សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ជនសង្ស័យម្នាក់ត្រូវបានកម្លាំងសមត្ថកិច្ចឃាត់ខ្លួនបន្ទាប់ពីយកដំបងឈើជ្រុងវាយទៅលើលោកតាអាចារ្យម្នាក់បណ្តាលឲ្យស្លាប់ភ្លាមៗ។
ហេតុការណ៍នេះកើតឡើងនៅចំណុចផ្លូវលំក្នុងភូមិត្រពាំងឈូក ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ កាលពីព្រឹកថ្ងៃទី១៣ ខែមេសា ឆ្នាំ២០២៣។
លោកវរសេនីយ៍ឯក ចន សុភិត បានឲ្យដឹងថាជនសង្ស័យឈ្មោះមឿន សុផាត ភេទប្រុស អាយុ៣១ឆ្នាំ រស់នៅភូមិត្រពាំងឈូក ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ។
មុនពេលកើតហេតុជនសង្ស័យបានធ្វើសកម្មភាពយកដំបងឈើជ្រុងប្រវែង១ម៉ែត្រ១តឹក ទំហំប៉ិនកំភួនដៃ វាយទៅលើជនរងគ្រោះឈ្មោះ ស្រុះ សារឿន ភេទប្រុស អាយុ៦៨ឆ្នាំ រស់នៅភូមិត្រពាំងឈូក ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ មុខរបរអាចារ្យវត្ត ចំនួន៣ដំបង ត្រូវចំក្រោមថ្ងាស និងក្បាល បណ្ដាលឲ្យស្លាប់ភ្លាមៗនៅនឹងកន្លែង។
លោកបានបន្តថាក្រោយពីកើតហេតុកម្លាំងជំនាញចុះទៅឃាត់ខ្លួនជនសង្ស័យបានភ្លាមៗនិងបានសាកសួរជនសង្ស័យបានសារភាពថាខ្លួនពិតជាបានវាយសម្លាប់ជនរងគ្រោះពិតមែន មូលហេតុដោយសារខឹងជនរងគ្រោះ ចេះអំពើអាបធ្មប់(ផ្លូវងងឹត)។
បច្ចុប្បន្នជនសង្ស័យបាននាំមកកាន់អធិការដ្ឋាននគរបាលស្រុកបសេដ្ឋ ដើម្បីចាត់ការបន្តតាមនីតិវិធី ។
ចំណែកសពបានប្រគល់ជូនសាច់ញាតិយកទៅធ្វើបុណ្យតាមប្រពៃណី ៕
ដោយ៖ ចន្ទ លីហ្សា
