សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ស្នងការដ្ឋាននគរបាលខេត្តកំពង់ស្ពឺ នៅព្រឹកថ្ងៃពុធទី០១ ខែកុម្ភៈ ឆ្នាំ២០២៣នេះ បានឱ្យដឹងថា បន្ទាប់ពីទទួលបានព័ត៌មានពីបណ្ដាញសង្គមថាមានករណីក្មេងទំនេីង តែងតែធ្វើសកម្មភាពប្លន់ប្រេងពីរថយន្ដដែលអ្នកបេីកបរឈប់សម្រាកនាពេលយប់ នៅតាមបណ្ដោយផ្លូវជាតិលេខ៤ ក្នុងស្រុកភ្នំស្រួចនោះ ភ្លាមៗលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ បានដាក់បញ្ជាឱ្យផ្នែកយុត្តិធម៌ស្រុកភ្នំស្រួច បេីកការស្រាវជ្រាវរកមុខសញ្ញាក្រុមចោរទាំងនោះដេីម្បីចំណាត់ការ និងបង្រ្កាបឱ្យខានតែបាន។
ប្រភពដដែលបន្តថា ជាក់ស្ដែងប្រតិបត្តិការនោះដឹកនាំពីលោកអធិការស្រុកភ្នំស្រួច ផ្នែកយុត្ដិធម៌ស្រុកសហការជាមួយកម្លាំងនគរបាលប៉ុស្ដិ៍មូលដ្ឋាន ប្រមូលព័ត៌មាន និងឈានទៅកំណត់បានមុខសញ្ញាក្មេងទំនេីងដែលជាក្រុមធ្លាប់ប្រព្រឹត្ដបទល្មេីសក្នុងមូលដ្ឋានកន្លងមក ។
ជាលទ្ធផលសមត្ថកិច្ចជំនាញបានធ្វើការឃាត់ខ្លួនមុខសញ្ញាចំនួន ៤នាក់ ៖ ១-ឈ្មោះ ភា រាជ ប្រុស ២៩ឆ្នាំ ២-ឈ្មោះ មៀម សុធារៈ ប្រុស ២៧ឆ្នាំ ៣-ឈ្មោះ បេង សំណាង ហៅវិត ប្រុស ៣១ឆ្នាំ ៤-ឈ្មោះ ជីង រ៉ា ស្រី ២១ឆ្នាំ ស្នាក់នៅបន្ទប់ជួលស្ថិតនៅក្នុងភូមិទី៤ ឃុំត្រែងត្រយឹង ស្រុកភ្នំស្រួច ។
តាមចម្លេីយអ្នកទាំង៤ថាខ្លួនពិតជាបានធ្វេីសកម្មភាពគំរាមយកដុំថ្មគប់កញ្ចក់រថយន្ត យកដាវដេញគំរាមកាប់លេីអ្នកបេីកបរ រួចបូមយកប្រេងចេញពីរថយន្ដប្រាកដមែន ។ កន្លងទៅ ក្រុមខ្លួនតែងតែប្រព្រឹត្ដសកម្មភាពលួចបូមប្រេងពីរថយន្តញឹកញាប់ និងគប់កញ្ចក់រថយន្ដពេលយប់ ។
បច្ចុប្បន្នសមត្ថកិច្ចបានបញ្ជូនមុខសញ្ញាទាំង៤មកការិយាល័យព្រហ្មទណ្ឌ នៃស្នងការដ្ឋាននគរបាលខេត្ដកំពង់ស្ពឺ ដេីម្បីចាត់ការតាមបន្ដនីតិវិធី៕
ដោយ៖សហការី
