សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បើករថយន្ដមួយគ្រឿងមិនប្រយ័ត្នបានរេចង្កូតទៅបុករថយន្ដមួយគ្រឿងទៀតដែលចតចោលនៅខាងស្ដាំដៃពេញទំហឹងបណ្ដាលឱ្យរងការខូចខាតយ៉ាងដំណំ កាលពីវេលាម៉ោង១២:៣០នាទីរំលងអធ្រាត្រឈានចូលថ្ងៃទី២៩ ខែមេសា ឆ្នាំ២០២៣ នៅតាមបណ្ដោយផ្លូវលេខ២៧១ ក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ។
ប្រភពព័ត៌មានពីកន្លែងកេីតហេតុបានឱ្យដឹងថា នៅមុនកើតហេតុ គេឃើញបុរសម្នាក់បើករថយន្ដមួយគ្រឿងម៉ាក Toyota Matrax ពណ៌ទឹកប្រាក់ ពាក់ផ្លាកលេខភ្នំពេញ 2U-8105 ធ្វើដំណើរតាមបណ្ដោយផ្លូវលេខ២៧១ ទិសដៅពីជើងទៅត្បូងក្នុងល្បឿនលឿន លុះធ្វើដំណើរមកដល់មុខមន្ទីរពេទ្យមិត្តភាពខ្មែរ-សូវៀត (ពេទ្យរុស្សុី)ក៏រេចង្កូតទៅខាងស្ដាំដៃឡើងលើខឿនចិញ្ចើមផ្លូវទៅបុករថយន្ដមួយគ្រឿងម៉ាក Visto ពណ៌ទឹកប្រាក់ ពាក់ផ្លាកលេខភ្នំពេញ 2N-7930 ដែលចតចោលពេញទំហឹង បណ្ដាលឱ្យរងការខូចខាតផ្នែកខាងក្រោយ ឯរថយន្ដបង្ករងការខូខាតផ្នែកខាងមុខយ៉ាងដំណំ តែសំណាងដែរដែលក្នុងករណីនេះមិនបង្កឱ្យមានមនុស្សរងរបួស ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ និងធ្វើការសម្របសម្រួលឱ្យភាគីទាំងពីរផងដែរ ។ ចុងក្រោយភាគីរថយន្ដ Toyota Matrax ព្រមចេញថ្លៃការខូចខាតទៅភាគីរថយន្ដ Visto ដេីម្បីបញ្ចប់រឿង នៅកន្លែងកេីតហេតុ ៕
ដោយ ៖ ភារ៉ា ដង្កោ
