សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចអធិការដ្ឋាននគរបាលស្រុកស្វាយទាប ឃាត់ខ្លួនបុរសជនជាតិចិនម្នាក់មកសាកសួរបន្ទាប់ពីផ្ទុះក្នុងបណ្ដាញសង្គមហ្វេសប៊ុកបើករថយន្ត ដោយសភាពរេចង្កូតចុះឡើងពេញផ្លូវ នៅក្នុងស្រុកស្វាយទាប។
សមត្ថកិច្ចនគរបាលបានបញ្ជាក់ថាក្រុមការងារនិងប្រតិកម្មរហ័សនៃអធិការដ្ឋាននគរបាលស្រុកស្វាយទាប មានកិត្តិយសសូមធ្វើការឆ្លើយតបចំពោះ ផេកសារព័ត៌មាន ដែលបានធ្វើការចុះផ្សាយនៅ ថ្ងៃទី១៩ ខែកុម្ភៈ ឆ្នាំ២០២៣ វេលាម៉ោង ០៨:៣០នាទី មានរថយន្តមួយគ្រឿងម៉ាក Camery Hybrid ពណ៌ទឹកមាស បើកបរដោយជនជាតិចិន មានសភាពរេចង្កូតចុះឡើងពេញផ្លូវ ទិសដៅពីកើតទៅលិច មកដល់ត្រង់ចំណុច គីឡូម៉ែត្រលេខ០៨ រួចបត់ត្រឡប់ក្រោយទៅទិសខាងកើតវិញ។
ប្រភពបន្តថា ក្រោយពីទទួលបានព័ត៌មានភ្លាម លោកវរសេនីយ៍ទោ សោម សារ៉ន អធិការនគរបាលស្រុកស្វាយទាបស្ដីទី បញ្ជាកម្លាំងជំនាញ ចុះឃាត់យកមកអធិការដ្ឋាននគរបាលស្រុកដើម្បីសួរនាំ និងធ្វើតេស្តជាតិអាល់កុល ។
ដោយជាលទ្ធផលគឺ គ្មានជាតិអាល់កុលនោះទេបើ តាមចម្លើយរបស់អ្នកបើកបរថា ខ្លួនងងុយដេកដោយមិនបានដេកពេញមួយយប់ មូលហេតុ ចេញពីធ្វើការវេនយប់ ។
បច្ចុប្បន្នសមត្ថកិច្ច បានធ្វើការអប់រំដល់ជនជាតិចិនរូបនេះកុំឱ្យបើកបរក្នុងស្ថានភាពងងុយដេកទៀតព្រោះអាចគ្រោះថ្នាក់ ឬបង្កគ្រោះថ្នាក់ដល់អ្នកដទៃ និងបានផ្ដល់កន្លែងស្នាក់នៅរយៈពេលខ្លីដើម្បីបំបាត់ភាពងងុយដេក រួចមានមិត្តភក្តិមកទទួលយកទៅវិញផងដែរ ៕
ដោយ៖ សុថាន
