សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តម៉ាក Toyota Prius មួយគ្រឿងបានបើកបោះពួយយ៉ាងលឿនហេីយរេចង្កូតទៅបុកគាបជាប់បង្គោលភ្លើង បណ្ដាលឱ្យខ្ទេចមួយកំណាត់មុខ និងធ្វេីឱ្យបុរសម្នាក់ស្លាប់ពេលបញ្ជូនដល់មន្ទីរពេទ្យ និង៤នាក់ទៀតរងរបួសធ្ងន់ស្រាល កាលពីវេលាម៉ោង១ និង៣០នាទីរសៀលថ្ងៃទី២៦ខែធ្នូ ឆ្នាំ២០២២ ស្ថិតនៅតាមបណ្ដោយផ្លូវជាតិលេខ៣ ក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។
សមត្ថកិច្ចបានឱ្យដឹងថា អ្នកបើកបរឈ្មោះ ថេង វណ្ណវា ភេទប្រុស អាយុ៣៤ឆ្នាំ មុខរបរមន្រ្តីជាប់កិច្ចសន្យាស្នាក់នៅភូមិទ្រុងមាន់ សង្កាត់អូរបែកក្អម ខណ្ឌសែនសុខ បានរងរបួសស្រាលត្រូវបានសមត្ថកិច្ចឃាត់ខ្លួននៅនឹងកន្លែង ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញរថយន្តមួយគ្រឿងម៉ាក Toyota Prius ពណ៌ទឹកមាស ពាក់ផ្លាកលេខភ្នំពេញ2BD-6574 បើកបរដោយបុរសម្នាក់ និងមានអ្នករួមដំណើរបួននាក់ផ្សេងទៀតធ្វើដំណើរតាមបណ្ដោយផ្លូវជាតិលេខ៣ ក្នុងទិសដៅពីត្បូងទៅជើងក្នុងល្បឿនលឿន ខណៈមកដល់ចំណុចកើតហេតុ រថយន្តបានរេចង្កូតមកខាងស្ដាំដៃបុកបង្គោលភ្លើងនៅចិញ្ចើមផ្លូវគាបជាប់រងការខូចខាតផ្នែកខាងមុខទាំងស្រុង និងបណ្ដាលឱ្យបុរសម្នាក់បានស្លាប់ពេលបញ្ជូនដល់មន្ទីរពេទ្យ និង៤នាក់ទៀតរបួសធ្ងន់និងស្រាល ។
ក្រោយកើតហេតុ សមត្ថកិច្ចមូលដ្ឋានបានចុះមកដល់ និងសហការជាមួយជំនាញចរាចរណ៍ នៃស្នងការដ្ឋាននគរបាលរាជធានីភ្នំពេញ ធ្វេីការវាស់វែងនិងស្ទូចយករថយន្តបង្កទៅរក្សាទុករង់ចាំធ្វើការដោះស្រាយនៅពេលក្រោយ ។
ចំណែកសព ជនរងគ្រោះត្រូវបានសមត្ថកិច្ចធ្វេីកំណត់ហេតុ និងស្រាវជ្រាវរកសាច់ញាតិមកទទួលយកទៅធ្វេីបុណ្យតាមប្រពៃណី ៕
ដោយ ៖ ភារ៉ា ដង្កោ
