សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់ ៖ ឧបករណ៍ឆក់ត្រីជាច្រើនគ្រឿងត្រូវបានសមត្ថកិច្ច នគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តពោធិ៍សាត់ ធ្វើការរឹបអូសខណៈក្រុមជនប្រព្រឹត្តលោតទឹកគេចខ្លួន ។
ករណីបង្រ្កាបបទល្មើសនេសាទរឹបអូសវត្ថុតាងឯជនប្រព្រឹត្តរត់គេចខ្លួននេះ ធ្វើឡើងនាថ្ងៃសៅរ៍ ៣រោច ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី៨ ខែមេសា ឆ្នាំ២០២៣ ត្រង់ចំណុចព្រែកដីរនាត(បឹងទន្លេសាប)ស្ថិតនៅភូមិដីរនាត ឃុំមេទឹក ស្រុកបាកាន ខេត្តពោធិ៍សាត់ ។
យោងរបាយការណ៍លោក វរសេនីយ៍ឯក សៀន វិរៈ នាយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តពោធិ៍សាត់ លទ្ធផល រឹបអូសឧបករណ៍ជាវត្ថុតាំងរួមមាន ៖ អាគុយចំនួន០៧គ្រឿង អាំវទ័រចំនួន០៣គ្រឿង ដងឆក់ចំនួន០៣គូ ចំណែកឯក្រុមជនប្រព្រឹត្តបានហក់ចូលទឹកគេចខ្លួន ។
របាយការណ៍នាយការិយាល័យដដែលសសេរទៀតថា ក្នុងនោះកម្លាំងលោកបានផ្សព្វផ្សាយប្រជានេសាទ នៅភូមិក្អមសំណ ឃុំមេទឹក ស្រុកបាកាន បញ្ឈប់ការនេសាទខុសច្បាប់ស្ដីពីជលផល ពិសេសប្រភេទឧបករណ៍រួមផ្សំ(ឆក់ត្រី)ដើម្បីជៀសផុតអំពីមានទោសដល់ខ្លួន ក្នុងអំឡុងការផ្សព្វផ្សាយនោះមានប្រជានេសាទ បានស្ម័គ្រចិត្តប្រគល់ឧបករណ៍(អាំងវទ័រចំនួន០២គ្រឿង ដងឆក់ចំនួន០២គូ ជូនសមត្ថកិច្ចនគរបាលយើង បច្ចុប្បន្ន វត្ថុតាងទាំងអស់រក្សាទុកបណ្ដោះអាសន្ន នៅស្នាក់ការសមត្ថកិច្ចនគរបាលប្រឆាំងបទល្មើសសេដ្ឋកិច្ច ៕
ដោយ៖ ប៉ឹម ពិន
