សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីករថយន្តតូយ៉ូតា ឡង់គ្រីស័រ ក្នុងល្បឿនលឿន និងមិនប្រយ័ត្នជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរបាំងថ្មបាក់វៀចអស់០៥កង់ ឯរថយន្តបង្ករងការខូចខាតយ៉ាងដំណំ ។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង១១ និង៣០នាទីយប់ ថ្ងៃចន្ទ ទី២១ ខែវិច្ឆិកា ឆ្នាំ២០២២ នៅតាមបណ្ដយផ្លូវ២៧១ ទល់មុខវិទ្យាល័យ ជា សុីម សាមគ្គី ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុ គេឃេីញរថយន្តម៉ាក តូយ៉ូតា ឡង់គ្រីស័រ ពណ៌ខ្មៅ ពាក់ស្លាកលេខ ភ្នំពេញ 2C-9739 បេីកបរដោយបុរសម្នាក់ ធ្វេីដំណេីរតាមបណ្ដោយផ្លូវ២៧១ ទិសដៅពីត្បូងទៅជេីង ក្នុងល្បឿនលឿន លុះមកដល់ចំណុចកេីតហេតុស្របនិងផ្លូវកោងផងនោះក៏ជ្រុលចង្កូតបុករះរបាំងថ្មពុះចែកទ្រូងផ្លូវបាក់ដួលរាបដល់ដីចំនួន០២កង់ និងវៀចចំនួន០៣កង់ ព្រមទាំងធ្វេីឲ្យរថយន្តបង្កដាច់កាឡេកង់មុខផ្នែកខាងឆ្វេង និងស្តុប កាង រងការខូចខាតយ៉ាងដំណំ តែមិនបង្កគ្រោះថ្នាក់ដល់មនុស្សឡេីយ ។
ក្រោយកើតហេតុ ម្ចាស់រថយន្តបង្កបានចុះគេចខ្លួនបាត់ បន្សល់រថយន្តនៅកន្លែងកេីតហេតុឲ្យសមត្ថកិច្ចមូលដ្ឋាន សហការជាមួយជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វេីការវាស់វែងស្ទូចយករថយន្តបង្កទៅរក្សាទុករង់ចាំដោះស្រាយគ្នានៅពេលក្រោយ ៕
ដោយ ៖ ភារ៉ា ដង្កោ
