សារព័ត៌មាន នគរវត្ត តែងតែនាំមុខគេជានិច្ច
ប្រទេសថៃ ៖ តាមសេចក្ដីរាយការណ៍ពីបន្ទាត់ព្រំដែនកម្ពុជា-ថៃបានប្រាប់ថាៈកងទ័ពបូព៌ាថៃបានចាប់ជនអន្តោប្រវេសន៍ខុសច្បាប់ពីកម្ពុជាចំនួន២លើកសរុបបានពលរដ្ឋខ្មែរប្រុសស្រីឆ្លងដែនខុសច្បាប់៩នាក់ និងមនុស្ស១នាក់ទៀតកំពុងស្វែងរកដោយរត់គេចពីប្រទេសថៃតាមព្រំដែនខេត្តស្រះកែវនៅថ្ងៃទី១៦ ខែមិថុនា ឆ្នាំ២០២៣នេះ។
សេចក្ដីរាយការណ៍បន្ថែមបានឱ្យដឹងទៀតថា កងកម្លាំងបូព៌ាដោយមានក្រុមការងារកងវរសេនាធំថ្មើរជើងទី១២ អង្គភាពបញ្ជាកងវរសេនាធំលេខ១៣ និងក្រុមការងារកងវរសេនាធំថ្មើរជើងទី២។ កម្លាំងនគរបាលការពារព្រំដែនគោកលេខ១២ ដែលបានដើរល្បាតតាមច្រកព្រំដែនក្នុងខេត្តស្រះកែវ បានរកឃើញការប្រើប្រាស់ច្រករបៀងធម្មជាតិសម្រាប់ជនអន្តោប្រវេសន៍ខុសច្បាប់ចំនួន២លើក ហើយបានឃាត់ខ្លួនជនអន្តោប្រវេសន៍ខុសច្បាប់ពីប្រទេសកម្ពុជាចំនួន៩នាក់ និងម្នាក់តាមដីកាចាប់ខ្លួនបានព្យាយាមរត់គេចខ្លួនចេញពីប្រទេសថៃ។
ពេលនោះសមត្ថកិច្ចបានឃាត់ខ្លួននិងបញ្ជូនពលរដ្ឋប្រុសស្រីទាំងអស់នោះទៅ មន្ត្រីប៉ូលិសក្នុងតំបន់ដើម្បីចាត់ការតាមច្បាប់បន្តទៀត។
ប្រភពបញ្ជាក់ថាៈ ពលរដ្ឋដែលលួចឆ្លងដែនចូលទៅប្រទេសថៃខុសច្បាប់ភាគច្រើនត្រូវបានមេខ្យល់ដឹកតាមរថយន្តនៅពេលយប់ទៅដាក់នៅទីតាំងជិតៗក្បែរច្រករបៀងមួយចំនួនដែលក្រុមពួកមេខ្យល់ត្រូវរ៉ូវគ្នាជាមួយសមត្ថកិច្ចនៅតាមបន្ទាត់ព្រំដែន ហើយការឆ្លងដែននោះទៀតសោតប្រឈមទៅនឹងគ្រោះថ្នាក់គ្រប់ប្រភេទ ជួនពេលខ្លះរត់គេចពីសមត្ថកិច្ច និងពេលខ្លះទៀតដើរដេកតាមចម្ការអំពៅជាដើម។ នៅតំបន់មួយចំនួនទៀតគ្រាប់មីននៅសេសសល់ពីសង្គ្រាមក៏មិនទាន់ដោះអស់ប្រឈមមុខនឹងគ្រោះថ្នាក់ដល់អាយុជីវិតផងដែរ៕
ដោយ ៖ វណ្ណា
