សារព័ត៌មាន នគរវត្ត តែងតែនាំមុខគេជានិច្ច
ខេត្តមណ្ឌលគិរី ៖ នេះបេីយោងតាមប្រភពព័ត៌មានពីរបាយការណ៍របស់អគ្គស្នងការដ្ឋាននគរបាលជាតិ នៅរសៀលថ្ងៃសុក្រទី១៨ ខែវិច្ឆិកា ឆ្នាំ២០២២នេះ បានឱ្យដឹងថា ដោយមានបទបញ្ជាយ៉ាងម៉ឺងមាត់ពីលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ក្នុងការទប់ស្កាត់និងបង្ក្រាបនូវរាល់បទល្មើសគ្រឿងញៀនក្នុងទូទាំងខេត្ត កម្លាំងសមត្ថកិច្ចការិយាល័យប្រឆាំងគ្រឿងញៀន បានសហការជាមួយកម្លាំងផ្នែកជំនាញប្រឆាំងគ្រឿងញៀននៃអធិការដ្ឋាននគរបាលស្រុកពេជ្រាដា និងកម្លាំងប៉ុស្ដិ៍ពូជ្រៃ ចុះបង្ក្រាបករណីជូញដូររក្សាទុកនិងសម្រួលឱ្យប្រើប្រាស់នូវសារធាតុញៀនដោយខុសច្បាប់ដឹកនាំដោយលោកឧត្តមសេនីយ៍ត្រី ស៊ុម សោភ័ណ្ឌ ស្នងការរងទទួលបន្ទុកផែនប្រឆាំងគ្រឿងញៀន និងមានកាសម្របសម្រួល ពីលោក ស៊ាវ ងីឈាន់ ព្រះរាជអាជ្ញារងអមសាលាដំបូងខេត្តមណ្ឌលគិរី ។
ប្រតិបត្តិការខាងលើនេះ កម្លាំងជំនាញបានធ្វេីឡេីងកាលពីរសៀលថ្ងៃទី១៦ ខែវិច្ឆិកា ឆ្នាំ២០២២ វេលាម៉ោង១៦និង១០នាទី ស្ថិតនៅត្រង់ចំណុច (អូរទេ)ខាងក្រោយចម្ការកៅស៊ូរបស់ក្រុមហ៊ុនឌីធីស៊ីស្ថិតនៅក្នុងភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី ឃាត់ខ្លួនជនសង្ស័យ បានចំនួន ០៩នាក់(មានផ្ទុកសារធាតុញៀនទាំង៩នាក់) ។
វត្ថុតាងនិងសម្ភារៈដែលកម្លាំងសមត្ថកិច្ចចាប់យករួមមានដូចខាងក្រោម៖ ១-ម្សៅក្រាមពណ៌សថ្លាសង្ស័ថាជាសារធាតុ ញៀនចំនួន០៨កញ្ជប់ ៧កញ្ចប់តូចនិង០១កញ្ជប់, ២-អាវុធកែច្នៃប្រើហ្គាសបាញ់គ្រាប់ឃ្លីដែកចំនួន០១ដើម, ៣-គ្រាប់ឃ្លី ដែកចំនួន១៤គ្រាប់, ៤-ទូរស្ទព័ដៃចំនួន៦គ្រឿង, ៥-ម៉ូតូចំនួន៥គ្រឿង ម៉ាក់ឆ្លាមចំនួន០៤គ្រឿង ម៉ាក់Honda Dream ០១២ចំនួន០១គ្រឿង,៦-កន្ត្រៃចំនួន ០១, ៧-សម្ភារ:កែច្នៃសម្រាប់ជក់មួយចំនួន ។ លោកគ្រូពេទ្យបានយកសំណាកពីជនសង្ស័យទៅពិនិត្យរកមេរោគកូវីដ១៩ ជាលទ្ធផល អវិជមាន ទាំង៩នាក់ ។
បច្ចុប្បន្ន ជនសង្ស័យទាំង០៩នាក់ខាងលើ នៅថ្ងៃសុក្រទី១៨ ខែវិច្ឆិកានេះ ត្រូវបានកម្លាំងសមត្ថកិច្ចការិយាល័យប្រឆាំងគ្រឿងញៀន កសាងសំណុំរឿងបញ្ជូនខ្លួនទៅតុលាការចាត់ការទៅតាមនីតិវិធី៕
ដោយ៖សហការី
