នេនតូចមួយអង្គ ក្រោយពេទ្យដកធ្មេញខុសបច្ចេកទេស ពេលនេះបានសុគតហើយ ក្នុងមន្ទីរពេទ្យប្រទេសវៀតណាម

ចែករំលែក៖

ភ្នំពេញ៖ បើយោងតាមលោក ផន ផល្លា ជាប្រធានអង្គការមណ្ឌលកុមារកំព្រាមែកឈើ បានង្ហោះសារនៅលេីបណ្ដាញសង្គមហ្វេសប៊ុកផ្លូវការដោយបញ្ជាក់ថា៖ ទីបំផុត! នេនតូចបានសុគតហើយមុននេះ😥😥🙏🙏យើងបានព្យាយាមជួយលោកហើយ ម៉ាស៊ីនតូច ម៉ាស៊ីនធំ ពេទ្យក្នុងស្រុក ពេទ្យក្រៅស្រុក–យើងបានព្យាយាមរួចអស់ហើយ😥ហ៊ឹម……😥។

លោក ផន ផល្លា បានបញ្ជាក់បន្ថែមថា៖ នេន សឹងចុះ🙏🙏🙏នេនឈប់ឈឺចាប់ទៀតហើយ🙏🙏🙏សូមនិមន្តដោយសុខសាន្ត🙏🙏 យប់ថ្ងៃទី២៨ ខែធ្នូ ឆ្នាំ២០២២។

ប្រធានអង្គការរូបនេះ បានឱ្យដឹងទៀតថា នេនតូចអង្គនេះ មានស្រុកកំណើតនៅស្រុកព្រះស្តេច ខេត្តព្រៃវែង លោកមានជំងឺមហារីកមាត់ធ្មេញ ក្រោយពេលគ្រូពេទ្យធ្មេញ មួយកន្លែងស្ថិតនៅស្រុកព្រះស្ដេច ធ្វើការដកធ្មេញខុសបច្ចេកទេស ទេីបបណ្តាលឱ្យនេនតូច មានបញ្ហាក្នុងមាត់បង្កជាមហារីកកម្រិតធ្ងន់ ។ ក្រោយលោកព្យាយាមព្យាបាលអស់លទ្ធភាពនោះ ក៏មកត្រឡប់មកសឹងនៅកូនខ្ទម ដែលជាផ្ទះកំណើត ជាមួយញោមស្រីវិញ(ម្តាយ)។

លោក ផន ផល្លា បន្តថា ដោយសារអាការនៅតែធ្វើទុក្ខ នេនតូចយំឈឺខ្លាំងស្ទើររាល់យប់ ទើបបងប្អូនអ្នកភូមិ កាលពីថ្ងៃទី២១ ខែធ្នូ ឆ្នាំ២០២២ បានរៃប្រាក់ម្នាក់បន្តិចៗឱ្យស្ត្រីជាម្តាយ ដឹកនេនតូច ពីស្រុកព្រះស្តេចខេត្តព្រៃវែង បញ្ជូនយកមកមន្ទីរពេទ្យរុស្សី នៅរាជធានីភ្នំពេញ។

ប្រភពដដែលបន្តថា ក្នុងអំឡុងពេលសម្រាកនៅមន្ទីរពេទ្យរុស្សី នេនតូច មិនបានធូរស្រាយឡើយលោកនេន ស្ថិតនៅក្នុងសភាពខ្សោយខ្លាំង ដោយសារមហារីកមាត់ កាន់តែធ្ងន់ធ្ងរទៅៗហើយ ជាពិសេសគឺចាប់ផ្តើមហូរខ្ទុះចេញតាមមាត់ ហើយនេនតូច ស្រែកថ្ងូរដោយការឈឺចាប់ឥតស្រាកស្រាន្ត ទើបលោក ផន ផល្លា នៅថ្ងៃទី២៦ ខែធ្នូ ឆ្នាំ២០២២ សម្រេចបញ្ជូននេនតូច បន្តទៅព្យាបាលនៅមន្ទីរពេទ្យវៀតណាមតែម្តង។

គួរជម្រាបថា បន្ទាប់ពីបញ្ជូនទៅព្យាបាលនៅមន្ទីរពេទ្យវៀតណាម បានមួយថ្ងៃ លោក ផន ផល្លា នៅល្ងាចថ្ងៃទី២៧ ខែធ្នូ ឆ្នាំ២០២២ ក៏បានទទួលបានព័ត៌មានពីមន្ទីរពេទ្យវៀតណាមថា៖ “នេនតូចអង្គនេះ មិនអាចសង្គ្រោះបាននោះទេ ដោយសារគ្រឿងក្នុងរបស់លោក ព្រមទាំងក្រពះពោះវៀនរបស់លោក គឺឈប់ដំណើរការហើយ ប៉ុន្តែអ្វីដែលកាន់តែមិនអាចស្រោចស្រង់បាននោះ គឺផ្នែកខួរក្បាលរបស់លោក ក៏បានរីករាលដាលដោយប្រភេទមហារីក(សាច់កាច)ផងដែរ។ និងដោយមើលឃើញ ពីភាពមិនអាចសង្គ្រោះបាន លោកនេនតូច នឹងត្រូវបានបញ្ជូនត្រលប់មកកាន់ទឹកដីកំណើតរបស់លោកវិញ គឺនៅស្រុកព្រះស្តេច ខេត្តព្រៃវែង”៕