សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ពលករខ្មែរជាច្រើន គាំទ្រចំពោះការលើកឡើង ពីលោកស្រី ហ៊ុន សុីណាត ស្វះស្វែង រកសំណូមពរឲ្យអាជ្ញាធរខេត្តបាត់ដំបង ក៏ដូចជាសមត្ថកិច្ចពាក់ព័ន្ធ ជួយអន្តរាគមន៍ដល់ពលរដ្ឋខ្មែរ ដែលជាកម្មករ ពលករ ទៅធ្វើការនៅប្រទេសថៃ បន្ទាប់ពីសមត្ថកិច្ចច្រកឡែម យកលុយ ម្នាក់ ពី១.៣០០បាត ដល់ ២.០០០បាត។
សូមបញ្ជាក់ថា, លោកស្រី ហ៊ុន ស៊ីណាត កាលពីពេលថ្មីៗនេះបានស្នើទៅអភិបាលខេត្តបាត់ដំបង លោក សុខ លូ ឱ្យជួយដោះស្រាយបញ្ហាដែលកើតមាននៅច្រកព្រំដែន ឡែម ជុំវិញរឿងរ៉ាវមន្ត្រីនៅច្រកទ្វារមួយនេះបានកៀបសង្កត់យកលុយពីពលករខ្មែរដែលធ្វើដំណើរទៅធ្វើការនៅប្រទេសថៃ ។ ការលើកឡើងបែបនេះ ដោយសារលោកស្រីបានទទួលព័ត៌មានផ្ទាល់ពីពលករ។
សូមរំលឹកថា, តាមរយៈសំណេរលើបណ្តាញសង្គមហ្វេសប៊ុក លោកស្រី ហ៊ុន ស៊ីណាត បានដាក់ចំៗទៅអភិបាលខេត្តបាត់ដំបងថា«ខ្ញុំសូមឯកឧត្តមគណៈអភិបាលខេត្តបាត់ដំបងសុខ លូ មេត្តាជួយមើលរឿងរ៉ាវរបស់រាស្ត្រច្រកឡែម ក្នុងស្រុកកំរៀងនៅតាមច្រកនេះបានធ្វើបាបរាស្ត្ររាល់ថ្ងៃ» ។
លោកស្រី ហ៊ុន ស៊ីណាត ដែលពលរដ្ឋខ្មែរគោរពស្រលាញ់ និងតែងហៅលោកស្រីថា«លោកជំទាវចិត្តធម៌» បានមានប្រសាសន៍បន្តថា រឿងរ៉ាវយកលុយពីពលករខ្មែរនៅច្រកឡែមនេះ គឺរូបលោកជំទាវ ទទួលបានព័ត៌មានផ្ទាល់ពីប្រជាពលរដ្ឋដែលប្រជាពលរដ្ឋបានឆាតមកឲ្យ ខ្ញុំជម្រាបជូនដល់ថ្នាក់លើផង តើរឿងនេះវាយ៉ាងណាដែរ?»។
«រឿងច្រកឡែមមួយនេះយូរហើយបែបរកលុយដូចពាក្យគេថា ត្រីចង្វាចិញ្ចឹមត្រីឆ្ដោហើយមើលទៅ ។ សូមអស់លោកដែលពុករលួយល្មមឆ្អែតឆ្អន់ហើយ ។ ម្យ៉ាងទៀតមានក្មេងកំពុងតែស្រែករឿងនេះស្រាប់»។ នេះជាការលើកឡើងរបស់លោកស្រីចិត្តធម៌ ហ៊ុន ស៊ីណាត ដែលរូបលោកស្រី តែងតែអន្តរាគមន៍ជារឿយៗ ដើម្បីរកយុត្តិធម៌ជូនពលរដ្ឋខ្មែរ ពិសេសលោកជំទាវតែងតែព្រលះមន្ត្រីខូចៗណាដែលពុករលួយ ធ្វើបាបរាស្ត្រកន្លងមករហូតប្រជាពលរដ្ឋគោរពស្រលាញ់លោកជំទាវ និងតែងតែសុំលោកជំទាវជួយអន្តរាគមន៍រាល់ពេលមានបញ្ហាអយុត្តិធម៌កើតមានលើប្រជាពលរដ្ឋ ។
សូមជម្រាបថា, ចំពោះករណីនេះផងដែរ លោកស្រី ហ៊ុន ស៊ីណាត បានបញ្ចេញប្រតិកម្មយ៉ាងខ្លាំង ចំពោះអាជ្ញាធរខ្លះដែល ចង់ដកសក់ស្កូវរបស់លោកស្រី។
សូមបញ្ជាក់ថា, ជាក់ស្តែងរឿងរ៉ាវនៅច្រកឡែម ស្រុកកំរៀង ខេត្តបាត់ដំបង មានពលករខ្មែរជាច្រើនរូបបានលើកឡើងថា ក្រោយចូលឆ្នាំប្រពៃណីខ្មែររួចក៏ធ្វើដំណើរទៅថៃវិញ ដើម្បីបន្តការងារ ។ តែអ្វីដែលហួសចិត្តនោះមានពលករខ្មែរមួយរូបបានលាតត្រដាងរឿងរ៉ាវពុករលួយនៅច្រកឡែមថា រូបលោកត្រូវចំណាយលុយអស់១.៣០០បាត (ប្រមាណជាង១៥ម៉ឺនរៀល) លើឯកសារដើម្បីបានឆ្លងច្រកឡែមចូលទឹកដីថៃ ។
ជាមួយគ្នានោះ លោកស្រី ហ៊ុន ស៊ីណាត ក៏បានចែកចាយវីដេអូដែលពលករខ្មែររៀបរាប់អំពីការយកលុយនៅច្រកឡែមផងដែរ។ តាមរយៈវីដេអូឃ្លីបមួយមានរយៈពេលមិនដល់១នាទីផងនោះយើងឃើញពលករខ្មែរមួយរូបដែលបានឆ្លងទៅប្រទេសថៃតាមច្រកឡែមបានថ្លែងថា បងប្អូនពលករខ្មែរយើងចូលឆ្នាំរួច បើចង់ឡើងមកថៃ ចងការលុយគេឱ្យច្រើនបន្តិចមក ។
ពលករខ្មែររូបនេះបន្តថា រូបលោកបានឆ្លងទៅដល់ប្រទេសថៃហើយ ដោយឆ្លងកាត់តាមច្រកឡែម ដោយពលករខាងលើអះអាងថា លោកត្រូវចំណាយលុយសរុបប្រមាណ១.៣០០បាត ដោយដំបូងលោកយកអត្តសញ្ញាណបណ្ណទៅថតចម្លងលើក្រដាសសទំហំ A4 អស់ ១០០ បាត (ប្រមាណជា១១.០០០ រៀល) បន្ទាប់មកពលករខាងលើបន្តថា លោកត្រូវតម្រង់ជួរជាមួយពលករខ្មែរជាច្រើនទៀត ទម្រាំអស់លោកនៅច្រកទ្វារចារលេខរៀងលើក្រដាសថតចម្លងអត្តសញ្ញាណបណ្ណ ទំហំ A4 គឺត្រូវចាយអស់ ១.២០០បាត (ប្រមាណជាង១៤ម៉ឺនរៀល) បន្ថែមទៀតទម្រាំបានឆ្លងកាត់ច្រកឡែមចូលទឹកដីថៃ។
វប្បធម៌ដ៏អាក្រក់របស់សមត្ថកិច្ចនៅច្រកព្រំដែនឡែម បានបង្ហាញឲ្យឃើញនូវអំពើពុករលួយ ជះឥទ្ធិពលដ៏អាក្រក់ប៉ះពាល់ដល់សង្គមជាតិ។ ពិសេសប៉ះពាល់និងអារម្មណ៍ប្រជាពលរដ្ឋខ្មែរ ដែលពួកគេចង់មានចង់បាន តែពុំបានគិតអំពីផលប្រយោជន៍រួមរបស់ជាតិ។ មិនបានគិតពីការខិតខំរបស់ប្រមុខរាជរដ្ឋាភិបាល លើកកម្ពស់ពលករខ្មែរ កាត់បន្ថយភាពក្រីក្រ ស្វះស្វែងរកការងារឲ្យពលរដ្ឋ។
ក្រោយពេលលោកស្រី ហ៊ុន សែន ស្នើចំៗទៅអភិបាលខេត្តបាត់ដំបង លោក សុខ លូ ឱ្យពិនិត្យរឿងរ៉ាវជញ្ជក់ឈាមយកលុយពលករខ្មែរនៅច្រកឡែម ឃើញមានបងប្អូនអ្នកប្រើប្រាស់បណ្តាញសង្គមជាច្រើនបានចូលមកបញ្ចេញយោបល់អរគុណលោកស្រី ហ៊ុន ស៊ីណាតដែលបានជួយអន្តរាគមន៍ ។
ក្នុងនោះក៏មានបងប្អូនខ្លះទៀតសុំ លោកស្រី ឱ្យជួយអន្តរាគមន៍បន្ថែមទៀត ដោយមានគណនីហ្វេសប៊ុកមួយឈ្មោះថា «Thida Ny» ក៏បានចូលទៅខមមិនសុំលោកជំទាវថា «សូមលោកជំទាវជួយផង ខ្ញុំធ្វើការមិនបានលុយច្រើនទេ ពេលទៅផ្ទះម្ដងៗចំណាយច្រើនរឿងច្រក និងតែម្ដងឆ្នាំនេះខ្ញុំមិនបានទៅលេងផ្ទះទេ ព្រោះច្រកចេញថ្លៃពេកមិនមែនតែច្រកឡែមទេគ្រប់ច្រក បើដូចពីមុនអត់លុយក៏ទៅផ្ទះបានដែរតែឥឡូវប្រើលុយច្រើនពេកទើបខ្ញុំមិនបានទៅផ្ទះ »។
ចំណែកគណនីហ្វេសប៊ុកឈ្មោះ «Kwan NiTa» ក៏បានថ្លែងប្រាប់លោកជំទាវ ហ៊ុន ស៊ីណាតថា«ខ្ញុំអស់ចង់2.000បាត» ឬប្រមាណជិត២៣ម៉ឺនរៀល ។ ក្រោយឃើញសារបែបនេះលោកជំទាវ ហ៊ុន ស៊ីណាត ក៏បានបញ្ចេញប្រតិកម្មថា«អុញ!ម៉េចបានអស់លុយអញ្ចឹងខ្ញុំឃើញ BAYON Radio នាំលោកធំ សុខ លូ ចុះទៅពេលនោះពលករខ្មែរ បានលើកឡើងដូចៗគ្នាថា រាល់ការបំពេញបែបបទ ឯកសារចេញចូលឆ្លងដែននាពេលបច្ចុប្បន្ននេះមានភាពលឿនរហ័សជាងមុន និងពុំមានការទារលុយកាក់ក្រៅផ្លូវការនោះទេ»។
លោកជំទាវហ៊ុន ស៊ីណាត បន្តថា «អញ្ចឹងបើរឿងដែលក្មួយអស់លុយមាន អស់លោកធំចុះទៅ ដើម្បីសម្តែងល្ខោនក្នុងពេលពលករខ្មែរស្រែកជេរ។ ថ្ងៃនេះជាថ្ងៃសីល សូមឲ្យអ្វីៗដែលអស់លោកបានជញ្ជក់ឈាមពលករខ្មែរកន្លងមកសូមកុំឲ្យមានទៀត បើមិនបញ្ឈប់ការធ្វើបាបពលករទេ សូមទសបារមីលោកតាដំបងក្រញ៉ូងក្នុងខេត្តបាត់ដំបងចាត់ការអាអ្នកទាំងនោះផងចុះ»។
ជាមួយនឹងការខមមិនរបស់លោកជំទាវ ហ៊ុន ស៊ីណាត ដែលសូមទសបារមីលោកតាដំបងក្រញ៉ូងក្នុងខេត្តបាត់ដំបងចាត់ការមនុស្សខូចដែលយកលុយពលករក្រៅផ្លូវការនោះ ស្រាប់តែឃើញមានសារបែកធ្លាយ ដែលជាសារឆ្លើយឆ្លងរបស់លោក សុខ លូ និងសហការីរបស់គាត់ថា ដែលបានថតសាររបស់លោកជំទាវ ហ៊ុន ស៊ីណាត និងសំណេររបស់លោក ផែង វណ្ណៈ ដែលបានសរសេរស្រដៀងលោកជំទាវ ហ៊ុន ស៊ីណាតថាលោក«សុំដាក់បណ្តាសាឱ្យបុគ្គលថោកទាបណាបឺតជញ្ជក់ឈាមពលករ សូមឱ្យវាក្រឡាប់ឡានងាប់ទាំងពូជ» នោះចែកចាយក្នុងគ្រុបតេឡេក្រាមមួយដោយយើងឃើញថា ក្នុងសារបែកធ្លាយនោះ សហការីរបស់លោក សុខ លូ ម្នាក់បាននិយាយថា«ដាក់ទំនាយគេដល់កហើយ ឯឧបង អត់ខ្លាចបាបកម្ម»។ រួចលោក សុខ លូ ក៏បានតបសារថា«ដាក់ទំនាយគេយូរៗ…គង់តែត្រូវខ្លួនឯងទេ» ។
យ៉ាងណាមិញ យើងមិនទាន់អាចទាក់ទងលោក សុខ លូ លើបញ្ហាពុករលួយនៅច្រកឡែម និងការប្រមាថលោកជំទាវ ហ៊ុន ស៊ីណាត បាននៅឡើយទេ គិតត្រឹមថ្ងៃសៅរ៍ ទី២២ ខែមេសានេះ ។ ក៏ប៉ុន្តែបើយើងក្រឡេកមើលសន្ទុះនៃការថ្លែងអំណរគុណលោកជំទាវ ហ៊ុន ស៊ីណាត រឿងមន្ត្រីមួយចំនួនយកលុយក្រៅផ្លូវការពីពលករខ្មែរយើងវិញឃើញមានបងប្អូនខ្មែរ សម្តែងការអរគុណលោកជំទាវជាបន្តបន្ទាប់ ។
ជាក់ស្តែង បងប្អូនពលរដ្ឋខ្មែរក៏បានចេញវីដេអូថ្មីមួយសម្តែងការអរគុណដល់សម្តេចតេជោ ហ៊ុន សែន និងភរិយា និងថ្លែងអំណរគុណចំពោះលោកជំទាវ ហ៊ុន ស៊ីណាត ដែលបានជួយអន្តរាគមន៍ដោះស្រាយរឿងរ៉ាវ ច្រកឡែម ដោយមិនឱ្យមានការយកលុយកាក់ពីបងប្អូនពលករខ្មែរដែលឆ្លងកាត់ច្រកឡែមទៅបំពេញការងារនៅថៃទៀតនោះទេ ។
ក្នុងវីដេអូឃ្លីបមួយទៀត បងស្រីម្នាក់បានលើកឡើងថា អ្នកដែលជាពលករខ្មែរទៅធ្វើការនៅថៃនោះមិនមែនជាបក្សប្រឆាំងទេ គឺនៅថៃក៏មានពលករខ្មែរដែលគោរពស្រលាញ់គណបក្សប្រជាជនដែរ ហើយបងប្អូនក៏បានជូនពរជំទាវម៉ែ ហ៊ុន ស៊ីណាត មានសុខភាពល្អផងដែរ។
មាន facebook ជាច្រើនបានបង្ហោះ ជុំវិញបញ្ហានេះ ដោយលើកស្រដៀងគ្នាថា, សមត្ថកិច្ចគ្រប់គ្រងនៅច្រកឡែម ប្រព្រឹត្តអំពើពុករលួយយូរឆ្នាំមកហើយ តាំងពីនៅច្រកអន្តរជាតិព្រំ ខេត្តប៉ៃលិន។
អ្នកខ្លះបានសរសេរថា , ( សិក្សា ស៊ើបអង្កេត ស្រាវជ្រាវផង ឮថា, ការបំពេញបែបបទឆ្លងទៅថៃនៅច្រកឡែម យកលុយពីពលករខ្មែរ ម្នាក់ ១.៣០០បាត ទៅ២.០០០បាត ?)។
facebook ដ៏ច្រើនបានសរសេរថា, ( តើលោកRous Sarom ជាអ្នកណាបានជាថ្លើមធំម៉្លេះចង់ដកស្កូវលោកជំទាវ ហ៊ុន ស៊ីណាត និងចាប់លោក ផែង វណ្ណ: ដាក់គុកវិញ
តើលោកសំអាងទៅលើអ្វី?
សូមផ្ដាំលោកផងសមត្ថភាពត្រឹមលោកដកត្រឹមស្កូវក្បាលខ្ញុំអោយបានសិនទៅចាំរំលងទៅដកស្កូវលោកជំទាវ ហ៊ុន ស៊ីណាត ។
លោកត្រូវចាំគ្រួសារត្រកូលហ៊ុនមិនមែនជាគ្រួសារសម្រាប់ឲ្យលោកដើរដកស្កូវទេ យល់ ។
#Sinath Hun )។
លោកស្រី ហ៊ុន សុីណាត នៅថ្ងៃទី២២ ខែមេសា ឆ្នាំ២០២៣ បានបង្ហោះថា, (សូមផ្តាំទៅ ឯកឧត្តម សុខ លូ ផង ដកស្កូវយាយចាស់ច្រឡំមនុស្សហើយ ។
សំឡេងប្រមាថខ្ញុំទាំងអស់នេះ ជូនឯកឧត្តមជាពិសេស ថាវាមិនបានបាត់ទៅណានោះទេ ។ សូមជូនពរដល់បងប្អូនពលករនៅប្រទេសថៃទាំងអស់សុខចំរើនគ្រប់ប្រការ ។ ) ។
សូមជម្រាបជូនថា, អាជ្ញាធរខេត្ត សមត្ថកិច្ចពាក់ព័ន្ធ ជាពិសេសខាងអគ្គនាយកដ្ឋាននគរបាលអន្តោប្រវេសន៍ មេត្តាពិនិត្យឲ្យបានម៉ត់ចត់ ចំពោះមន្ត្រីនគរបាលអន្តោប្រទេសន៍តាមច្រកព្រំដែន ដែលបានធ្វើការគាបសង្កត់មកលើពលករខ្មែរ តាមរយៈករណីបង្ខំឲ្យបង់ប្រាក់ជាអំពើពុករលួយនេះជាដើម៕
ដោយ៖ សហការី
