សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ នៅព្រឹកថ្ងៃចន្ទទី១៣ ខែមីនា ឆ្នាំ២០២៣នេះ បានឱ្យដឹងថា កម្លាំងការិយាល័យនគរបាលប្រឆាំងបទល្មើសគ្រឿងញៀន បានចុះបង្ក្រាបករណីគ្រឿងញៀនគិតពីថ្ងៃទី០៤ ដល់ថ្ងៃទី១០ ខែមីនា ឆ្នាំ២០២៣ បានចំនួន ៣ករណី ឃាត់ខ្លួនជនសង្ស័យបានចំនួន០៤នាក់ ជនជាតិខ្មែរ ដកហូតវត្ថុតាងរួមមាន ម្សៅក្រាមមេតំហ្វេតាមីនទឹកកក (ICE) ចំនួន ០៣កញ្ចប់ ទម្ងន់ ២០ក្រាម (ទម្ងន់សុទ្ធ) ថ្នាំញៀនប្រភេទកេតាមីន (K) ចំនួន ០២កញ្ចប់ ទម្ងន់ ៣,១៦ក្រាម (ទម្ងន់សុទ្ធ) និងទូរស័ព្ទដៃចំនួន០៤គ្រឿង។
លោកស្នងការខេត្ត បានបន្ថែមថា បច្ចុប្បន្នជនសង្ស័យទាំងអស់នោះ ត្រូវបានកម្លាំងសមត្ថកិច្ចជំនាញកំពុងត្រៀមខ្លួនបញ្ជូនទៅកាន់សាលាដំបូងខេត្ត ដើម្បីចាត់ការតាមនីតិវិធីច្បាប់។
សូមជម្រាបជូនថា លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ជាប្រចាំតែងតែចាត់ឱ្យកម្លាំងការិយាល័យនគរបាលប្រឆាំងបទល្មើសគ្រឿងញៀន និងកម្លាំងការិយាល័យនគរបាលប្រឆាំងការជួញដូរមនុស្ស និងការពារអនីតិជន សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ក្នុងមូលដ្ឋានក្រុងព្រះសីហនុ បន្តចុះផ្សព្វផ្សាយ អំពីផលប៉ះពាល់នៃការប្រើប្រាស់ និងជួញដូរគ្រឿងញៀន និងអំពើជួញដូរមនុស្ស ជួញដូរពលកម្ម និងអាជីវកម្មផ្លូវភេទ នៅតាមបណ្តាក្លឹបកំសាន្ត និងខារ៉ាអូខេ នៅក្នុងក្រុងព្រះសីហនុ។
ដោយឡែកនាពេលរាត្រី កម្លាំងអន្តរាគមន៍ពិសេស សហការជាមួយកម្លាំងនាយកដ្ឋានការពារព្រំដែនទឹក ចេញល្បាតចល័ត ក្នុងភូមិសាស្រ្តស្មុកស្មាញ និងតាមឆ្នេរ ក្នុងខេត្តព្រះសីហនុ ដើម្បីការពារ ប្រជាពលរដ្ឋ និងភ្ញៀវទេសចរណ៍ជាតិ និងអន្តរជាតិផងដែរ៕
ដោយ៖ សហការី
