សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា លោកបណ្ឌិត គី សេរីវឌ្ឍន៍ បានមានប្រសាសន៍នៅថ្ងៃទី ២៥ ខែវិច្ឆិកា ឆ្នាំ២០២២នេះថា ក្របខណ្ឌគោលនយោបាយឆ្នាំ២០២៣ របស់រាជរដ្ឋាភិបាល ដែលបានរៀបចំឡើង គឺឈរលើមូលដ្ឋាននៃគោលនយោបាយម៉ាក្រូសេដ្ឋកិច្ច និងការដាក់ចេញនូវយុទ្ធសាស្រ្ត ផែនការជាច្រើន ដើម្បីធ្វើឱ្យសម្រេចគោលបំណង ជាពិសេសប្រសិទ្ធភាពនៃការប្រមូលចំណូលចូលថវិកាជាតិ។
អ្នកជំនាញសេដ្ឋកិច្ចរូបនេះ ក៏បានរំពឹងថា ការប្រមូលចំណូលចូលថវិកាជាតិឆ្នាំ២០២៣ របស់រាជរដ្ឋាភិបាល នឹងសម្រេចបានតាមផែនការគ្រោងទុក ខណៈវិស័យក្នុងស្រុកជាច្រើន អាចបន្តលទ្ធភាពដល់ការប្រមូលចំណូល ។
លោកបណ្ឌិត គី សេរីវឌ្ឍន៍ បានថ្លែងបន្តថា នៅឆ្នាំ២០២៣ រាជរដ្ឋាភិបាលគ្រោងបង្កើនចំណូលថវិការដ្ឋខ្ពស់ជាងឆ្នាំ២០២២នេះ បេីទោះបីការបង្កើនខ្ពស់ក៏ដោយ រាជរដ្ឋាភិបាលនឹងអាចសម្រេចការប្រមូលចំណូលបានតាមការគ្រោងទុក ខណៈវិស័យក្នុងស្រុកជាច្រើន អាចបន្តលទ្ធភាពដល់ការប្រមូលចំណូលជូនរដ្ឋ ជាពិសេសអាជីវកម្មជាច្រើន ដែលមិនទាន់បានបង់ពន្ធ ប្រសិនវិស័យទាំងនេះចូលមកក្នុងប្រព័ន្ធ ហើយក្រុមហ៊ុន រោងចក្រ សហគ្រាស អាចប្រកួតប្រជែងគ្នា ប្រកបដោយយុត្តិធម៌ និងបរិយាបន្ន។
គួរបញ្ជាក់ថា រាជរដ្ឋាភិបាលគ្រោងប្រមូលចំណូលក្នុងប្រទេសថវិការដ្ឋ ឬថវិកាជាតិ ត្រូវបានគ្រោងប្រមាណជាង ២២ ភាគរយ នៃផសស, មានកំណើនជាង ១៤ ភាគរយ ធៀបនឹងច្បាប់ឆ្នាំ ២០២២ ។ នេះបេីយោងតាមសេចក្តីព្រៀងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣។ ដោយឡែកចំពោះការចំណាយសរុបថវិការដ្ឋ ឬថវិកាជាតិ ក៏ត្រូវបានគ្រោង ស្មើជិត ៣០ នៃ ផសស, មានកំណើន ១៣ ភាគរយ ធៀបនឹងច្បាប់ឆ្នាំ២០២២ផងដែរ៕
ដោយ៖សហការី
