សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ ៖ ដេីម្បីទប់ស្កាត់រាល់បទល្មេីសប្រើប្រាស់ ជួញដូរគ្រឿងញៀន និងអំពើជួញដូរមនុស្ស មន្រ្តីជំនាញនៃស្នងការនគរបាលខេត្តព្រះសីហនុ បានបន្តចុះផ្សព្វផ្សាយតាមបណ្តាក្លឹបកម្សាន្ត និងខារ៉ាអូខេ នៅក្នុងក្រុងព្រះសីហនុ។
ក្នុងប្រតិបត្តិការនោះ បានធ្វេីឡេីងកាលពីរសៀលថ្ងៃទី០២ ខែមីនា ឆ្នាំ២០២៣ម្សិលមិញនេះ ដោយមានការចង្អុលបង្ហាញពីសំណាក់ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងការិយាល័យនគរបាលប្រឆាំងបទល្មើសគ្រឿងញៀន និងកម្លាំងការិយាល័យនគរបាលប្រឆាំងការជួញដូរមនុស្ស និងការពារអនីតិជន សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់លេខ៤ បានចុះផ្សព្វផ្សាយ អំពីផលប៉ះពាល់នៃការប្រើប្រាស់ និងជួញដូរគ្រឿងញៀន និងអំពើជួញដូរមនុស្ស ជួញដូរពលកម្ម និងអាជីវកម្មផ្លូវភេទ នៅតាមបណ្តាក្លឹបកំសាន្ត និងខារ៉ាអូខេ នៅក្នុងក្រុងព្រះសីហនុ។
ជាមួយគ្នានោះ នាពេលរាត្រីកម្លាំងអន្តរាគមន៍ពិសេស សហការជាមួយកម្លាំងនាយកដ្ឋានការពារព្រំដែនទឹក និងកម្លាំងនគរបាលព្រហ្មទណ្ឌ ចេញល្បាតចល័ត ក្នុងភូមិសាស្រ្តស្មុកស្មាញ និងតាមឆ្នេរ ក្នុងខេត្តព្រះសីហនុ ដើម្បីការពារ ប្រជាពលរដ្ឋ និងភ្ញៀវទេសចរណ៍ជាតិ និងអន្តរជាតិ។
ដោយឡែកកម្លាំងនគរបាលទេសចរណ៍ប្រចាំការ ក៏បានចុះល្បាតនាពេលយប់ ដើម្បីការពារសន្តិសុខ សុវត្ថិភាព ជូនភ្ញៀវទេសចរណ៍ជាតិ អន្តរជាតិ និងប្រជាពលរដ្ឋ មកលេងកម្សាន្តតាមឆ្នេរផងដែរ៕
ដោយ៖ សហការី
