សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ យោងតាមរបាយការណ៍របស់អគ្គស្នងការដ្ឋាននគរបាលជាតិ នៅព្រឹកថ្ងៃសៅរ៍ទី១៩ ខែវិច្ឆិកា ឆ្នាំ២០២២នេះ បានឱ្យដឹងថា យ៉ាងហោចណាស់មនុស្សចំនួន៣នាក់បានស្លាប់ និងម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍រវាងរថយន្ត និងម៉ូតូ នៅលើកំណាត់ផ្លូវជាតិលេខ៦ ចន្លោះគីឡូម៉ែត្រលេខ១៥៤-១៥៥ ស្ថិតក្នុងភូមិពោធិ៍ខាវ ឃុំត្បូងក្រពើ ស្រុកសន្ទុក ខេត្តកំពង់ធំ កាលពីវេលាម៉ោង ៧និង៣០នាទីយប់ថ្ងៃទី១៨ ខែវិច្ឆិកា ឆ្នាំ២០២២ ។
ប្រភពព័ត៌មានពីសមត្ថកិច្ចជំនាញចរាចរណ៍ស្រុក បានបញ្ជាក់ថា ភាគីម៉ូតូម៉ាកសង់កូរ៉េ ពណ៌ក្រហម គ្មានស្លាកលេខ បើកបរដោយឈ្មោះ នី ជី ភេទប្រុស អាយុ២០ឆ្នាំ និងអ្នករួមដំណើរចំនួន៣នាក់ទៀត រួមមាន ៖ ១-ឈ្មោះ នី ចាន់ថន ភេទស្រី អាយុ២៧ឆ្នាំ ទី២-ឈ្មោះនិន ណារ៉ុង ភេទប្រុស អាយុ៥ឆ្នាំ (អ្នកទាំង៣ស្លាប់នៅកន្លែង) និងម្នាក់ទៀតរងរបួសធ្ងន់ ឈ្មោះ រ៉ុន ស្មី ភេទប្រុស អាយុ៧ខែ ជនរងគ្រោះមានទីលំនៅភូមិថ្មី ឃុំទីពោ ស្រុកសន្ទុក ។
ចំណែកភាគីរថយន្តម៉ាកឡិចស៊ីស GS 300 ពណ៌ស ពាក់លេខ កម្ពុជា UNTH 9617 ធ្វើដំណើរក្នុងទិសដៅពីលិចទៅកើត បើកបរដោយឈ្មោះ រ័ត្ន ស្រីនាង ភេទស្រី អាយុ២៤ឆ្នាំ មានទីលំនៅភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។ ក្រោយកើតហេតុត្រូវបានសមត្ថកិច្ចឃាត់ខ្លួននាំទៅអធិការដ្ឋាននគរបាលស្រុកសន្ទុកដើម្បីសាកសួរបំពេញនីតិវិធី។
សមត្ថកិច្ចបញ្ចាក់ថា មូលហេតុជាបឋមនៃគ្រោះថ្នាក់ខាងលើ បង្កទ្បើងដោយអ្នកបើកបរម៉ូតូ ឆ្លងកាត់ខ្វះការប្រុងប្រយ័ត្ន ខណៈភាគីរថយន្តកំពុងបើកបរក្នុងល្បឿនលឿន ។
ករណីនេះ កម្លាំងសមត្ថកិច្ចជំនាញផ្នែកចរាចរណ៍បាននាំយកមធ្យោបាយទាំង២គ្រឿងទៅរក្សាទុកនៅអធិការដ្ឋាននគរបាលស្រុកសន្ទុក ដើម្បីដោះស្រាយតាមនីតិវិធី ៕
ដោយ៖សហការី
