អត្តពលិកអ៊ុយក្រែន២៦២នាក់ ស្លាប់នៅក្នុងសង្រ្គាមជាមួយរុស្ស៊ី

ចែករំលែក៖

ទីភ្នាក់ងារសារព័ត៌មាន AFP នៅថ្ងៃអាទិត្យទី២ ខែមេសា ឆ្នាំ២០២៣ បានដកស្រង់សម្តីរដ្ឋមន្ត្រីកីឡានៃប្រទេសអ៊ុយក្រែន លោក Vadym Huttsait ដែលបាននិយាយថាសង្រ្គាមឈ្លានពានរបស់រុស្ស៉ីប្រឆាំងនឹងអ៊ុយក្រែន បានផ្ដាច់យកជីវិតអត្តពលិកអ៊ុយក្រែន ២៦២នាក់ និងបានបំផ្លាញហេដ្ឋារចនាសម្ព័ន្ធកីឡា ៣៦៣កន្លែង។
លោក Huttsait ធ្វើការកត់សម្គាល់ខាងលើនៅក្នុងជំនួបជាមួយប្រធានសហព័ន្ធកីឡាកាយសម្ព័ន្ធអន្តរជាតិកាលពីថ្ងៃសៅរ៍ ទី១ ខែមេសា។ នៅក្នុងជំនួបនោះដែរ រដ្ឋមន្ត្រីកីឡាអ៊ុយក្រែនរូបនេះ បានទទូចថា អត្តពលិករុស្ស៉ីទាំងអស់មិនគួរត្រូវបានអនុញ្ញាតឱ្យចូលរួមក្នុងព្រឹត្តិការណ៍កីឡាអូឡាំពិក ឬកីឡាប្រកួតប្រជែងដទៃទៀតនោះទេ។ លោក Huttsait បានបញ្ជាក់ដូច្នេះថា «ពួកគេ (អត្តពលិករុស្ស៉ី) បានគាំទ្រសង្រ្គាមមួយនេះ ហើយបានចូលរួមក្នុងព្រឹត្តិការណ៍ជាច្រើនដែលរៀបចំឡើងជាការបង្ហាញការគាំទ្រដល់សង្រ្គាមនេះ»។
គណៈកម្មាធិការអូឡាំពិកអន្តរជាតិ កាលពីពេលថ្មីៗនេះបានផ្ដល់អនុសាសន៍សម្រាប់ការអនុញ្ញាតឱ្យអត្តពលិករុស្ស៉ីនិងបេឡារុស អាចចូលរួមក្នុងព្រឹត្តិការណ៍កីឡាអន្តរជាតិឡើងវិញបន្តិចម្ដងៗ។ ប៉ុន្តែមិនទាន់មានការសម្រេចចិត្តណាមួយលើការអនុញ្ញាត្តឱ្យអត្តពលិកនៃប្រទេសទាំង២ចូលរួមក្នុងព្រឹត្តិការណ៍កីឡាអូឡាំពិកទីក្រុងប៉ារីស នៅឆ្នាំ២០២៤ ដែរឬ ក៏យ៉ាងណានោះទេ។

ចំណែកឯខាងអ៊ុយក្រែនវិញបញ្ជាក់ថា អត្តពលិករបស់ខ្លួននឹងមិនត្រូវបានអនុញ្ញាតឱ្យចូលរួមក្នុងព្រឹត្តិការណ៍នេះទេ ប្រសិនបើពួកគេត្រូវប្រកួតជាមួយអត្តពលិករុស្ស៉ី ហើយដែលការសម្រេចចិត្តនេះរងការរិះគន់ពីគណៈកម្មាធិការអូឡាពិកអន្តរជាតិ៕ ដោយ៖ ធីរីណា