រថយន្តពីរគ្រឿងបុកគ្នាក្រឡាប់ផ្ងារជើងទ្រមេឃម្ចាស់រថយន្តស្គាល់គ្នាក៏សម្រួលបញ្ចប់រឿង

ភ្នំពេញ ៖ រថយន្តតូយូ៉តាព្រូសមួយគ្រឿងបើកបរយ៉ាងលឿនដល់ផ្លូវបំបែកជាបួនមិនប្រយ័ត្នបានជ្រុលទៅបុករថយន្តLexus RX300 ចំពីក្រោយពេញទំហឹង ប៉ើងក្រឡាប់ផ្ងារជើង តែ សំណាងល្អដែរដែលនៅក្នុងហេតុការណ៍នេះមិនបណ្តាលឱ្យមានអ្នករងរបួស។

   ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ១១និង៣០នាទីយប់ថ្ងៃទី១៨ ខែវិច្ឆិកា ឆ្នាំ២០២២ ស្ថិតនៅតាមបណ្តោយផ្លូវ R6 កែងនឹងផ្លូវលេខ៦១៦ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

   ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តម៉ាកLexus RX300 ពណ៌ទឹកប្រាក់ពាក់ស្លាកលេខ ភ្នំពេញ 2AA-0259 បើកបរតាមបណ្តោយផ្លូវលេខ៦១៦ក្នុងទិសដៅពីលិចទៅកើត ខណៈមកដល់ចំណុចកើតហេតុដែលជាផ្លូវបែកជាបួនក៏ស្រាប់តែមានរថយន្តម៉ាកតូយ៉ូតាព្រូស ពណ៌ស ពាក់ស្លាកលេខ ភ្នំពេញ 2BD-6153 បើកបរតាមបណ្តោយផ្លូវR6 ក្នុងទិសដៅពីជើងទៅត្បូងយ៉ាងលឿនបានជ្រុលទៅបុករថយន្តLexus RX300 ដែលបើកឆ្លងផ្លូវចំផ្នែកខាងក្រោយចំហៀងខាងឆ្វេងពេញទំហឹង បណ្តាលឱ្យរថយន្តLexus  RX300 ក្រឡាប់ផ្ងារជើង ចំណែករថយន្តបង្កខូចខាតផ្នែកខាងមុខ តែសំណាងល្អនៅក្នុងហេតុការណ៍នេះមិនបណ្តាលឱ្យមានអ្នករងរបួសឡើយ។

    បន្ទាប់ពីកើតហេតុសមត្ថកិច្ចបានចុះមកដល់ ហើយដោយភាគីទាំងសងខាងស្គាល់គ្នាពួកគាត់ពុំបានទាមទារជាសំណងអ្វីនោះទេ ក៏សម្រួលគ្នាបញ្ចប់រឿង នៅនឹងកន្លែងកើតហេតុតែម្តង ដោយយករថយន្តទៅជួសជុលរៀងៗខ្លួន៕

ដោយ៖ ជ្រោយពេជ្រ