សារព័ត៌មាន នគរវត្ត តែងតែនាំមុខគេជានិច្ច
ក្លិប Valencia នៅលីកកំពូលអេស្ប៉ាញបានចែកផ្លូវជាមួយអ្នកចាត់ការលោក Gennaro Gattuso ដោយកិច្ចព្រមព្រៀងគ្នាទៅវិញទៅមកត្រឹមតែជាង៧ខែបន្ទាប់ពីការតែងតាំងរបស់គាត់។ នេះបើយោងតាមក្លិបនៅ La Liga មួយនេះបានប្រកាសកាលពីថ្ងៃអង្គារ ទី៣១មករា។
Valencia បានប្រកាសថា បន្ទាប់ពីជំនួបដ៏យូររវាង Gattuso និងមន្ត្រីក្លិប ពួកគាត់បានយល់ព្រមបញ្ចប់កិច្ចសន្យារបស់អ្នកចាត់ការទូទៅ។
បន្ទាប់ពីចាញ់ក្រុម Real Valladolid ១–០ កាលពីថ្ងៃអាទិត្យ Valencia ឈរនៅលេខរៀងទី១៤ ក្នុង La Liga ជាមួយនឹង២០ពិន្ទុពី១៨ប្រកួត ដែលស្ថិតនៅពីលើតំបន់កាត់ចោល១ពិន្ទុ ដោយបានឈ្នះតែ៥ប្រកួតក្នុងលីគរហូតមកដល់ពេលនេះក្នុងរដូវកាលនេះ។
លោក Gattuso វ័យ៤៥ឆ្នាំដែលធ្លាប់ជាខ្សែបម្រើប្រយុទ្ធជាមួយ AC Milan និងអ៊ីតាលីក៏បានគ្រប់គ្រងក្លិប AC Milan និង Napoli ដោយចាកចេញពីក្លិប Napoli នៅចុងបញ្ចប់នៃរដូវកាល២០២០–២០២១។ គាត់បានដឹកនាំពួកគេឱ្យឈ្នះពានរង្វាន់ Coppa Italia ក្នុងឆ្នាំ២០២០ ប៉ុន្តែបានខកខានក្នុងការប្រកួត Champions League ដោយពិន្ទុក្នុងយុទ្ធនាការចុងក្រោយរបស់គាត់។
Gattuso បានចូលរួមជាមួយក្រុម Valencia ក្នុងភាពចលាចល ខណៈដែលអ្នកគាំទ្រទាមទារការវិនិយោគពីម្ចាស់ក្លិបលោក Peter Lim ដែលបានទិញក្លិបកាលពីឆ្នាំ២០១៤។
ចាប់តាំងពីពេលនោះមក ក្លិបមានគ្រូបង្វឹកជាច្រើនរួមមានលោក NunoEspirito Santo, Gary Neville, Pako Ayestaran, Cesare Prandelli, Marcelino, Albert Celades, Javi Gracia និង Jose Bordalas ។
លោក Voro Gonzalez ដែលជាអតីតខ្សែការពារ និងជាគ្រូបង្វឹកសាលាយុវជនរបស់ក្លិបនឹងចូលកាន់តំណែងជាអ្នកចាត់ការចាំផ្ទះរបស់ក្លិបValencia ចំនួន៨ប្រកួត ខណៈដែលក្លិបកំពុងស្វែងរកអ្នកជំនួសលោកGattuso ៕
ដោយ៖ ភារៈ(រូបភាព ៖ Reuters/CNA)
