🔴ព្រឹកនេះ ! ចៅក្រមស៊ើបសួរសាលាដំបូងខេត្តកំពត សម្រេចឃុំខ្លួន លោក គឹម បញ្ញា ដាក់ពន្ធនាគារ ហើយ !

ខេត្តកំពត ៖ នៅព្រឹកថ្ងៃទី២៨ ខែមេសា ឆ្នាំ២០២៣ ចៅក្រមស៊ើបសួរសាលាដំបូងខេត្តកំពត លោក ឈុន ច័ន្ទសីហា បានសម្រេច ចេញដីកាបង្គាប់ឲ្យឃុំខ្លួន ជនត្រូវចោទឈ្មោះ គឹម បញ្ញា អភិបាលរងក្រុងបូកគោ ខេត្តកំពត ដាក់ពន្ធនាគារបណ្តោះអាសន្ន ។ ខណៈជននេះត្រូវបានដាក់ក្រោមការពិនិត្យពីបទហិង្សាប្រព្រឹត្តដោយសហព័ទ្ធ អនីតិសង្វាសជន (ប្តីវាយប្រពន្ធ) ប្រព្រឹត្តនៅចំណុចភូមិអណ្តូងខ្មែរ សង្កាត់អណ្តូង ក្រុងកំពត ខេត្តកំពត កាលពីថ្ងៃទី១១ ខែមេសា ឆ្នាំ២០២២ និងថ្ងៃទី១២ ខែកក្កដា ឆ្នាំ២០២២ បទល្មើសព្រហ្មទណ្ឌដែលមានចែង និងបញ្ញត្តិឲ្យផ្ដន្ទាទោសតាមមាត្រា ២២២ នៃក្រមព្រហ្មទណ្ឌ ។ -បានឃើញ ដីកាសម្រេចឲ្យឃុំខ្លួនបណ្តោះអាសន្នលេខ ២៩០ /២៣ ចុះថ្ងៃទី២៨ ខែមេសា ឆ្នាំ២០២៣។

បង្គាប់: 

១-ឲ្យភ្នាក់ងារមានសមត្ថកិច្ចនៃកម្លាំងសាធារណៈធ្វើការនាំជនត្រូវចោទដែលមានឈ្មោះ គឹម បញ្ញា អាយុ ៣១ឆ្នាំ ទៅពន្ធនាគារខេត្តកំពត ដោយអនុវត្តឱ្យបានត្រឹមត្រូវតាមច្បាប់។

២-ប្រធានពន្ធនាគារខេត្តកំពត ទទួល និងឃុំខ្លួនជននេះរហូតដល់មានបទបញ្ជាថ្មីសម្រេចផ្សេងពីនេះ។

 ៣-ឲ្យគ្រប់ភ្នាក់ងារនៃកងកម្លាំងសាធារណៈទាំងអស់សហការអនុវត្តឲ្យបានល្អនៅពេលដីការនេះត្រូវបានបង្ហាញក្នុងករណីចាំបាច់។

លោកឧត្តមសេនីយ៍ទោ ស្នងការនគរបាលខេត្តកំពត បាននិយាយយ៉ាងខ្លីថា សង្ឃឹមថានេះជាមេរៀននិងបទពិសោធន៏ជីវិតសំរាប់ប្អូន អំពើហឹង្សារមិនមែនជាដំណោះស្រាយក្នុងជីវិតគូរនោះទេ អោយតែមានអំពើហឹង្សារគឺខុសច្បាប់ទាំងអស់ ហើយមិនចាំបាច់ជាប្តីឬប្រពន្ធនោះទេ ។ នេះជាសារសំរាប់ដាស់តឿនដល់យុវជនទាំងឡាយសូមកុំប្រើប្រាស់អំពើហឹង្សារទោះក្នុងបញ្ហាអ្វីក៏ដោយ ខឹងខុស ខឹងខាត បងសូមចូលរួមសោកស្តាយផង ៕

ដោយ ៖ សុខ ខេមរា