សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ អ្នកតំណាងរាស្រ្តមណ្ឌលកំពង់ស្ពឺលោកហ៊ុន ម៉ានី បានថ្លែងថា តាមរយៈគោលនយោបាយរបស់រាជរដ្ឋាភិបាលធ្វើឱ្យខេត្តកំពង់ស្ពឺកែប្រែមុខមាត់និងទទួលបានឱកាសការងារ និងវិនិយោគជាបន្តបន្ទាប់។ កាលពីប៉ុន្មានឆ្នាំមុន ខេត្តកំពង់ស្ពឺមិនត្រូវបានគេយក ចិត្តទុកដាក់នោះទេ ខេត្តនិងប្រជាពលរដ្ឋក្នុងខេត្តនេះ ត្រូវបានទទួលពាក្យមាក់ងាយថា ជាខេត្តប៊ុមប៊ឺរលាក់កងជើង ជាអ្នកក្រីក្រគ្មានទ្រព្យគ្មានប្រាជ្ញា។ បើគេចង់ដាក់ទណ្ឌកម្មលើនរណាម្នាក់គឺគេបញ្ជូនមកកាន់ខេត្តកំពង់ស្ពឺនេះហើយ ព្រោះកាលណោះខេត្តនេះគឺតំបន់ប្រទាញប្រទង់គ្នាដោយចុងអាវុធ។
បច្ចុប្បន្នខេត្តកំពង់ស្ពឺ បានក្លាយជាខេត្តដែលមានភូមិសាស្រ្តល្អ និងជាខេត្តដែលមានសក្តានុពលយ៉ាងសំខាន់បន្ទាប់ពីរាជធានីភ្នំពេញ។ ជាក់ស្តែងខេត្តកំពង់ស្ពឺទទួលបានការវិនិយោគជាបន្តបន្ទាប់ពីសំណាក់ក្រុមហ៊ុនក្រៅ ប្រទេស ហើយតាមរយៈការវិនិយោគនេះ បានផ្តល់ឱកាសឱ្យប្រជាពលរដ្ឋក្នុងខេត្តទទួលបានការងារធ្វើ និងមានប្រាក់ចំណូលខ្ពស់ផងដែរ។ លោក ហ៊ុន ម៉ានី បានលេីកឡេីងដូចនេះ ក្នុងពិធីសម្ពោធសាលាធម្មសភា និងសមិទ្ធផលនានា នៅក្នុងវត្តព្រះពុទ្ធអណ្ដែត(ហៅវត្តក្តីល្វា) ស្ថិតក្នុងភូមិធ្លក ឃុំត្រពាំងគង ស្រុកសំរោងទង ខេត្តកំពង់ស្ពឺ នាថ្ងៃទី២៦ ខែមិថុនា ឆ្នាំ២០២៣។
ទទន្ទឹមនឹងការលើកឡើងនោះដែរលោកហ៊ុន ម៉ានី បានគូសបញ្ជាក់ពីការយកចិត្តទុកដាក់របស់រាជរដ្ឋាភិបាលកម្ពុជាក្រោមការដឹកនាំរបស់គណបក្សប្រជាជនកម្ពុជាក្រោយផ្តួលរំលំរបបកម្ពុជាប្រជាធិបតេយ្យ បានធ្វើឱ្យប្រទេសមានការអភិវឌ្ឍហេដ្ឋារចនាសម្ព័ន្ធផ្លូវថ្នល់ជាបន្ត បន្ទាប់ និងទៅដល់ទីជនបទ ដែលផ្តល់ភាពងាយស្រួលដល់អ្នកវិនិយោគទុនដែលមកដាក់ទុនរកស៊ីនៅក្នុងខេត្ត និងភ្ញៀវទេសចរជាតិ-អន្តរជាតិផងដែរ។ ជាក់ស្តែងតំបន់តាសាល(ខ្នងផ្សារ) ពីមុនមិនមាននរណាម្នាក់ចង់ទៅ តែឥឡូវតំបន់នេះកំពុងទទួលបានប្រជាប្រិយភាពក្នុងការទាក់ទាញភ្ញៀវទេសចរជាតិ-អន្តរជាតិមកលេងកម្សាន្តរមណីយដ្ឋានធម្មជាតិ។ កំណើនភ្ញៀវពីមួយថ្ងៃទៅមួយ ថ្ងៃក៏បាននិងកំពុងផ្តល់ជាប្រាក់ចំណូលដល់បងប្អូនប្រជាពលរដ្ឋក្នុងសហគមន៍នោះផងដែរ តាមរយៈការផ្តល់សេវាកម្មដឹកជញ្ជូន និងកន្លែងស្នាក់នៅដល់ភ្ញៀវ។
អ្នកតំណាងរាស្ត្រមណ្ឌលកំពង់ស្ពឺបញ្ជាក់ថា ការរីក ចម្រើនរបស់កម្ពុជាគឺជាសមិទ្ធផលដែលរាជរដ្ឋាភិបាល និងគណបក្សប្រជាជនកម្ពុជាបានកសាងឡើង។ ថ្វីត្បិតក្នុងរយៈពេលដឹកនាំកន្លងមកនេះវាមិនល្អឥតខ្ជោះ តែគណបក្សប្រជាជនកម្ពុជាក៏បាននិងកំពុងខិតខំប្រឹង ប្រែងបន្ត និងកែសម្រួលនូវចំណុចខ្វះខាតនានាដើម្បីធានានូវសុខសន្តិភាព១០០%ដល់ប្រជាពលរដ្ឋ,ការវិនិយោគ និងការអភិវឌ្ឍន៍ និងនៅបន្តប្រពៃណីមិនរត់ចោលពលរដ្ឋនោះទេ ទោះក្នុងកាលៈទេសៈបែបណាក៏ដោយ។
ពេលសប្បាយរីករាយគឺពលរដ្ឋមិនបាននឹករកនាយករដ្ឋមន្ត្រី ឬថ្នាក់ដឹកនាំនោះទេ ដូច្នេះសូមបន្តសប្បាយចុះ តែពេលពលររដ្ឋជួបនូវឧបទ្ទហេតុផ្សេងៗ គឺមានមន្ត្រីគណបក្សប្រជាជននៅក្បែរបងប្អូនជានិច្ច។ និយាយរួម ពេលសប្បាយ អវត្តមានគណបក្សប្រជាជន តែពេលកើតទុក្ខគឺមានគណបក្សប្រជាជននៅក្បែរបងប្អូន ៣៦៥ថ្ងៃ៕
ដោយ៖ សូរិយា
