សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ មុខសញ្ញាជួញដូរ និងចែកចាយគ្រឿងញៀនខុសច្បាប់ម្នាក់ ត្រូវបានកម្លាំងនគរបាលស្រុកឯកភ្នំ ចុះស្រាវជ្រាវបង្ក្រាបនិងឃាត់ខ្លួនជាក់ស្ដែង កាលពីថ្ងៃទី០២ ខែធ្នូម្សិលមិញនេះ ត្រង់ចំណុចក្រុមទី១៧ ភូមិពាមឯក ឃុំពាមឯក ស្រុកឯកភ្នំ ខេត្តបាត់ដំបង ។
យោងតាមរបាយការណ៍របស់អធិការដ្ឋាននគរបាលស្រុកឯកភ្នំ នៅព្រឹកថ្ងៃសៅរ៍ទី០៣ ខែធ្នូ ឆ្នាំ២០២២នេះ បានឱ្យដឹងថា៖ កម្លាំងនគរបាលផ្នែកព្រហ្មទណ្ឌ និងគ្រឿងញៀន នៃអធិការដ្ឋាននគរបាលស្រុកឯកភ្នំ សហការជាមួយកម្លាំងប៉ុស្តិ៍នគរបាលរដ្ឋបាលពាមឯក ដឹកនាំដោយលោកវរសេនីយ៍ឯក ឡុង យោធាវីរ: អធិការនគរបាលស្រុកឯកភ្នំ បានបង្ក្រាបករណីរក្សាទុក ចែកចាយ និងជួញដូរដោយខុសច្បាប់នូវសារធាតុញៀនឃាត់ខ្លួនជនសង្ស័យម្នាក់ ឈ្មោះ វ៉ាត សាវ៉ុង ភេទប្រុស អាយុ ៤២ឆ្នាំ រស់នៅភូមិករហាល ឃុំពាមឯក ស្រុកឯកភ្នំ ខេត្តបាត់ដំបង ។
ចំណែកវត្ថុតាងចាប់យកបានរួមមាន ៖ -ថ្នាំញៀនប្រភេទមេតំហ្វេតាមីន (ម៉ាទឹកកក ICE) ចំនួន ០៤ថង់ ទម្ងន់០.៩៥ក្រាម សង្ស័យមានសារធាតុញៀន , -ទូរស័ព្ទដៃចំនួន ០១គ្រឿង , -ម៉ូតូចំនួន០១គ្រឿងម៉ាក់ហុងដាឃ្លីក ពណ៌ខ្មៅស៊េរីឆ្នាំ២០១០ ពាក់ស្លាកលេខភ្នំពេញ 1AK-5686 ។
បច្ចុប្បន្នជនសង្ស័យរួមនឹងវត្ថុតាង សមត្ថកិច្ចកំពុងកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់វិធានការតាមនីតិវិធី-ច្បាប់៕
ដោយ៖សហការី
