នគរបាលថា៖ មនុស្ស៤នាក់ រងរបួសធ្ងន់ និងស្រាលក្នុងករណីគ្រោះថ្នាក់ចរាចរណ៍រថយន្តបុករថយន្ត

ខេត្តកំពង់ស្ពឺ ៖ នគរបាលស្រុកភ្នំស្រួចខេត្តកំពង់ស្ពឺបានឱ្យដឹងថា នៅថ្ងៃចន្ទ ទី០៥ ខែធ្នូ ឆ្នាំ២០២២ វេលាម៉ោងជិត១រសៀលនៅផ្លូវជាតិលេខ៤ចន្លោះគីឡូម៉ែត្រលេខ៨២-៨៣ ត្រង់ចំណុចភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺមានករណីរថយន្តបុកជាមួយរថយន្តបណ្តាលអោយមនុស្ស៤នាក់រងរបួសធ្ងន់ស្រាលរដូករណែលពេញផ្លូវ។

មន្ត្រីនគរបាលបានឲ្យដឹងថា មុនពេលកើតហេតុមានរថយន្ត១គ្រឿង ម៉ាក ហ៊ីយ៉ានដាយពណ៌ស គ្មានស្លាកលេខ បើកបរដោយឈ្មោះ ឈុន លីគៀង ភេទប្រុស អាយុ២៩ឆ្នាំ រស់នៅខណ្ឌច្បារអំពៅ រាជធានីភ្នំពេញ អ្នករួមដំណើរ២នាក់÷ទី១-ឈ្មោះ ឡូញអឹងភេទប្រុស អាយុ ២៤ឆ្នាំ ភូមិជីរោម៍ ឃុំរោងដំរី ស្រុកបាភ្នំ ខេត្តព្រៃវែងនិង ទី២-ឈ្មោះ ប៊ុត សុខនឿន ភេទប្រុស អាយុ៣៥ឆ្នាំ រស់ នៅព្រៃរោន ស្រុកល្វាឯម ខេត្តកណ្តាល បើកបរពីទិស ខាងលិចទៅកើត។ លុះមកដល់ចំណុចខាងលើរថយន្តក៏ផ្ទុះកង់ហើយបានរេចង្កូតទៅបុករថយន្ត NISSAN (UD) ពណ៌បៃតង ពាក់ស្លាកលេខចង្កូតស្តាំ PP-1886 បើកបរដោយឈ្មោះ លី ប៊ុនលី ភេទប្រុស អាយុ៤០ឆ្នាំ រស់នៅភូមិបឹងតាព្រហ្មឃុំបឹងតាព្រហ្ម ស្រុកព្រៃនប់ ខេត្ត ព្រះសីហនុដែលបើកបរបញ្រ្ចាសទិសគ្នាបណ្តាលអោយ រងរបួសធ្ងន់០៣នាក់ ប្រុស និងរងរបួស ស្រាល០១នាក់ ប្រុស។

ចំពោះអ្នករបួសខាងលើ ត្រូវបានរថយន្តពេទ្យឯកជនផ្សារតាឡាត់ដឹកបញ្ជូនទៅសង្រ្គោះហើយ ៕

ដោយ៖ សូរិយា