សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារសៀល ថ្ងៃសុក្រ ២ កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៥ ខែវិច្ឆិកា ឆ្នាំ២០២២, លោក កើត រិទ្ធ រដ្ឋមន្រ្តីក្រសួងយុត្តិធម៌ បានអញ្ជើញដឹកនាំកិច្ចប្រជុំអំពីការត្រៀមលក្ខណៈសម្រាប់ការទទួលការចុះ On-site Visit នៅកម្ពុជា របស់ក្រុមការងារ ICRG-JG ។ កិច្ចប្រជុំនេះមានការអញ្ជើញចូលរួមពីសំណាក់ លោកអនុប្រធានតុលាការកំពូល, លោកស្រីអគ្គព្រះរាជអាជ្ញាអមតុលាការកំពូល, លោកប្រធានសាលាឧទ្ធរណ៍ភ្នំពេញ និងសាលាឧទ្ធរណ៍តំបន់, លោកអគ្គព្រះរាជអាជ្ញានៃមហាអយ្យការអមសាលាឧទ្ធរណ៍ភ្នំពេញ និងសាលាឧទ្ធរណ៍តំបន់, លោកប្រធានសាលាដំបូង និងលោម លោកស្រី ព្រះរាជអាជ្ញាអមសាលាដំបូងរាជធានី ខេត្ត ទូទាំងប្រទេស ព្រមទាំងក្រុមការងារប្រឆាំងការសម្អាតប្រាក់របស់ក្រសួងយុត្តិធម៌ផងដែរ។
នៅក្នុងកិច្ចប្រជុំនេះ លោករដ្ឋមន្រ្តី បានផ្តាំផ្ញើដល់សាលាជម្រះក្តី និងអយ្យការអមសាលាជម្រះក្តីគ្រប់ជាន់ថ្នាក់ឱ្យផ្តល់អាទិភាព និងបង្កើនសកម្មភាព លើការងារប្រឆាំងការសម្អាតប្រាក់ ព្រមទាំងពង្រឹងសមត្ថភាពស្ថាប័ន និងក្រុមការងារប្រឆាំងការសម្អាតប្រាក់របស់ខ្លួន ដោយអនុវត្តឱ្យបានត្រឹមត្រូវស្របតាមច្បាប់និងនីតិវិធីជាធរមាន។ ជាចុងក្រោយ លោករដ្ឋមន្រ្តី បានសម្តែងនូវការអរគុណ ចំពោះកិច្ចខិតខំប្រឹងប្រែងរបស់សាលាជម្រះក្តី និងអយ្យការអមសាលាជម្រះក្តីទាំងអស់ ដែលបានចូលរួមចំណែកក្នុងការអនុវត្តការងារនាពេលកន្លងមក និងសំណូមពរឱ្យខិតខំប្រឹងប្រែងបន្តទៀតដើម្បីបុព្វហេតុជាតិ និងដើម្បីរួមចំណែកការពារប្រព័ន្ធហិរញ្ញវត្ថុរបស់កម្ពុជា៕
ដោយ៖ សហការី
