សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ប្រជាពលរដ្ឋរស់នៅភូមិគគីរ ឃុំត្រស់បានឱ្យដឹងថា មានក្រុមឈ្មួញបានដើរប្រមូលទិញដើមឫស្សីពីងពង់ និងដើមអាកាស្យាពីប្រជាពលរដ្ឋក្នុងស្រុករមាសហែកដឹកឆ្លងដែនទៅប្រទេសវៀតណាមតាមប៉ុស្តិ៍ច្រករបៀងខ្សែដែកស្ថិតនៅឃុំត្រស់ ស្រុករមាសហែក។
ប្រជាពលរដ្ឋបានលើកឡើងបន្តថា ដើមឫស្សីពីងពង់ក្នុង១ដើមខ្នាតតូចលេខ៣ លក់បានតម្លៃ២,០០០រៀល, ខ្នាតមធ្យមលេខ២ក្នុង១ដើមតម្លៃ ៣៥០០រៀល និងខ្នាតលេខ១ក្នុង១ដើមតម្លៃ៤,៦០០រៀល។ មិនត្រឹមតែប៉ុណ្ណោះក្នុង១គ្រួសារគឺកាប់ម្តង១០០ដើមទៅ២០០ដើម ហើយប្រជាពលរដ្ឋដែលដាំឫស្សីពីងពង់ច្រើនគឺនៅស្រុករមាសហែកនិងស្រុកស្វាយជ្រំ។
តាមក្រុមឈ្មួញបានប្រាប់ឱ្យដឹងថា ដើមឫស្សីពីងពង់គេប្រមូលទិញយកទៅផ្គត់ផ្គង់ឱ្យសិប្បកម្មធ្វើគ្រឿងសង្ហារឹមនៅក្នុងខេត្តតៃនិញ ប្រទេសវៀតណាម ចំណែកដើមអាកាស្យាវិញ មានមេការខ្មែរ ជាអ្នកដើរម៉ៅពីចម្ការប្រជាពលរដ្ឋនិងមន្ត្រីជំនាញថ្នាក់លើ លក់បន្តឱ្យឈ្មួញវៀតណាមដែលគេដើរប្រមូលទិញនិងកាប់ផ្ទាល់តាមចម្ការ (តម្លៃម៉ៅគិតតាមចម្ការតូចឬធំ) ដោយដើមអាកាស្យាទាំងនេះក៏យកទៅលក់ឱ្យរោងសិប្បកម្មកែច្នៃធ្វើគ្រឿងសង្ហារឹមដែរ។
ពាក់ព័ន្ឌករណីខាងលើនេះដែរ លោកស៊ូ ម៉ុល អភិបាលស្រុករមាសហែកបានអោយដឹងនៅព្រឹកថ្ងៃទី២០ខែមីនាឆ្នាំ២០២៣ថា ពិតជាមានក្រុមឈ្មួញបានដើរប្រមូលទិញដើមឫស្សីពីងពង់ប្រាកដមែន ដោយសាររដូវនេះជារដូវប្រមូលផលក្នុងការដាំដើមនេះ ខណៈដែលបងប្អូនប្រជាពលរដ្ឋមានដីទំនេរ ហើយបាននាំគ្នាដាំនៅក្នុងសហគមន៍របស់ខ្លួនដើម្បីដោះស្រាយជីវភាពគ្រួសារបានធូរមួយកម្រិតផងដែរ៕
ដោយ៖ សុថាន
