សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តម៉ាកឡិចសុីស RX330 មួយគ្រឿងបេីកបរដោយបុរសម្នាក់រួមដំណើរជាមួយនឹងមនុស្សប្រុសស្រីជាច្រើននាក់ទៀតបានរេចង្កូតទៅបុករបាំងថ្មពុះចែកទ្រូងផ្លូវបណ្ដាលឱ្យបាក់អស់មួយកង់ ចំណែកឯរថយន្តបង្កដាច់កាឡេកង់ម្ខាងទៅមុខលែងរួច ។
ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១និង ៥០នាទីរំលងអធ្រាត្រឈានចូលថ្ងៃទី២១ ខែមេសា ឆ្នាំ២០២៣ ស្ថិតនៅតាមបណ្ដោយផ្លូវលេខ២៧១ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
បេីតាមប្រភពព័ត៌មានពីកន្លែងកើតហេតុបានប្រាប់ឱ្យដឹងថា នៅមុនពេលកើតហេតុគេឃើញបុរសម្នាក់រួមដំណើរជាមួយនឹងមនុស្សប្រុសស្រីជាច្រើនទៀត បើករថយន្តម៉ាកឡិចសុីសRX330ពណ៌ស្ករ ពាក់ផ្លាកលេខ ភ្នំពេញ 2BJ-4448ធ្វើដំណើរតាមបណ្ដោយផ្លូវលេខ២៧១ក្នុងទិសដៅពីកើតទៅលិចដោយល្បឿនលឿន លុះមកដល់ចំណុចកើតហេតុស្រាប់តែរេចង្កូតមកខាងឆ្វេងដៃជ្រុលទៅបុករបាំងថ្មពុះចែកទ្រូងផ្លូវចំពាក់កណ្ដាលយ៉ាងពេញទំហឹង បណ្ដាលឱ្យបាក់របាំងថ្មអស់មួយកង់រងការខូចខាតតិចតួច ។ ចំណែកឯរថយន្តបង្កវិញបានដាច់កាឡេកង់មុខផ្នែកខាងឆ្វងទៅមុខលែងរួច ។
ក្នុងករណីគ្រោះថ្នាក់ចរាចរណ៍ខាងលេីនេះមិនបង្កឱ្យមនុស្សណាម្នាក់រងរបួស ឬគ្រោះថ្នាក់ដល់អាយុជីវិតនោះទេ តែភ្លាមៗអ្នកបើករថយន្តបង្កនិងអ្នករួមដំណើរបានគេចពីកន្លែងកើតហេតុបាត់ស្រមោល។
ក្រោយកេីតហេតុ សមត្ថកិច្ចមូលដ្ឋានប៉ុស្តិ៍នគរបាលរដ្ឋបាលសង្កាត់ផ្សារដើមថ្កូវ បានទំនាក់ទំនងទៅផ្នែកជំនាញចរាចរណ៍នៃស្នងការដ្ឋាននគរបាលរាជធានីភ្នំពេញ មកធ្វេីការាស់វាស់វែងយករថយន្តបង្កទៅរក្សាទុករង់ចាំដោះស្រាយគ្នានាពេលក្រោយ ៕
ដោយ ៖ ភារ៉ា ដង្កោ
