សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចអគ្គមហាសនាបតីតេជោ ហ៊ុន សែន និងជាប្រធាន គណបក្សប្រជាជនកម្ពុជា តែងតែដើរជួរមុខ ក្នុងកិច្ចការពារអាយុជីវិតប្រជាពលរដ្ឋ។ ជាក់ស្តែង ខណៈប្រទេសកម្ពុជា កំពុងប្រឈមជាមួយជំងឺកូវីដ-១៩ សម្តេចបានស្វះ ស្វែងរកវ៉ាក់សាំងមកចាក់ជូនប្រជាពលរដ្ឋ រហូតទប់ស្កាត់នូវការរាតត្បាតជំងឺដ៏សាហាវ នេះ បានជោគជ័យ និងធ្វើឱ្យប្រទេសកម្ពុជា ជាប់ចំណាត់ថ្នាក់លេខ១ នៅអាស៊ាន និងលេខ២ ក្នុងពិភពលោក ។ បន្ថែមពីនេះ សម្តេចតេជោ នៅបានសាងសង់មន្ទីរពេទ្យជាតិ តេជោសន្ដិភាពដ៏ធំមួយ ស្ថិតនៅភូមិកប់ស្រូវធំ សង្កាត់គោករកា ខណ្ឌព្រែកព្នៅ រាជធានីភ្នំពេញ ដែលមានសមត្ថភាព ទទួលអ្នកជំងឺបានជាង ១ ម៉ឺនគ្រែ ថែមទៀត។
លោក ឃួង ស្រេង សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានគណៈកម្មាធិការគណបក្ស រាជធានីភ្នំពេញ បានបញ្ជាក់បែបនេះ ក្នុងពិធីប្រកាសបញ្ចូលសមាជិក គណបក្សប្រជាជនកម្ពុជា ក្នុងខណ្ឌដូនពេញ ចំនួន២.៧៦៩ នាក់ នៅវិមាន៧ មករា នាព្រឹកថ្ងៃទី១២ ខែមីនា ឆ្នាំ២០២៣នេះ ។
លោក ឃួង ស្រេង ក៏បានមានប្រសាសន៍លើកឡើងពីវីរៈភាព របស់សម្តេចតេជោ ហ៊ុន សែន ដែលបានលះបង់គ្រប់បែបយ៉ាង ទាំងយុវភាព និង អាយុជីវិត ដើម្បីរំដោះប្រទេសជាតិ ចេញពីរបបប៉ុល ពត និងបានស្តារប្រទេសជាតិ ចេញពីចំណុចសូន្យ និងបានអភិវឌ្ឍន៍ប្រទេសជាតិ ឱ្យមានការរីកចំរើន រហូតមកដល់ បច្ចុប្បន្ននេះ។ បន្ថែមពីនេះ លោកក៏បានលើកឡើង ពីទុក្ខវេទនារបស់ប្រជាពលរដ្ឋកម្ពុជា ក្នុងរបបប៉ុល ពត នោះផងដែរ ដោយក្នុងសម័យនោះ ប្រជាពលរដ្ឋ គ្មានអីហូបចុក គ្រប់គ្រាន់ និងការកាប់សម្លាប់ យ៉ាងព្រៃផ្សៃបំផុត នៃរបបនោះ។
លោកពិតជាអរគុណចំពោះការសម្រេចចិត្តរបស់ក្មួយៗ ។ ការសម្រេចចិត្តនេះ ជាការ សម្រេចចិត្តដ៏ត្រឹមត្រូវ ដោយសារតែក្មួយៗ បានមើលឃើញពីការយកចិត្តទុកដាក់ និងការលះបង់ដ៏ធំធេងរបស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ក្នុងបុព្វហេតុស្វែងរកសន្តិភាព និងការអភិវឌ្ឍជូនជាតិ ។ ដូច្នេះក្មួយៗ ត្រូវរួមគ្នាការពារ សន្តិភាពអោយបានគង់វង់ ។ មានសន្តិភាព ទើបមានឱកាសអភិវឌ្ឍប្រទេស ឱ្យរីកចំរើន ជឿនលឿនបាន ហើយដើម្បីការពារសន្តិភាពបាន មានតែបោះឆ្នោតជូនគណបក្ស ប្រជាជនកម្ពុជា។
លោកសូមឱ្យសមាជិកម្នាក់ ក្លាយជាសន្លឹកឆ្នោត ១សន្លឹក របស់គណបក្សប្រជាជន កម្ពុជា នៅពេលបោះឆ្នោត ២០២៣ ខាងមុខនេះ ដើម្បីយើងមានឱកាសកសាង អភិវឌ្ឍន៍ប្រទេស ឱ្យរីកចំរើនរុងរឿង បន្ថែមទៀត។ លោកសូមឱ្យបងប្អូន និងក្មួយៗ ទាំងអស់ ជួយផ្សព្វផ្សាយពីអំពើល្អរបស់ គណបក្សប្រជាជាជនកម្ពុជា ជូនទៅបងប្អូន សាច់ញាតិ និងអូសទាញពលរដ្ឋ ដែលដើរលើផ្លូវខុស មកចូលរួមជីវភាពជាមួយ បក្សប្រជាជនកម្ពុជាវិញ។
លោក ជា ខេមា ប្រធានគណៈកម្មាធិការគណបក្សប្រជាជនកម្ពុជា ខណ្ឌដូនពេញ បានបញ្ជាក់ឱ្យដឹងថាៈ សមាជិក សមាជិកាបក្ស ដែលចូលមកជា សមាជិកគណបក្សប្រជាជាជនកម្ពុជា ខណ្ឌដូនពេញ ថ្មីៗនេះ មានចំនួន ២.៧៦៩រូប ស្រីចំនួន ១.៣៩៣ រូប មកពី១១ សង្កាត់ នៅក្នុងមូលដ្ឋានខណ្ឌដូនពេញ ហើយត្រូវ បានប្រកាសបញ្ជូលជាសមាជិកគណបក្សជាផ្លូវការ នៅថ្ងៃនេះ៕
ដោយ ៖ សំរិត
