សារព័ត៌មាន នគរវត្ត តែងតែនាំមុខគេជានិច្ច
ខ្សែការពាររបស់ Manchester City កីឡាករ Joao Cancelo កំពុងតែស្ថិតក្នុងគោលដៅដើម្បីចូលរួមជាមួយក្រុមជើងឯកអាល្លឺម៉ង់ Bayern Munich មុនថ្ងៃកំណត់ផ្ទេរនៅថ្ងៃអង្គារនេះ។ កិច្ចព្រមព្រៀងសម្រាប់ខ្សែការពារសញ្ជាតិព័រទុយហ្គាល់រូបនេះនៅតែត្រូវបានបញ្ចប់ ប៉ុន្តែសំណើនេះគឺសម្រាប់ខ្ចីជើងដំបូងជាមួយនឹងជម្រើស៧០លានអឺរ៉ូ (៦១.៥លានផោន) ដើម្បីទិញនៅរដូវក្តៅ។
កីឡាករវ័យ២៨ឆ្នាំរូបនេះបានចុះហត្ថលេខាជាមួយក្លិប Manchester City ពី Juventus ក្នុងឆ្នាំ២០១៩ និងបានបង្ហាញខ្លួននៅ Premier League ចំនួន៩៨ដង។ គាត់បានឈ្នះពានរង្វាន់លីកចំនួនពីរ និង EFL Cup ក្រោមការដឹកនាំរបស់លោក Pep Guardiola ។
ពីមុន Cancelo ត្រូវបានគេមើលឃើញថា ជាកីឡាករសំខាន់ម្នាក់នៅក្នុងក្រុមរបស់លោក Guardiola ដោយសារតែសមត្ថភាពរបស់គាត់ក្នុងការរសាត់ទៅខាងក្នុង និងដើរតួជាយ៉ាងសំខាន់ឲ្យ Man City។ ការសម្តែងរបស់គាត់បានធ្វើឱ្យគាត់ជាប់ឈ្មោះក្នុងក្រុម PFA Premier League ប្រចាំឆ្នាំសម្រាប់ពីររដូវកាលចុងក្រោយ។
ទោះបីជាយ៉ាងណាក៏ដោយ គាត់ទើបតែចាប់ផ្តើមបាន៣ប្រកួតប៉ុណ្ណោះចាប់តាំងពីការប្រកួត World Cup ហើយការបង្ហាញខ្លួន២លើកចុងក្រោយរបស់គាត់គឺចាញ់ក្រុម Southampton និង Manchester United ។
ការលេចចេញនូវទម្រង់លេងដ៏ប្រសើររបស់កីឡាករ Rico Lewis និង Nathan Ake បានធ្វើឱ្យអ្នកចាត់ការទូទៅរបស់ Man City មានទំនុកចិត្តថា គាត់មានជម្រើសការពារគ្រប់គ្រាន់ដើម្បីបិទបាំងការចាកចេញរបស់កីឡាករដែលចង់ផ្លាស់ទៅ Bayern ដើម្បីបន្តលេងក្នុងកម្រិតខ្ពស់បំផុត។
នៅខែធ្នូ ឆ្នាំ២០២១ Cancelo បានទទួលរងក្នុងករណីហិង្សាមួយ បន្ទាប់ពីព្យាយាមវាយតប់ក្រុមចោរប្លន់៤នាក់នៅផ្ទះរបស់គាត់ដ៏គួរឱ្យរន្ធត់។ គាត់បានចុះហត្ថលេខាលើកិច្ចសន្យាថ្មីរយៈពេល៥ឆ្នាំជាមួយក្រុមជើងឯក Premier League ដែលកំពុងគ្រប់គ្រងនៅខែកុម្ភៈឆ្នាំ២០២២ ដោយបន្តកុងត្រារបស់គាត់នៅ Etihad Stadium រហូតដល់ឆ្នាំ២០២៧។
កាលពីរដូវក្តៅមុន Man City បានលក់ខ្សែការពារ OleksandrZinchenko និងខ្សែប្រយុទ្ធ Gabriel Jesus ទៅ Arsenal ក៏ដូចជា Raheem Sterling ទៅ Chelsea ក្នុងកិច្ចព្រមព្រៀង៥០លានផោន។លោក Pep Guardiola មិនដែលលាក់បាំងការពិតថា គាត់នឹងមិនរក្សាកីឡាករដែលមិនសប្បាយចិត្តនោះទេ។
Joao Cancelo មិនសប្បាយចិត្តនៅពេលប្រកួតមានកំណត់របស់គាត់ Bayern បានដាក់សំណើ ហើយលោក Guardiola ក៏កំពុងស្វែងរកកីឡាករថ្មីផងដែរ។ ក្នុងរដូវកាលមួយដែល Man City បានព្យាយាមស្វែងរកភាពស៊ីសង្វាក់គ្នា និងប្រសិទ្ធភាពនៃរដូវកាលថ្មីៗនេះ Canceloគឺជាមនុស្សម្នាក់ក្នុងចំណោមអ្នកដែលមិនឈានដល់កម្រិតដែលត្រូវការ។
ការមកដល់របស់ Erling Haaland បានធ្វើឱ្យមានការកែប្រែយុទ្ធសាស្ត្រមួយចំនួន ហើយ Cancelo លែងជាកម្លាំងដែលគាត់មានទៀតហើយ។លើសពីនេះទៀត ការលេចចេញរបស់យុវជន Rico Lewis នៅខ្សែការពារស្តាំ និងទម្រង់លេងប្រសើរឡើងរបស់ Nathan Ake ដែលបានរួមចំណែកឈ្នះការប្រកួតពីខ្សែការពារឆ្វេងទល់នឹងក្រុម Arsenal កាលពីថ្ងៃសុក្រ បានធ្វើឱ្យលោក Guardiola មានទំនុកចិត្តលើជម្រើសរបស់គាត់ ៕
ដោយ៖ ភារៈ(រូបភាព ៖ BBC Sport)
