ប្រទះឃើញជនជាតិវៀតណាម ដេកស្លាប់ក្នុងវីឡាបឹងកាឡូ ក្នុងបរិវេណកាស៊ីណូសៀងហៃ

ខេត្តស្វាយរៀង៖ មានការភ្ញាក់ផ្អើលទាំងព្រឹកដល់សន្តិសុខនិងរាយការណ៍មកសមត្ថកិច្ចបន្ទាប់ពីប្រទះឃើញជនជាតិវៀតណាម ដេកស្លាប់ក្នុងវីឡាបឹងកាឡូ  ក្នុងបរិវេណកាស៊ីណូសៀងហៃសង្ស័យខ្យល់គ។

ហេតុការណ៍នេះបានកើតឡើងកាលពីវេលាម៉ោង៩និង០៥នាទីព្រឹក ថ្ងៃទី០៦ ខែឧសភា ឆ្នាំ២០២៣ ស្ថិតនៅត្រង់ចំណុចក្នុងវីឡាបឹងកាឡូ បន្ទប់លេខ B075  ក្នុងបរិវេណកាស៊ីណូសៀងហៃ ស្ថិតនៅភូមិ ចេក ឃុំ សំរោង ស្រុកចន្ទ្រា ខេត្តស្វាយរៀង ។

យោងតាមសមត្ថកិច្ចនគរបាលបានឱ្យដឹងថាបុរសខាងលើមានឈ្មោះ ឡេ ហ្វាញ៉ឹង (LE QUANG NHAN) អាយុ២៩ ឆ្នាំ មុខរបរមិនពិតប្រាកដ កាន់លិខិតឆ្លងដែន លេខ:P00461314  មានទីលំនៅក្រុងហ្វាងនឹង ប្រទេសវៀតណាម។

ប្រភពបន្តថាសមត្ថកិច្ច នគរបាលប៉ុស្តិ៍រដ្ឋបាលសំរោង បានទទួលព័ត៌មានថា មានជនជាតិវៀតណាមម្នាក់ ដេកស្លាប់នៅត្រង់ចំណុចក្នុងវីឡាបឹងកាឡូ បន្ទប់លេខ B075  ក្នុងបរិវេណកាស៊ីណូសៀងហៃ ស្ថិតនៅភូមិ ចេក ឃុំ សំរោង ស្រុកចន្ទ្រា ភ្លាមនោះ កម្លាំងប៉ុស្តិ៍នគរបាលរដ្ឋបាលសំរោង កម្លាំងជំនាញ នៃអធិការដ្ឋាននគរបាលស្រុកចន្រ្ទា សហការជាមួយកម្លាំងជំនាញនៃស្នងការដ្ឋាននគរបាលខេត្តស្វាយរៀង  និងលោកគ្រូពេទ្យ ហាស់ សុផុន ប្រធានមណ្ឌលសុខភាពមេសរថ្ងក ដោយមានការសម្របសម្រួលពីលោក ឡម ពេងស៊ាន ព្រះរាជអាជ្ញារងនៃអយ្យការអមសាលាដំបូងខេត្តស្វាយរៀង បានចុះទៅដល់កន្លែងកើតហេតុ ដើម្បីធ្វើការស្រាវជ្រាវ និងពិនិត្យលើសាកសពឈ្មោះ ឡេ ហ្វា ញ៉ឹង (LE QUANG NHAN) ។

ប្រភពបន្តថា ដោយផ្អែកតាមការពិនិត្យកន្លែងកើតហេតុនិង  ស្ដាប់ចម្លើយសាក្សីបំភ្លឺ និងគ្រូពេទ្យ  សន្និដ្ឋានបានថាសាកសពខាងលើ ពិតជាស្លាប់ដោយសារ ខ្យល់គរ គាំងបេះដូង ប្រាកដមែន ។

បច្ចុប្បន្នសាកសពត្រូវបានសមត្ថកិច្ចបញ្ជូនទៅរក្សាទុកនៅវត្តស្ទឹងមានជ័យ រាជធានីភ្នំពេញ ដើម្បីស្វែងរកក្រុមគ្រួសារមកធ្វើបុណ្យតាមប្រពៃណី ៕

ដោយ៖ សុថាន