សារព័ត៌មាន នគរវត្ត តែងតែនាំមុខគេជានិច្ច
ខ្សែបម្រើ Jonjo Shelvey របស់ក្លិប Newcastle បានបញ្ចប់ក្នុងការផ្លាស់ប្តូរខែមករាទៅកាន់ Nottingham Forest។ អតីតកីឡាករជម្រើសជាតិអង់គ្លេសវ័យ៣០ឆ្នាំបានបង្ហាញខ្លួននៅ Premier League ត្រឹមតែ៣ដងប៉ុណ្ណោះក្នុងរដូវកាលនេះ ហើយកិច្ចសន្យារបស់គាត់នឹងផុតកំណត់នៅរដូវក្តៅ។
លោក Eddie Howe អ្នកចាត់ការទូទៅរបស់ក្លិប Newcastle បាននិយាយថា លោកបានវាយតម្លៃ Shelvey ខ្ពស់ណាស់ ប៉ុន្តែនឹងមានការលំបាកខ្លាំងណាស់ដើម្បីរក្សាគាត់។
លោក Steve Cooper គ្រូបង្វឹកក្លិប Nottingham Forest បានបញ្ជាក់ថា ខ្សែបម្រើរូបនេះកំពុងពិនិត្យសុខភាពនៅក្លិបកាលពីថ្ងៃចន្ទ។ ជាមួយនឹង Shelvey ទំនងជានឹងចូលរួម ខ្សែបម្រើ Lewis O’Brien គ្រោងនឹងចាកចេញពី Nottingham Forest ក្នុងលក្ខខណ្ឌខ្ចីជើងសម្រាប់រដូវកាលដែលនៅសល់។Shelvey នឹងក្លាយជាកីឡាករ Newcastle ទី២ដែលផ្លាស់ទៅ City Ground ក្នុងខែនេះ បន្ទាប់ពីខ្សែប្រយុទ្ធ Chris Wood។
ក្នុងអំឡុងសន្និសីទសារព័ត៌មានសម្រាប់ការប្រកួតវគ្គពាក់កណ្តាលផ្តាច់ព្រ័ត្រ Carabao Cup ជើងទី២ទល់នឹងក្រុម Manchester United លោក Cooper បាននិយាយថា ដំណើរការដើម្បីចុះហត្ថលេខាលើ Shelvey កំពុងបន្ត។
គាត់បាននិយាយថា “ខ្ញុំនឹងមិនបដិសេធថា Jonjo កំពុងមានពេទ្យទេ ព្រោះខ្ញុំគិតថាអ្នកទាំងអស់គ្នាបានឃើញគាត់ ដូច្នេះវានឹងខុសសម្រាប់ខ្ញុំក្នុងការធ្វើវា។ យើងត្រូវតែគោរពដំណើរការ ហើយប្រសិនបើដំណើរការនោះត្រូវបានបញ្ចប់ យើងនឹងនិយាយដោយបើកចំហអំពីរឿងនោះ”។
Shelvey បានបង្ហាញខ្លួន២០២ប្រកួត និងស៊ុតបញ្ចូលទីបាន១៨គ្រាប់នៅក្នុងការប្រកួតទាំងអស់ចាប់តាំងពីចូលរួមជាមួយ Newcastle ពី Swansea City ក្នុងឆ្នាំ២០១៦។
លោក Howe បាននិយាយថា “Jonjo គឺជាកីឡាករដ៏ធំសម្រាប់ក្លិបបាល់ទាត់នេះក្នុងរយៈពេល៧ឆ្នាំចុងក្រោយនេះ។ គាត់គឺជាផ្នែកមួយដ៏សំខាន់នៃក្រុមរបស់ខ្ញុំចាប់តាំងពីខ្ញុំមកទីនេះ ជាអកុសលគាត់មានរបួសនៅរដូវកាលនេះ។ ប្រាកដណាស់ ខ្ញុំមិនចង់បាត់បង់គាត់ទេ ប៉ុន្តែស្រដៀងទៅនឹង Chris Wood ខ្ញុំត្រូវតែយល់ពីបំណងប្រាថ្នារបស់កីឡាករជាមួយនឹងកិច្ចសន្យារបស់គាត់នឹងផុតកំណត់នៅរដូវក្តៅនេះ។ អ្នកអាចរក្សាកីឡាករដែលចង់ចាកចេញ ប៉ុន្តែអ្នកត្រូវតែទទួលយកគ្រប់ស្ថានភាពដោយឯករាជ្យ ហើយព្យាយាម និងវិនិច្ឆ័យអ្វីដែលល្អបំផុតសម្រាប់គាត់ និងក្លិប”។
Newcastle កំពុងស្ថិតក្នុងចំណាត់ថ្នាក់លេខ៣ក្នុងក្របខ័ណ្ឌ Premier League និងរក្សាបាននូវគុណសម្បត្តិ១គ្រាប់លើក្រុម Southampton ឆ្ពោះទៅកាន់ជើងទី២នៃពានរង្វាន់ League Cup វគ្គពាក់កណ្តាលផ្តាច់ព្រ័ត្រនៅថ្ងៃអង្គារនេះ។
ចំណែកខ្សែបម្រើ Weston McKennie របស់ Juventus បានធ្វើដំណើរទៅកាន់ Leeds កាលពីថ្ងៃចន្ទ ដើម្បីបញ្ចប់ការផ្លាស់ប្តូររបស់គាត់ទៅកាន់កីឡាករ Elland Road ក្នុងលក្ខខណ្ឌខ្ចីជើង។ គេរំពឹងថា McKennieវ័យ២៤ឆ្នាំនឹងចុះហត្ថលេខាលើកិច្ចព្រមព្រៀងខ្ចីជើង ប៉ុន្តែវាអាចប្រែទៅជាការផ្ទេរអចិន្រ្តៃយ៍។
កីឡាករសញ្ជាតិអាមេរិករូបនេះបានបង្ហាញខ្លួន១៥ប្រកួតនៅក្របខ័ណ្ឌ SerieA សម្រាប់ក្រុម Juventus ក្នុងរដូវកាលនេះ ដោយស៊ុតបញ្ចូលទីបាន១គ្រាប់ និងបញ្ជូនបាល់ឱ្យមិត្តរួមក្រុមមួយទៀត។ គាត់នឹងក្លាយជាកីឡាករទីបីរបស់ក្លិបនៅក្នុងទីផ្សារដោះដូរកីឡាករខែមករាបន្ទាប់ពីការមកដល់របស់ Max Wober និង Georginio Rutter ។
McKennie បានទាក់ទាញចំណាប់អារម្មណ៍ពីកន្លែងផ្សេងទៀតនៅក្នុង Premier League ប៉ុន្តែបានជ្រើសរើស Leeds ជាកន្លែងដែលមិត្តរួមជាតិ Tyler Adams និង Brenden Aaronson លេងរួចហើយ។ គាត់មានជម្រើសជាតិជាន់ខ្ពស់ចំនួន៤១លើកសម្រាប់សហរដ្ឋអាមេរិក ហើយបានចាប់ផ្តើមនៅក្នុងការប្រកួតបាល់ទាត់ពិភពលោកឆ្នាំ២០២២ ទាំងបួននៅប្រទេសកាតា ខណៈដែលក្រុមជម្រើសជាតិបានឈានដល់វគ្គ១៦ក្រុមចុងក្រោយ។
McKennie បានចូលរួមជាមួយ Juventus ក្នុងលក្ខខណ្ឌខ្ចីជើងពីក្លិបអាល្លឺម៉ង់ Schalke ក្នុងឆ្នាំ២០២០ មុនពេលការផ្លាស់ប្តូររបស់គាត់ត្រូវបានធ្វើឡើងជាអចិន្ត្រៃយ៍មួយឆ្នាំក្រោយមក ហើយបានបង្ហាញខ្លួនសរុបចំនួន៤៩ប្រកួតសម្រាប់ក្រុមអ៊ីតាលី ៕
ដោយ៖ ភារៈ(រូបភាព ៖ BBC Sport)
