សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ កម្លាំងសមត្ថកិច្ចជំនាញ នៃស្នងការដ្ឋាននគរបាលខេត្តបាត់ដំបង បានបង្ហាញមុខសញ្ញាលួចម៉ូតូម្នាក់នៅក្រុងបាត់ដំបង ជាសាធារណៈ ក្រោយឃាត់ខ្លួនយកមកសាកសួររហូតបញ្ចប់នីតិវិធី និងត្រៀមបញ្ជូនខ្លួនទៅកាន់សាលាដំបូងខេត្តដេីម្បីចាត់ការតាមច្បាប់។ នេះបេីយោងតាមប្រភពព័ត៌មានពីរបាយការណ៍របស់អគ្គស្នងការដ្ឋាននគរបាលជាតិ បានឱ្យដឹងនៅព្រឹកថ្ងៃសុក្រទី០៣ ខែមីនា ឆ្នាំ២០២៣។
របាយការណ៍ដដែលបន្តថា ករណីឃាត់ខ្លួនជនសង្ស័យខាងលេីនេះបានធ្វេីឡេីងកាលពីយប់ថ្ងៃទី០១ ខែមីនា ឆ្នាំ២០២៣ថ្មីៗនេះ នៅចំណុចភូមិអូរតាគាំ៣ សង្កាត់ទួលតាឯក ក្រុងបាត់ដំបង ខេត្តបាត់ដំបង។
ប្រភពដដែលបានឱ្យដឹងទៀតថា ក្នុងប្រតិបត្តិការនោះដោយមានការសម្របសម្រួលលេីនីតិវិធីពីលោក កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង លោកវរសេនីយ៍ឯក ឈឿង គឹមសុង នាយការរិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំងក្រុមអន្តរាគមន៍បង្ការ បង្ក្រាប ចុះប្រតិបត្តិការបង្ក្រាបករណីលួចមានស្ថានទម្ងន់ទោស ( កាត់តខ្សែភ្លេីងលួចយកម៉ូតូ )០១ករណីនិងបានធ្វេីការនាំខ្លួនជនសង្ស័យ០១នាក់ឈ្មោះ ណាត ស៊ីណាន់ ហៅ ប៊ី ខ្លឹម ភេទប្រុស អាយុ២០ ឆ្នាំ មានទីលំនៅភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង មកកាន់ស្នងការដ្ឋាន ។
-វត្ថុតាងដកហូតរួមមាន ៖
- ម៉ូតូ ០១ គ្រឿង ម៉ាក HONDA ZOOMER-X ពណ៌ សក្រហម ស៊េរីឆ្នាំ ២០១៧ លេខតួ 5158346 លេខម៉ាស៊ីន 0158346 ពាក់ស្លាកលេខ បាត់ដំបង 1Y-6864។
សូមជម្រាបជូនថា មូលហេតុដែលនាំទៅដល់ការឃាត់ខ្លួននេះគឺនៅថ្ងៃទី០១ ខែមីនា ឆ្នាំ២០២៣ វេលាម៉ោងប្រមាណ ១៩និង០០ នាទី នៅចំណុចភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង ជនសង្ស័យខាងលេីបានធ្វេីសកម្មភាពជិះម៉ូតូឌុបចេញពីម្តុំស្ថានីយរថភ្លើង ក្នុងគោលបំណងទៅផ្ទះរបស់ម្តាយនៅភូមិអង់ សង្កាត់អូរចារ លុះពេលទៅដល់ចំណុចកេីតហេតុខាងលេី ដោយឃេីញម៉ូតូដូចភិនភាគខាងលើរបស់ជនរងគ្រោះឈ្មោះ នាង លេក ភេទស្រី អាយុ២៥ឆ្នាំ មានទីលំនៅភូមិព្រែកឆ្តោ ឃុំពាមឯក ស្រុកឯកភ្នំ ខេត្តបាត់ដំបង មុខរបរលក់ដូរទុកនៅខាងមុខផ្ទះ មិនមានម្ចាស់ ជនសង្ស័យខាងលេីក៏បានដេីរចូលទៅទាញផ្តាច់ខ្សែភ្លេីង ហេីយរុំតភ្ជាប់រួចជិះគេចខ្លួនបាត់ទៅ ។
នៅពេលកើតហេតុជនរងគ្រោះបានប្តឹងមកសមត្ថកិច្ចនគរបាល ហើយឆ្លងតាមរយ:ការស្រាវជ្រាវសមត្ថកិច្ចកំណត់មុខសញ្ញាបាននិងឈានដល់ការឃាត់ខ្លួនតែម្តង។
បច្ចុប្បន្នការិយាល័យជំនាញត្រៀមបញ្ជូនខ្លួនជនសង្ស័យទៅសាលាដំបូងខេត្តបាត់ដំបង ដេីម្បីចាត់ការតាមច្បាប់ រីឯម៉ូតូបានប្រគល់ជូននរងគ្រោះវិញ៕
ដោយ៖ អរុណរះ
