សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ទីបំផុតលោក ថៃ គឹមមុនី ចៅក្រមស៊ើបសួរសា លាដំបូងរាជធានីភ្នំពេញ នៅពីរសៀលថ្ងៃទី២ ខែមីនា ឆ្នាំ២០២៣ នេះ បានសម្រេចចេញដីកាឃុំខ្លួនកូនតុងទីន ដែលកើបលុយ រាប់សែនដុល្លារបម្រុងរត់គេចខ្លួន ដាក់ពន្ធនាគារព្រៃស PJ ជាបណ្តោះអាសន្ន ដោយរង់ចាំបើកសវនាការទទួលទោសតាមផ្លូវច្បាប់ ។
តាមដីកាឃុំខ្លួនបានសម្រេចដាក់ឲ្យជនត្រូវចោទស្ថិតក្រោមការពិនិត្យពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន តាមបញ្ញតិមាត្រា ២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តការទូទាត់សងប្រាក់ ដែលជាបទល្មើសព្រហ្មទណ្ឌ ។
សូមជម្រាបថា ៖ ស្ត្រីម្នាក់ជាអ្នកលេងតុងទីន ដែលហៅថា”កូនតុងទីន” ត្រូវបានកម្លាំងសមត្តកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃធ្វើការឃាត់ខ្លួន កាលពីថ្ងៃទី២៧ ខែកុម្ភៈ ឆ្នាំ២០២៣ ពាក់ព័ន្ធករណីកើបលុយតុងទីនបានរាប់សែនដុល្លារអាមេរិក ហើយព្យាយាមរត់គេចខ្លួន។ ស្ត្រីរូបនោះឈ្មោះ ភ័ណ្ឌ ស៊ីវម៉ី អាយុ ២៧ ឆ្នាំ ស្នាក់នៅផ្ទះលេខ៤៣៥B ផ្លូវលេខ២១BT ភូមិត្នោតជ្រុំ សង្កាត់បឹងទំពុន ខណ្ឌមានជ័យរាជធានីភ្នំពេញ ។
ការចាប់ខ្លួនកូនតុងទីនម្នាក់ខាងលើនេះ ត្រូវបានសមត្តកិច្ចបង្ហើបឲ្យដឹងថា ជាការអនុត្តតាមដីកាបញ្ជាឲ្យចូលខ្លួនរបស់លោក ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ពាក់ព័ន្ធពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន តាមពាក្យបណ្តឹងរបស់ឈ្មោះ គង់ ណាក់នីន ។ សមត្តកិច្ចឲ្យដឹងទៀតថា ពាក្យបណ្តឹងរបស់ជនរងគ្រោះ កាលពីថ្ងៃទី១៣ ខែតុលា ឆ្នាំ២០២២ ស្ថិតនៅផ្ទះជនរងគ្រោះលេខ១៧៩ ផ្លូវជាតិលេខ២ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ឈ្មោះ ភ័ណ្ឌ ស៊ីវម៉ី ដែលជាអ្នករាប់អានគ្នា បានទៅខ្ចីប្រាក់ពីដើមបណ្តឹងចំនួន ៣៣០.០០០ ដុល្លារអាមេរិក ដោយបានធ្វើកិច្ចសន្យាជាលាយលក្ខអក្សរត្រឹមត្រូវ ថាយកទៅពង្រីកមុខរបររកស៊ីតាមអនឡាញ ។ ជនសង្ស័យបានធានាអះអាងថាសងទៅជនរងគ្រោះវិញ ក្នុង១ខែ២ ០០០ ដុល្លារ គិតចាប់ពីថ្ងៃទី ២០ ខែតុលា ដល់ថ្ងៃទី៥ ខែមេសា ឆ្នាំ២០២៣ ដោយសារតែការជឿទុកចិត្តគ្នា ទើបដើមបណ្តឹងយល់ព្រមឲ្យឈ្មោះ ភ័ណ្ឌ ស៊ីវម៉ី ខ្ចីប្រាក់រហូតដល់ ៣៣០ ០០០ ដុល្លារអាមេរិកនោះ ។ បន្ទាប់ពីទទួលបានប្រាក់គ្រប់ចំនួនហើយ ឈ្មោះ ភ័ណ្ឌ ស៊ីវម៉ី បានដាក់តំកល់មូលប្បទានបត្រ១សន្លឹករបស់ធនាគារ វឌ្ឍនៈអាស៊ីចំកាត់ ABA ចុះថ្ងៃទី១៣ ខែតុលា ឆ្នាំ២០២២ សម្រាប់ទូទាត់ប្រាក់សងទៅដើមបណ្តឹងវិញ។ ប៉ុន្តែផ្ទុយទៅវិញឈ្មោះ ភ័ណ្ឌ ស៊ីវម៉ី មិនបានគោរពតាមការសន្យាទេ បែជាយកប្រាក់នោះទៅលេងតុងទីន ដោយរយៈពេល២ខែមិនឃើញបង្វិលឲ្យម្ចាស់បំណុលទេ ដោយអស់ជំនឿ ទើបម្ចាស់បំណុលយកមូលប្បទានបត្រ របស់ឈ្មោះ ភ័ណ្ឌ ស៊ីវម៉ី ទៅបើកប្រាក់ពីធនាគារ ខាងធនាគារឆ្លើយតបមកវិញថា ជា”សែកស្អុយ” អត់មានសាច់ប្រាក់ ។ បន្ទាប់មកទៀតជនរងគ្រោះក៏បានព្យាយាម ទាក់ទងទៅឈ្មោះ ភ័ណ្ឌ ស៊ីវម៉ី ជាញឹកញាប់ដែរ ដើម្បីជួបដោះស្រាយរឿងបំណុលជាង៣០ម៉ឺនដុល្លារអាមេរិកនោះ ប៉ុន្តែឈ្មោះ ភ័ណ្ឌ ស៊ីវម៉ី មិនបានទៅជួបដើមបណ្តឹងទេ ថែមទាំងគេចខ្លួនទៀតផង ។ ដូច្នោះទង្វើដែលជនសង្ស័យបានប្រព្រឹត្ត ដូចរៀបរាប់ខាងលើនេះហើយ ទើបធ្វើឲ្យជនរងគ្រោះសម្រេចចិត្តដាក់ពាក្យបណ្តឹងទៅសមត្តកិច្ច ដើម្បីឃាត់ខ្លួនឈ្មោះ ភ័ណ្ឌ ស៊ីវម៉ី យកមកអនុវត្តតាមច្បាប់ ។ នៅចំពោះមុខសមត្តកិច្ចឈ្មោះ ភ័ណ្ឌ ស៊ីវម៉ី បានសារភាពថា លុយទាំងអស់នោះខ្លួនបានខ្ចីគេ យកទៅរកស៊ីតាមអនឡាញខ្លះ និងលេងតុងទីនខ្លះ ដែលការលេងតុងទីនបានកើបលុយមេអស់ ហើយ តែដោយសារចុងក្រោយរលាយខ្សុលទើបគេចខ្លួន ។
ហើយកន្លងមកឃើញការផ្សាយព័ត៌មាន ចាប់តែមេតុងទីនវេចលុយរត់ ម្តងនេះកូនតុងទីនកើបលុយរាប់សែនដុល្លារបម្រុងគេចខ្លួន ទីបំផុតជាប់ជុចសមត្តកិច្ចដូចតែគ្នាទេ ។ ដូច្នេះពាក់ព័ន្ធក្នុងការបង់ប្រាក់ ដែលធ្វើឲ្យមេតុងទីនមានផលលំបាក និងបង់ជំនួស ឬសងទៅកូនតុងទីនជាច្រើននាក់កន្លងមក គឺដោយសារ តែកូនតុងទីនមួយចំនួនតូច ទើបធ្វើឲ្យមេតុងទីនរងនូវពាក្យនូវបណ្តឹងអត់មានលុយសងកូនតុងទីនជាហូរហែមកនោះ។
បច្ចប្បន្នជនត្រូវចោទត្រូវបានបញ្ជូនទៅឃុំខ្លួននៅពន្ធនាគារPJ ជាបណ្តោះអាសន្ន៕
ដោយ ៖ រ៉ារ៉ា
