថកិច្ចជំនាញបានចុះទៅវាស់វែងធ្វើកំណត់ហេតុយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោកខេត្តរង់ចាំដោះស្រាយតាមផ្លូវច្បាប់ ចំណែកជនរងគ្រោះត្រូវបានបញ្ជូនទៅសម្រាកព្យាបាលនៅឯមន្ទីរពេទ្យស្នងការខេត្តផងដែរ៕
ដោយ៖ចន្ទ លីហ្សា
