សារព័ត៌មាន នគរវត្ត តែងតែនាំមុខគេជានិច្ច
ក្រសួងការពារជាតិរុស្ស៊ីបាននិយាយនៅ ថ្ងៃទី ៩ ខែមីនា ថាកងកម្លាំងរបស់ខ្លួនបានបើកការវាយប្រហារដោយមីស៊ីលដ៏ធំមួយទៅលើហេដ្ឋារចនាសម្ព័ន្ធយោធារបស់អ៊ុយក្រែនក្នុងការសងសឹកចំពោះការវាយប្រហាររបស់ទីក្រុងគៀវទៅលើតំបន់ព្រំដែន Bryansk ។
យោងតាមទីភ្នាក់ងារសារព័ត៌មាន RT ក្រសួងការពារជាតិរុស្ស៊ីបាននិយាយថា គោលដៅដែលបានកំណត់ទាំងអស់ត្រូវបានវាយប្រហារ។ ការវាយប្រហារបានប្រើប្រាស់អាវុធរយៈចម្ងាយឆ្ងាយដែលមានភាពជាក់លាក់ខ្ពស់ អាវុធនៅលើដី និងសមុទ្រ រួមទាំងមីស៊ីលល្បឿនលឿន Kinzhal ដែលហោះបានចម្ងាយជាង ២,០០០ គីឡូម៉ែត្រ។
ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍មួយថា “ការវាយប្រហារសងសឹកទ្រង់ទ្រាយធំបានវាយប្រហារផ្នែកសំខាន់ៗនៃហេដ្ឋារចនាសម្ព័ន្ធយោធារបស់អ៊ុយក្រែន អគារឧស្សាហកម្មការពារជាតិ ក៏ដូចជាកន្លែងថាមពល។ បេសកកម្មបានសម្រេច គោលដៅទាំងអស់ ។
ក្រសួងបានបន្ថែមថា ការវាយប្រហារបានបំផ្លាញមូលដ្ឋានយន្តហោះគ្មានមនុស្សបើក រំខានដល់ការដឹកជញ្ជូនអាវុធបម្រុងរបស់អ៊ុយក្រែន និងអាវុធបរទេស។ លើសពីនេះទៀត វាបានបិទកន្លែងប្រើប្រាស់សម្រាប់ជួសជុលឧបករណ៍យោធាអ៊ុយក្រែន និងផលិតគ្រាប់រំសេវ។
ការសងសឹករបស់រុស្ស៊ីកើតឡើងបន្ទាប់ពីអ៊ុយក្រែនបានវាយឆ្មក់តំបន់ Bryansk នៅតាមព្រំដែនរុស្ស៊ី-អ៊ុយក្រែន កាលពីថ្ងៃទី ២ ខែមីនា ដោយបានសម្លាប់អ្នកស្រុកពីរនាក់ និងក្មេងប្រុសអាយុ ១០ ឆ្នាំម្នាក់រងរបួស។ ប្រធានាធិបតីរុស្ស៊ីលោក ពូទីន បានថ្កោលទោសយ៉ាងខ្លាំងចំពោះឧប្បត្តិហេតុនេះ។ អ្នកស្ម័គ្រចិត្តរុស្ស៊ីដែលមានមូលដ្ឋាននៅអ៊ុយក្រែនបានអះអាងទទួលខុសត្រូវចំពោះការវាយឆ្មក់ Bryansk ។
នៅថ្ងៃទី៩ខែមីនា មន្ត្រីអ៊ុយក្រែនបាននិយាយថា រុស្ស៊ីបានបើកការវាយប្រហារដោយកាំជ្រួចទ្រង់ទ្រាយធំទៅលើរោងចក្រថាមពលនៅទូទាំងប្រទេស ដែលបណ្តាលឱ្យដាច់ចរន្តអគ្គិសនីនៅក្នុងទីក្រុងជាច្រើន រួមទាំងរដ្ឋធានី Kiev ផងដែរ។ ឧត្តមសេនីយ Valery Zaluzhny – អគ្គមេបញ្ជាការនៃកងកម្លាំងប្រដាប់អាវុធអ៊ុយក្រែនបាននិយាយថា រុស្ស៊ីបានបាញ់មីស៊ីលចំនួន ៨០ គ្រាប់ចូលអ៊ុយក្រែនក្នុងមួយថ្ងៃ៕ ដោយ៖ ធីរីណា
រូបថត ៖ RT
