សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិចិនម្នាក់រួមដំណើរនឹងប្រុសស្រីពីរនាក់ទៀតបើករថយន្តស៊េរីទំនើបម៉ាកមែរសឺដេសមួយគ្រឿង ឆ្លងផ្លូវបុកម៉ូតូ zoomer-x បណ្តាលឲ្យបុរសម្នាក់ដួលបោកទៅនឹងថ្នល់រងរបួសដៃម្ខាង។
ហេតុការណ៍នេះកើតឡើងកាលពីវេលាម៉ោង ៨និង ១០ នាទីយប់ថ្ងៃទី ២៨ខែវិច្ឆិកា ឆ្នាំ ២០២២ នៅតាមបណ្ដោយផ្លូវណតប្រ៊ីត ចំណុចមុខផ្សាររតនាផ្លាហ្សា ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសជនជាតិចិនម្នាក់រួមដំណើរនឹងមនុស្សប្រុសស្រីពីរនាក់ទៀតបើករថយន្តស៊េរីទំនើបម៉ាកមែរសឺដេស មួយគ្រឿងពណ៌ខ្មៅពាក់ស្លាកលេខភ្នំពេញ2BW-0611 ធ្វើដំណើរតាមបណ្ដោយផ្លូវបេតុង ចេញពីច្រកចូលផ្សារររតនាផ្លាហ្សា ក្នុងទិសដៅពីកើតទៅលិច ។ លុះមកដល់ចំណុចកែងនឹងផ្លូវណតប្រ៊ីត ត្រង់ចំណុចកើតហេតុខាងលើក៏បានបុកប៉ះជាមួយម៉ូតូ zoomer -x មួយគ្រឿងពណ៌សលាយទឹកក្រូចពាក់ស្លាកលេខបាត់ដំបង1T-8814ជិះដោយបុរសម្នាក់ធ្វើដំណើរតាមបណ្ដោយផ្លូវណតប្រ៊ីតទិសដៅពីត្បូងទៅជើង បណ្ដាលឲ្យជនរងគ្រោះដួលបោកទៅនឹងថ្នល់រងរបួសដៃម្ខាង។ ភ្លាមៗនោះជនរងគ្រោះត្រូវបានមិត្តភ័ក្កិនាំយកទៅព្យាបាលរបួសនៅឯមន្ទីរពេទ្យព្រះកុសុមៈផងដែរ។
ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញខណ្ឌចុះមកដល់កន្លែងកើតហេតុដើម្បីធ្វើការវាស់វែងយករថយន្តនិងម៉ូតូមកអែបនៅចិញ្ចើមផ្លូវ ទុកឲ្យភាគីទាំងពីរធ្វើការសម្របសម្រួលគ្នា ។ ក្រោយមកភាគីទាំងពីរបានធ្វើការសម្របសម្រួលគ្នាអស់រយៈពេលជិត ៣ម៉ោង នៅតែមិនត្រូវគ្នាទើបសមត្ថកិច្ចជំនាញខណ្ឌទំនាក់ទំនងទៅសមត្ថកិច្ចជំនាញការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចុះមកដល់កន្លែងកើតហេតុរួចក៏បានឲ្យភាគីរថយន្ត ទៅមើលជនរងគ្រោះនៅឯមន្ទីរពេទ្យដើម្បីងាយស្រួលធ្វើការដោះស្រាយគ្នាបន្តទៀត៕
ដោយ៖សុខាសែនជ័យ
