សារព័ត៌មាន នគរវត្ត តែងតែនាំមុខគេជានិច្ច
– លោក Vo Van Thuong ទើបតែត្រូវបានរដ្ឋសភានីតិកាលទី ១៥ បោះឆ្នោតជ្រើសរើសឲ្យកាន់តំណែងជាប្រធានាធិបតីនៃសាធារណរដ្ឋសង្គមនិយមវៀតណាមអាណត្តិ ២០២១-២០២៦។
នាព្រឹកថ្ងៃទី ២ ខែមីនា រដ្ឋសភាវៀតណាមបានបើកកិច្ចប្រជុំវិសាមញ្ញលើកទី ៤ នៅទីក្រុងហាណូយ ដើម្បីបោះឆ្នោតជ្រើសរើសប្រធានាធិបតីសម្រាប់អាណត្តិ 2021-2026។
នៅក្នុងកិច្ចប្រជុំនេះ គណៈកម្មាធិការអចិន្ត្រៃយ៍រដ្ឋសភាបានដាក់សំណើរទៅរដ្ឋសភាដើម្បីពិចារណា និងជ្រើសរើសលោក Vo Van Thuong – សមាជិកការិយាល័យនយោបាយ គណៈកម្មាធិការអចិន្ត្រៃយ៍នៃលេខាធិការដ្ឋាននីតិកាលទី XIII សមាជិករដ្ឋសភានីតិកាលទី 15 នៃគណៈប្រតិភូជាតិ។ .ជាប្រធានតំណាងរាស្ត្រទីក្រុង Da Nang កាន់តំណែងជាប្រធានាធិបតីនៃនៃសាធារណៈរដ្ឋសង្គមនិយមវៀតណាមអាណត្តិ 2021-2026។
លោក វ៉ូ វ៉ាន់ធឿង កើតនៅថ្ងៃទី១៣ ខែធ្នូ ឆ្នាំ១៩៧០ នៅក្នុងខេត្ត Vinh Long។ លោកបានបញ្ចប់ការសិក្សាថ្នាក់អនុបណ្ឌិតទស្សនវិជ្ជា។ លោកបានចូលរួមជាមួយ គណបក្សកុម្មុយនិស្ដវៀតណាម នៅថ្ងៃទី១៨ ខែវិច្ឆិកា ឆ្នាំ១៩៩៣។ លោក ធឿង ធ្លាប់បម្រើការងារជាលេខាបក្សស្រុកទី១២ នៃទីក្រុងហូជិមិញ រយៈពេល ២ឆ្នាំ ដោយចាប់ផ្ដើមពីឆ្នាំ២០០៤។ នៅឆ្នាំ២០០៦ លោកត្រូវបានជ្រើសតាំង ដោយការិយាល័យនយោបាយឱ្យកាន់តំណែងជាលេខាអចិន្ត្រៃយ៍សម្ព័ន្ធយុវជនកុម្មុយនិស្ដនៃគណៈកម្មាធិការមជ្ឈិមប្រចាំទីក្រុងហូជីមិញ ហើយរហូតដល់ខែសីហា ឆ្នាំ២០១១ លោក ធឿង បានក្លាយជា លេខាបក្សប្រចាំខេត្ត Quang Ngai។ ៣ឆ្នាំក្រោយមកទៀត លោកបានកាន់តំណែងជាលេខាបក្សរងប្រចាំទីក្រុងហូជីមិញ និងជាប់ឆ្នោតកាន់តំណែងនេះសាជាថ្មី នៅខែតុលា ឆ្នាំ២០១៥។
នៅខែមករា ឆ្នាំ២០១៦ លោក វ៉ូ វ៉ាន់ធឿង បានចូលរួមក្នុងការិយាល័យនយោបាយ ដែលធ្វើឱ្យលោកក្លាយជាសមាជិកវ័យក្មេងជាងគេបង្អស់ នៅក្នុងការិយាល័យនយោបាយដ៏មានឥទ្ធិពលរបស់បក្ស និងបន្ទាប់មក លោកកាន់តំណែងជាប្រធាននាយកដ្ឋានឃោសនាមជ្ឈិមនៃគណបក្សកុម្មុយនិស្ដវៀតណាម។
លោក វ៉ូ វ៉ាន់ធឿង ក៏ត្រូវបានគេចាត់ទុកផងដែរថាជា មនុស្សដែលមានទំនាក់ទំនងយ៉ាងជិតស្និទ្ធ ជាមួយអគ្គលេខាធិការបក្សគឺលោក ង្វៀន ហ្វូជុង (Nguyen Phu Trong) ដែលជាបុគ្គលមាន អំណាចបំផុត នៅក្នុងប្រទេសវៀតណាម។
លោក ង្វៀន ហ្វូជុង នេះហើយ គឺជាអ្នកផ្តួចផ្តើមឡើងនូវយុទ្ធនាការបោសសំអាតអំពើពុករលួយដ៏តឹងរ៉ឹង ដែលកន្លងមកនេះបានមើលឃើញមន្រ្តីវៀតណាមខ្ទង់រាប់រយនាក់ ត្រូវប្រឈមការស៉ើបអង្កេត និងទទួលពិន័យ ខណៈជាច្រើននាក់បានបាត់អស់តំណែង ដែលក្នុងនោះរួមមានទាំង អតីតប្រធានាធិបតីលោក ង្វៀន សួនហ្វុក (Nguyen Xuan Phuc) ហើយនិងអតីតឧបនាយករដ្ឋមន្រ្តី២រូប។
នៅក្នុងប្រទេសវៀតណាម ប្រធានាធិបតីមានតួនាទីជាប្រមុខរដ្ឋ ប៉ុន្តែមិនមែនជាប្រមុខរដ្ឋាភិបាលនោះឡើយ។ តំណែងនេះស្ថិតក្នុងចំណោម មុខតំណែងនយោបាយកំពូលៗទាំង៤ របស់ប្រទេសវៀតណាម ដោយមុខតំណែង៣ទៀតគឺ អគ្គលេខាធិការបក្សកុម្មុយនិស្ត នាយករដ្ឋមន្រ្តី ហើយនិងប្រធានសភា៕ ដោយ៖ ធីរីណា
រូបថត ៖ VOV.VN
