បុរសម្នាក់រងរបួសធ្ងន់ខណៈជួបគ្រោះថ្នាក់ចរាចរណ៍រវាងរថយន្តពីរគ្រឿងបុកគ្នា

ខេត្តកំពង់ស្ពឺ៖ បុរសម្នាក់បានរងរបួសធ្ងន់បន្ទាប់ពីរថយន្តពីរគ្រឿងបុកគ្នានៅតាមបណ្តោយផ្លូវជាតិលេខ៤ត្រង់ចន្លោះគីឡូម៉ែត្រលេខ៣៤-៣៥ក្នុងភូមិសង្គ្រោះជាតិ ឃុំត្រពាំងគង ស្រុកសំរោងទង ខេត្តកំពង់ស្ពឺ កាលពីវេលាម៉ោង៩៖៥២នាទីយប់ថ្ងៃទី៨ខែមីនាឆ្នាំ២០២៣។

    នគរបាលមូលដ្ឋានបានឱ្យដឹងថា មុនកើតហេតុគេឃើញរថយន្តមួយគ្រឿងម៉ាក HYUNDAI ពណ៌ស ពាក់ស្លាកលេខភ្នំពេញ 3F-9417 សណ្តោងរ៉ឺម៉កពាក់ស្លាកលេខភ្នំពេញ 4A-9686 បើកបរដោយឈ្មោះ ម៉ក់ សុខអាន ភេទប្រុស អាយុ ៤២ឆ្នាំ រស់នៅភូមិព្រៃខ្លា ឃុំជំរះពេន ស្រុកសំរោង ខេត្តតាកែវ ក្នុងទិសដៅពីលិចទៅកើត លុះមកដល់ចំណុចខាងលើក៏មានរថយន្តមួយគ្រឿងម៉ាក FUSO ពណ៌ខៀវ ពាក់ស្លាកលេខភ្នំពេញ 3B-5509 សណ្តោងរ៉ឺម៉កពាក់ស្លាកលេខព្រះសីហនុ 4A-0939 

មិនស្គាល់អត្តសញ្ញាណអ្នកបើកបរ (រត់គេច ក្រោយពេលកើតហេតុ) ដែលកំពុងបើកបរបញ្រ្ចាសទិសគ្នាដោយអ្នកបើកបរខ្វះការប្រុងប្រយ័ត្នក៏ជ្រុលទៅបុកគ្នាពេញទំហឹងតែម្តង។ 

    ប្រភពបានបន្តទៀតថា ជនរងគ្រោះត្រូវបានមន្ត្រីជំនាញនាំគ្នាគាស់យកជនរងគ្រោះទៅសង្គ្រោះនៅឯមន្ទីរពេទ្យបង្អែកខេត្តកំពង់ស្ពឺ។

    ចំពោះវត្ថុតាងរថយន្តទាំងពីរគ្រឿងមន្ត្រីជំនាញបានយកមករក្សាទុកនៅអធិការដ្ឋាននគរបាលស្រុកសំរោងទងរង់ចាំដោះស្រាយនៅពេលក្រោយ ៕

ដោយ៖ចន្ទ លីហ្សា