ម៉ូតូនិងម៉ូតូពន្លះគ្នាពេញទំហឹងបណ្ដាលឱ្យយុវជនម្នាក់ស្លាប់និងម្នាក់ទៀតរបួសធ្ងន់

ខេត្តកណ្ដាល៖ មានហេតុការណ៍គ្រោះថ្នាក់ចរាចរណ៍រវាងម៉ូតូនិងម៉ូតូពន្លះគ្នាពេញមួយទំហឹង បណ្ដាលឲ្យយុវជនម្នាក់ស្លាប់ រីឯម្នាក់ទៀតរងរបួសធ្ងន់ នៅថ្ងៃទី០២​ ខែមីនា ឆ្នាំ​២០២៣​  វេលាម៉ោង២០និង១០នាទី នៅចំណុច ផ្លូវ៣៤ ក្នុងភូមិបាង ឃុំដើមឬស ស្រុកកណ្ដាលស្ទឹង ខេត្ត កណ្ដាល។

    មន្ត្រីនគរបាលចរាចរណ៍ស្រុកកណ្ដាលស្ទឹងបានឱ្យដឹងថា ជនរងគ្រោះឈ្មោះ ទូច សុខធិក   ភេទប្រុស អាយុ​១៨ឆ្នាំ រស់នៅភូមិបាង ឃុំដើមឬស ស្រុកកណ្ដាលស្ទឹងខេត្តកណ្ដាល (បានស្លាប់នៅពេលបញ្ជូនទៅមន្ទីរពេទ្យ)បើកបរម៉ូតូម៉ាកហុងដាឌ្រីម  C១២៥ ពណ៌ ខ្មៅ ពាក់ស្លាកលេខ ភ្នំពេញ ១AN- ៤០៣៤ មានអ្នករួមដំណើរម្នាក់ឈ្មោះ បូរ សំនៀង ភេទប្រុស អាយុ​១៥ឆ្នាំ រស់នៅភូមិ.ឃុំជាមួយគ្នា(របួសធ្ងន់)។ ចំណែកភាគីម៉ូតូម្ខាងទៀតម៉ាកសង់កូរ៉េ​ សេ១០០ ពណ៌​ក្រហម ពាក់ស្លាកលេខ គ ៥៩៨២ កណ១ បើកបរដោយឈ្មោះ​ អង ទូច ភេទប្រុស អាយុ៣៨ ឆ្នាំ(ឃាត់ខ្លួន) រស់នៅភូមិបាង ឃុំដើមឬស ស្រុក កណ្ដាលស្ទឹង ខេត្តកណ្ដាល(រងរបួសស្រាល)។

   ប្រភពដដែលបន្តថា  នៅវេលាម៉ោងកើតហេតុ គេបានឃើញម៉ូតូម៉ាកហុងដាឌ្រីម ជិះគ្នា២នាក់ ធ្វើដំណើរតាមបណ្ដោយផ្លូវលេខ៣៤ បើកបរក្នុងទឹសដៅពី(លិចមកកើត) ពេលមកដល់ចំណុចកើតហេតុខាងលើបានបុកនឹងម៉ូតូ១គ្រឿងម៉ាកសង់កូរ៉េ​ ដែលឆ្លងផ្លូវក្នុងទឹសដៅពី( ជើងទៅត្បូង​) បណ្ដាលឲ្យជនរងគ្រោះជាអ្នកបើកបរម៉ូតូហុងដាឌ្រីម ស្លាប់ម្នាក់ រីឯម្នាក់ទៀតរងរបួសធ្ងន់។

    ចំពោះវត្ថុតាងម៉ូតូទាំងពីរគ្រឿងបានយកមករក្សាទុកនៅអធិការដ្ឋានជាបណ្ដោះអាសន្ន។​

   តាមការសន្និដ្ឋាន ករណីនេះបង្កឡើងដោយអ្នកបើកបរម៉ូតូម៉ាកសង់កូរ៉េ​មិនមានភ្លើងបំភ្លឺ ឆ្លងផ្លូវមិនមើលឆ្វេង ស្ដាំឱ្យបានច្បាស់លាស់ ខ្វះការប្រុងប្រយ័ត្ន​។​

ចំណែកអ្នកបើកបរម៉ូតូសង់សេ១២៥ បើកបរ​ក្នុងល្បឿនលឿន ខ្វះការប្រុងប្រយ័ត្ន​៕

ដោយ៖ ស្អាង ជ័យ