សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ដេីម្បីកាត់បន្ថយករណីគ្រោះថ្នាក់ចរាចរនៅតាមដងផ្លូវជាយថាហេតុ កម្លាំងចម្រុះស្នងការដ្ឋាននគរបាលខេត្តព្រះសីហនុ បន្តចុះរឹតបន្តឹងច្បាប់ស្តីពីចរាចរណ៍ផ្លូវគោក អ្នកបើកបរយានយន្តប្រភេទធុនធំរកសារធាតុញៀន និងជាតិស្រវឹង។
ជាក់ស្ដែងដោយមានការចង្អុលបង្ហាញពីសំណាក់ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងការិយាល័យនគរបាលចរាចរណ៍ផ្លូវគោក សហការជាមួយកម្លាំងការិយាល័យប្រឆាំងបទល្មើសគ្រឿងញៀន នៅព្រឹកថ្ងៃព្រហស្បតិ៍ ១០រោច ខែផល្គុន ឆ្នាំខាល ចត្វាស័ក ពស ២៥៦៦ ត្រូវនឹងថ្ងៃទី១៦ ខែមីនា ឆ្នាំ២០២៣ បានចុះរឹតបន្តឹងច្បាប់ស្តីពីចរាចរណ៍ផ្លូវគោក ត្រួតពិនិត្យជាតិស្រវឹងអ្នកបើកបរយានយន្ត ត្រួតពិនិត្យលក្ខណៈបច្ចេកទេសយានយន្ត ត្រួតពិនិត្យល្បឿន និងត្រួតពិនិត្យរកសារធាតុញៀនអ្នកបើកបររថយន្ត ដេីម្បីកាត់បន្ថយការគ្រោះថ្នាក់ចរាចរណ៍កេីតឡេីងជាយថាហេតុ នៅលើកំណាត់ផ្លូវជាតិលេខ៤ គីឡូម៉ែត្រលេខ២២០ ស្ថិតនៅភូមិ១ សង្កាត់១ ក្រុង-ខេត្តព្រះសីហនុ។
ជាលទ្ធផលក្នុងប្រតិបត្តិការនោះ កម្លាំងនគរបាលខេត្តពុំរកឃេីញអ្នកបេីកបរទាំងនោះគ្មានសារធាតុញៀន ឬពិសាគ្រឿងស្រវឹងនោះឡេីយ។
សូមជម្រាបថា ជារៀងរាល់ថ្ងៃ កម្លាំងសមត្ថកិច្ចចរាចរណ៍ទូទាំងខេត្តព្រះសីហនុ តែងតែចុះសម្រួលចរាចរណ៍ជូនសិស្សានុសិស្ស នៅតាមសាលារៀននានាផងដែរ៕
ដោយ៖ សហការី
