សារព័ត៌មាន នគរវត្ត តែងតែនាំមុខគេជានិច្ច
ក្រុមហ៊ុន Nokia កំពុងរៀបចំដាក់ឱ្យដំណើរការបណ្តាញទូរស័ព្ទចល័ត 4G នៅលើឋានព្រះច័ន្ទនៅចុងឆ្នាំនេះ ដើម្បីជួយកិច្ចការងាររុករកនៅ ឋានព្រះច័ន្ទក៏ដូចជាជួយត្រួសត្រាយផ្លូវឲ្យមាន វត្តមានមនុស្សនៅលើភពផ្កាយរណប។
លោក Luis Maestro Ruiz De Temino វិស្វកររបស់ក្រុមហ៊ុន Nokia បានប្រាប់អ្នកយកព័ត៌មានកាលពីដើមខែនេះនៅឯពិព័រណ៍ពាណិជ្ជកម្ម Mobile World Congress នៅទីក្រុងបាសេឡូណាថា ក្រុមទូរគមនាគមន៍ហ្វាំងឡង់ Nokia គ្រោងនឹងដាក់ដំណើរការបណ្តាញអុីនធើណេត 4G នៅលើរ៉ុក្កែត SpaceX ក្នុងរយៈពេលប៉ុន្មានខែខាងមុខនេះ។
តំណាងឲ្យខាងក្រុមហ៊ុនNokia ដដែលនេះនិយាយបន្តទៀតថា បច្ចេកវិទ្យានេះត្រូវបានរចនាឡើងដើម្បីទប់ទល់ធន់នឹងលក្ខខណ្ឌដ៏ធ្ងន់ធ្ងរនៃលំហអាកាស។
បណ្តាញអុីនធើណេតនឹងត្រូវបានប្រើនៅក្នុងបេសកកម្ម Artemis 1 របស់ Nasa ដែលមានគោលបំណងបញ្ជូនអវកាសយានិក ឱ្យដើរលើផ្ទៃព្រះច័ន្ទជាលើកដំបូង បើគិតចាប់តាំងពីឆ្នាំ 1972 ។
ក្រុមហ៊ុន Nokia បានបញ្ចាក់បន្ថែមថា គោលបំណងសំខាន់គឺដើម្បីបង្ហាញថាបណ្តាញអុីនធើណេត អាចបំពេញតម្រូវការទំនាក់ទំនងសម្រាប់បេសកកម្មអវកាសនាពេលអនាគត វានឹងអនុញ្ញាតឱ្យអវកាសយានិកធ្វើការទំនាក់ទំនងគ្នាទៅវិញទៅមក និងជាមួយនឹងការគ្រប់គ្រងបេសកកម្ម ក៏ដូចជាការគ្រប់គ្រងយានអវកាសពីចម្ងាយ និងចាក់ផ្សាយជាក់ស្ដែងដូចជាការផ្សាយផ្ទាល់ភ្លាមៗនូវរូបភាពនិងវីដេអូ ត្រឡប់ទៅផែនដីវិញ ៕ ដោយ៖ ភារៈ
ប្រភព៖(cnbc)
