ស្វែងរកយល់អំពីផ្លូវច្បាប់ ហេតុអ្វីអ្នកត្រូវការមេធាវី?

ភ្នំពេញ ៖ នៅពេលដែលអ្នកមានបញ្ហាផ្លូវច្បាប់ ជាពិសេសក្នុងករណីព្រហ្មទណ្ឌ អ្នកតែងមានការលំបាកក្នុងការសម្រេចចិត្តថា តើត្រូវរកមេធាវីមកការពារក្តីឱ្យខ្លួនឬយ៉ាងណា? មែនហើយ សំណួរបន្ទាប់ច្បាស់ជាអ្នកគិតដល់ខ្ទង់ចំណាយដែលអ្នកយល់ថាជាបន្ទុក ព្រោះអ្នកអាចកំពុងជួបប្រទះការខ្វះខាតផ្នែកហិរញ្ញវត្ថុផងដែរ។ ក្នុងរឿងព្រហ្មទណ្ឌ អ្នកអាចត្រូវបានកាត់ក្តីឱ្យមានទោសឬគ្មានទោស។ ក្នុងករណីមានទោស គឺត្រូវកំណត់នូវទោសដែលអាចត្រូវជាប់ពន្ធនាគារ ឬ ត្រូវពិន័យជាប្រាក់។ រីឯករណីរដ្ឋប្បវេណីវិញ អាចត្រូវបានកំណត់លើសំណងនិងការខូចខាតជាប្រាក់។ ក្នុងករណីរដ្ឋប្បវេណី មានមេធាវីមួយចំនួន មិនយកថ្លៃសេវាមុន ដែលអាចជាការព្រមព្រៀងមួយជួយសម្រួលអ្នក ប្រសិនបើអ្នកមានការលំបាកផ្នែកហិរញ្ញវត្ថុ។ នៅពេលអ្នកឈ្នះក្តី ហើយទទួលបានសំណង ទើបអ្នកប្រគល់ចំណែកថ្លៃសេវាមេធាវីទៅមេធាវី។ ជាទូទៅ ការចំណាយលើសេវាមេធាវី អាចមានតម្លៃខ្ពស់ដែលអាចធ្វើឱ្យអ្នកស្ទាក់ស្ទើរក្នុងការសម្រេចចិត្ត។ ខាងក្រោមនេះជាហេតុផលសំខាន់ៗ១០យ៉ាង ដែលអ្នកគួរពិចារណាដើម្បីជ្រើសរើសយកមេធាវីណាម្នាក់មកការពារក្តីឱ្យអ្នកក្នុងករណីដែលអ្នកប្រឈមនឹងបញ្ហាផ្លូវច្បាប់៖ 

១. ច្បាប់មានលក្ខណៈស្មុគស្មាញ 

បើអ្នកគ្មានជំនាញច្បាប់ ហើយគ្មានជំនាញជាមេធាវីផងនោះ អ្នកអាចនឹងពិបាកយល់ និងពិបាកធ្វើឱ្យបានត្រឹមត្រូវតាមគោលការណ៍ច្បាប់។ នោះជារឿងធម្មតាទេ។ សូម្បីតែមេធាវីដែលមានជំនាញស្រាប់ក៏អាចមានចំណុចដែលទាមទារឱ្យមានការព្យាយាមនិងយកចិត្តទុកដាក់ខ្ពស់ផងដែរ។ ព្រោះថា មនុស្សម្នាក់មិនអាចចេះដឹងគ្រប់យ៉ាងនោះទេ ហើយក៏ត្រូវការនូវជំនាញច្បាស់លាស់ក្នុងការងារដែលខ្លួនត្រូវបំពេញ។ មេធាវីម្នាក់ ក៏មិនចេះច្បាប់ទាំងអស់នោះដែរ។ ពីព្រោះប្រទេសរបស់យើងក៏មានច្បាប់កាន់តែច្រើន និងកាន់តែមានលក្ខណៈស្មុគស្មាញដែលទាមទារឱ្យមានការសិក្សាច្បាស់លាស់។ ម្យ៉ាងទៀត ដោយសារស្ថានភាពអង្គហេតុនៃរឿងក្តី ឬ កិច្ចការនីមួយៗមានលក្ខណៈខុសៗគ្នា អ្នកកាន់តែត្រូវការមេធាវីជួយប្រឹក្សាយោបល់និងរៀបចំលិខិតគតិយុត្តិផ្សេងៗឱ្យអ្នក ដើម្បីបានត្រឹមត្រូវស្របតាមច្បាប់។ បើមិនដូចនេះទេ ការងាររបស់អ្នកអាចត្រូវបានចាត់ទុកជាមោឃៈនាំឱ្យខាតបង់ប្រយោជន៍។  បើយើងនិយាយដល់បច្ចេកទេសការពារក្តី ការស៊ើបអង្កេត និងសិល្បៈនៃការសរសេរនិងការធ្វើបទបង្ហាញនោះកាន់តែមានភាពស្មុគស្មាញថែមទៀត។ មនុស្សម្នាក់ ទម្រាំទទួលបានការហ្វឹកហ្វឺនឱ្យក្លាយជាមេធាវីដែលមានសមត្ថភាពម្នាក់ ត្រូវចំណាយពេលច្រើនឆ្នាំ ហើយត្រូវមានការព្យាយាមយកចិត្តទុកដាក់ផងដែរ។ ហេតុនេះ វាជាការប្រថុយប្រថាន បើអ្នកសម្រេចមិនទទួលយកសេវាមេធាវីនោះ។ ពីព្រោះវាជាការលំបាកសម្រាប់អ្នក ដែលអ្នកត្រូវបំពេញការងារដែលមិនមែនជាជំនាញរបស់ខ្លួន។ 

២. ការមិនពឹងមេធាវី អាចជាការចំណាយច្រើនជាងអ្វីដែលអ្នករំពឹង

តាមពិសោធន៍បណ្តាប្រទេសជឿនលឿនដែលមានការអនុវត្តច្បាប់តឹងរឹង បានបង្ហាញថាការមិនមានមេធាវីតំណាងឬការពារក្តី ឬការមិនរកមេធាវីប្រឹក្សាយោបល់និងតាក់តែងលិខិតស្នាមជាដើម នាំឱ្យអ្នកនោះ ត្រូវចំណាយកាន់តែខ្ពស់ទៅវិញ។ នេះព្រោះពួកគេយល់ថា គេត្រូវការសន្សំសំចៃលើការចំណាយថ្លៃសេវាមេធាវី។ ប៉ុន្តែជាលទ្ធផល ពួកគេត្រូវចំណាយកាន់តែច្រើន ជាងការចំណាយលើថ្លៃសេវាមេធាវីទៅទៀត។ ដោយហេតុថា ពួកគេគ្មានជំនាញ ផ្នែកច្បាប់និងនីតិវិធីច្បាស់លាស់ដែលនាំឱ្យមានការចំណាយមិនត្រឹមត្រូវទៅលើការស៊ើបអង្កេត ការចំណាយលើអ្នកជំនាញមិនចំគោលដៅ ការរៀបចំដាក់ឯកសារមិនទាន់ពេលវេលា ឬការដាក់ឯកសារមិនត្រឹមត្រូវជាដើម។  ហើយទីបំផុតពួកគេត្រូវទទួលបរាជ័យក្នុងរឿងក្តី ឬត្រូវទទួលទោសធ្ងន់ធ្ងរថែមទៀតផង។ 

៣. មេធាវីយល់ដឹងពីការតតាំងក្តីតាមរយៈការវិភាគនិងប្រើប្រាស់ភស្តុតាងស្របតាមនីតិវិធី

មេធាវីដែលមានបទពិសោធន៍ អាចមានសមត្ថភាពគ្រប់គ្រាន់ក្នុងការធ្វើវិភាគផ្នែកច្បាប់ និងមានការយល់ដឹងអំពីរបៀបប្រើប្រាស់ភស្តុតាងឱ្យមានប្រសិទ្ធិភាពក្នុងការការពារក្តី។ ប្រភេទនៃភស្តុតាងដែលអ្នកមិនអាចយល់ស៊ីជម្រៅ អាចធ្វើឱ្យអ្នកខាតបង់ប្រយោជន៍ ឬអាចឱ្យអ្នកមានទោសព្រោះតែមិនបានប្រើប្រាស់ឱ្យបានសមស្របតាមកាលៈទេសៈក្នុងដំណើរការនីតិវិធី។ តាមបច្ចេកទេសការពាររក្តី យើងមិនអាចចេះតែប្រើប្រាស់ភស្តុតាងបានគ្រប់ពេលវេលានោះទេ។ ការបង្ហាញភស្តុតាងត្រូវតែស្របទៅនឹងគោលដៅ និងផលប្រយោជន៍របស់យើងដែលយើងចង់បាន។ បើមិនដូច្នោះទេ វាអាចបំផ្លាញរឿងក្តីរបស់យើងទាំងមូល ឬអាចត្រូវក្លាយជាភស្តុតាងដាក់បន្ទុកលើខ្លួនយើងវិញក៏ថាបាន។ ហេតុនេះ ជាការចាំបាច់ណាស់ដែលអ្នកត្រូវការមេធាវីដែលមានជំនាញសម្រាប់ធ្វើការវិភាគច្បាប់ ផលប៉ះពាល់ និងផលចំណេញក្នុងការប្រើច្បាប់ ឬ នីតិវិធីណាមួយសម្រាប់ជាមូលដ្ឋាននៃការកំណត់គោលដៅ និងយុទ្ធសាស្រ្តឱ្យមានប្រយោជន៍សម្រាប់រឿងក្តីរបស់ខ្លួន។

៤. មេធាវីមានសិទ្ធិថតចម្លងសំណុំរឿងសម្រាប់យកមកសិក្សាស្រាវជ្រាវបន្ថែម

ក្រមនីតិវិធីព្រហ្មទណ្ឌ មិនបានអនុញ្ញាតឱ្យជនសង្ស័យ ជនត្រូវចោទ ឬជនជាប់ចោទ មានសិទ្ធិថតចម្លងឯកសារសំណុំរឿងនោះទេ។ នេះជាឧបសគ្គដ៏ធំសម្រាប់អ្នកជ្រើសរើសការការពារក្តីដោយខ្លួនឯង ពីព្រោះអ្នកនឹងមិនអាចទទួលបានឯកសារពាក់ព័ន្ធពីក្នុងសំណុំរឿងសម្រាប់យកមកសិក្សាដើម្បីបម្រើការការពារក្តីរបស់ខ្លួននោះទេ។

ការខកខានពីការទទួលបានសំណុំរឿងសម្រាប់សិក្សា ជាការប្រយុទ្ធដោយគ្មានសមភាព។ ប៉ុន្តែ បច្ចុប្បន្នយើងមានច្បាប់បែបនេះ ទោះបីមិនល្អក៏យើងត្រូវអនុវត្តតាមរហូតដល់មានវិសោធនកម្មដែរ។ ម្យ៉ាងទៀត អ្នកកាន់តែមានការលំបាកថែមទៀត ក្នុងករណីដែលអ្នកត្រូវបានឃុំខ្លួននោះ។ ពីព្រោះអ្នកមិនអាចរៀបចំឯកសារដាក់ជូនទៅតុលាការដោយងាយស្រួលនោះទេ ហើយអ្នកក៏មិនអាចចេញទៅស៊ើបអង្កេតខាងក្រៅបានដែរ។ លើសពីនេះ អ្នកក៏មិនអាចទទួលបានការការពារនៃការរក្សាការសម្ងាត់នូវទំនាក់ទំនងជាមួយអ្នកណាម្នាក់ក្រៅពីមេធាវីនោះទេ។ ហេតុនេះ ក្នុងខណៈដែលអ្នកជ្រើសរើសការការពារក្តីដោយខ្លួនឯង គឺច្បាស់ណាស់អ្នកកំពុងចាញ់ប្រៀបភាគីតំណាងអយ្យការនិងដើមបណ្តឹងរដ្ឋប្បវេណីប្រសិនបើមាន។ 

៥. មេធាវីជួយពិនិត្យលើសាក្សី និងអ្នកជំនាញដែលមានប្រយោជន៍សម្រាប់ការពារក្តីរបស់អ្នក

ការប្រើប្រាស់សាក្សីនិងអ្នកជំនាញ ក៏ត្រូវការគោលដៅនិងផែនការច្បាស់លាស់ដែរ ចៀសវាងការជះនូវផលអាក្រក់មកលើរឿងក្តីរបស់ខ្លួន។ ទាំងសាក្សីហេតុការណ៍ និងសាក្សីជំនាញ អាចប្រែប្រួលជានិច្ច។ ព្រោះថាមនុស្សម្នាក់ៗ អាចមានការភ្លេចភ្លាំង ឬក៏មានស្ថានភាពណាមួយមកជំរុញឱ្យមានការផ្លាស់ប្តូរទស្សនៈ ឬគោលជំហររបស់ខ្លួន។ ការតាំងសំណួរលើសាក្សី និង អ្នកជំនាញក៏ត្រូវការជំនាញនិងចំណេះដឹងផងដែរ។ សាក្សីដែលនិយាយក្រឡិចក្រឡុច សាក្សីដែលនិយាយកុហក សាក្សីដែលចូលចិត្តនិយាយច្រំដែល និងសាក្សីដែលនិយាយច្រើនជាដើម។ល។ តើអ្នកអាចគ្រប់គ្រងដូចម្តេច បើអ្នកមិនបានសិក្សាពីបច្ចេកទេសក្នុងការតាំងសំណួរ និង ការគ្រប់គ្រងសាក្សីទាំងនេះផង?  នេះជាការលំបាកដែលទាមទាឱ្យមានការសិក្សាច្បាស់លាស់ សម្រាប់ទប់ទល់ និងកែតម្រូវមកស្ថានភាពដើមវិញ។ មេធាវីដែលមានជំនាញច្បាស់លាស់ អាចគ្រប់គ្រងស្ថានការណ៍ទាំងនេះបាន។ សម្រាប់ករណីរដ្ឋប្បវេណីវិញ បើអ្នកតទល់ជាមួយភាគីម្ខាងទៀតមានមេធាវីតំណាងនោះជាការចាញ់ប្រៀបគេហើយ។ ពីព្រោះភាគីនោះមានសមត្ថភាពយល់ដឹងអំពីច្បាប់ និងនីតិវិធីបានល្អជាងអ្នក។ 

៦. មេធាវីជួយស្វែងរកចំណុចខ្លាំងរបស់អ្នកនិងជួយនិយាយជំនួសអ្នក

ជាការលំបាកសម្រាប់អ្នកគ្មានជំនាញជាមេធាវី គេមិនអាចនិយាយឱ្យគ្រប់ជ្រុងជ្រោយនៃបញ្ហដែលចាំបាច់និងជាប់ពាក់ព័ន្ធនឹងរឿងក្តីរបស់ខ្លួននោះទេ។ ហេតុនេះហើយ ច្បាប់អនុញ្ញាតឱ្យមានមេធាវីជាអ្នកនិយាយជំនួស។ មេធាវី អាចសិក្សាលើចំណុចខ្លាំងរបស់អ្នកសម្រាប់ទប់ទល់ការចោទប្រកាន់របស់ភាគីម្ខាងទៀតឬតំណាងអយ្យការទៅតាមភាពចាំបាច់។ កាលណាអ្នកគ្មានជំនាញ អ្នកអាចមិនយល់ថា ចំណុចណាចាំបាច់ខ្លាំង ចំណុចណាចាំបាច់តិចតួច ឬមិនចាំបាច់ជាដើម។ ជាលទ្ធផល អ្នកអាចលើកពីចំណុចមិនចាំបាច់ ឬចាំបាច់តិចតួច ហើយមិនបានលើកពីចំណុចខ្លាំងរបស់ខ្លួន។ ម្យ៉ាងទៀត អ្នកអាចមិនយល់អំពីលំដាប់លំដោយនៃចំណុចនីមួយៗ ដែលត្រូវបង្ហាញប្រកបដោយប្រសិទ្ធិភាព និង ស៊ី       សង្វាក់គ្នា។ មេធាវី អាចប្រើប្រាស់ពេលវេលានិងធនធានទៅតាមតម្រូវការជាក់ស្តែង និងធ្វើការរៀបចំក្តីនិងបង្ហាញក្តីទៅតាមយុទ្ធសាស្រ្តច្បាស់លាស់ឱ្យមានប្រសិទ្ធិភាព។

៧. មេធាវីជួយស្វែងរកចំណុចខ្សោយរបស់ភាគីម្ខាងទៀតនិងលើកចំណុចទាំងនោះនៅចំពោះមុខតុលាការប្រកបដោយប្រសិទ្ធភាព

នៅពេលដែលអ្នកការពារដោយមេធាវី មេធាវីរបស់អ្នក នឹងជួយស្វែងរកចំណុចខ្សោយរបស់ភាគីម្ខាងទៀត តាមរយៈចំណេះដឹងនិងបទពិសោធន៍ការងារដែលមានដោយលើកនូវរាល់ចំណុចខ្សោយរបស់ភាគីម្ខាងទៀតដើម្បីវាយប្រហារភស្តុតាង សាក្សី ឬឯកសារនានា របស់ភាគីម្ខាងទៀតឱ្យអស់តម្លៃលែងយកជាការបាន ក្នុងគោលបំណងការពារផលប្រយោជន៍របស់អ្នក។ ការមិនយល់ដឹងនូវនីតិវិធី និង គ្មានបទពិសោធន៍ក្នុងតុលាការ អ្នកមិនអាចកំណត់ឬស្វែងរកចំណុចខ្សោយរបស់ភាគីម្ខាងទៀត ហើយក៏មិនអាចប្រើប្រាស់ឱកាសទាំងនេះឱ្យមានប្រសិទ្ធិភាពសម្រាប់ដោះបន្ទុក ឱ្យរួចផុតពីការទទួលខុសត្រូវបានដែរ។ មេធាវីដែលមានជំនាញច្បាស់លាស់ អាចប្រើប្រាស់នូវសមត្ថភាពផ្នែកច្បាប់ និងការប៉ិនប្រសប់របស់ខ្លួន ដើម្បីកសាងជំនឿ និងការទុកចិត្តលើការបកស្រាយទាំងច្បាប់និងការឆ្លើយតបនានាទៅនឹងអង្គហេតុដែលមានប្រយោជន៍សម្រាប់បម្រើទ្រឹស្តីការពារក្នុងរឿងក្តីរបស់ខ្លួន។  ការខកខានឬការប្រើប្រាស់ឱកាសខុសដែលកន្លងផុតទៅហើយ ភាគច្រើនអ្នកមិនអាចត្រឡប់ក្រោយដើម្បីកែតម្រូវនោះទេ។ នោះប្រៀបបាននឹងគ្រោះអាសន្នដល់អាយុជីវិត ហើយអ្នកមានអាវុធក្នុងដៃដែលអាចការពារអ្នកបាន ប៉ុន្តែ អ្នកមិនចេះប្រើដើម្បីការពារខ្លួនហើយត្រូវរងគ្រោះ ព្រោះតែចេះមិនដល់ហើយធ្វើជាចេះ។  ដើម្បីកុំឱ្យមានការថ្លោះធ្លោយ អ្នកគួររកមេធាវីដែលមានសមត្ថភាពដើម្បីបំពេញការងារទាំងនេះជំនួសអ្នក។

៨. មេធាវីអាចជួយអ្នកក្នុងការបង្ការកុំឱ្យមានកំហុសនានា

នៅពេលដែលអ្នកមករកពឹងមេធាវី គឺដោយសារអ្នកមានបញ្ហាផ្លូវច្បាប់ហើយដែលអ្នករំពឹងថា បញ្ហារបស់អ្នកនឹងត្រូវបញ្ចប់។ មែនហើយវាជារឿងគួរឱ្យត្រេកអរបើអ្នកទទួលបានដំណោះស្រាយសម្រាប់បញ្ចប់បញ្ហផ្លូវច្បាប់ដែលអ្នកមាន។ ប៉ុន្តែ បើសំណាងអាក្រក់វិញនោះ វានឹងបង្ករនូវបញ្ហាផ្លូវច្បាប់ផ្សេងទៀតដែលបង្កើតជាភាពស្មុគស្មាញបន្ថែមពីមួយទៅមួយផងដែរ។ ព្រោះថា បើអ្នកគ្មានជំនាញផ្នែកច្បាប់ហើយអ្នកព្យាយាមដោះស្រាយដោយខ្លួនឯង អ្នកអាចមានការភាន់ច្រលំទាំងផ្នែកច្បាប់ និង លក្ខខណ្ឌតម្រូវនានានៃច្បាប់ ដូចជាការមិនបានបំពេញតាមទម្រង់ ឬកាលបរិច្ឆេទដែលកំណត់ដោយច្បាប់ជាដើម។ ម្យ៉ាងទៀតអ្នកត្រូវដឹងថា ក្នុងរឿងក្តីព្រហ្មទណ្ឌ អ្នកចោទប្រកាន់ដាក់បន្ទុកលើអ្នក គឺជាក្រុមមនុស្សដែលមានជំនាញនិងទទួលការហ្វឹកហ្វឺនច្បាស់លាស់ ព្រមទាំងមានគ្នាច្រើនចាំជួយលើការងាររបស់ពួកគេផងដែរ។ ចំណែកអ្នក ត្រូវបោះបង់សិទ្ធិទទួលបានមេធាវីការពារក្តីទៀត នោះជាការខាតបង់នូវជំនួយផ្នែកច្បាប់ដែលត្រូវបានធានាដោយរដ្ឋធម្មនុញ្ញ។ ហេតុនេះ តុល្យភាពរវាងភាគីចោទប្រកាន់ និង ភាគីជនជាប់ចោទកាន់តែមានគម្លាតហើយ។ ដើម្បីបញ្ចៀសបញ្ហាដែលអាចកើតមាននេះ អ្នកគួរជ្រើសរើសយកមេធាវីសម្រាប់ការពារក្តីរបស់អ្នក។ សមដូចពាក្យចាស់ពោលថា ការពារប្រសើរជាងព្យាបាល។ ហេតុនេះ វាជារឿងប្រសើរបំផុតដែលអ្នកអាចបង្ការនូវបញ្ហានានាមិនឱ្យកើតមានឡើងបានចំពោះអ្នក។ 

៩. មេធាវីជួយបង្កើនទំនាក់ទំនងជាមួយអ្នកច្បាប់ដទៃទៀត 

ចំណុចនេះក៏ចាំបាច់ណាស់ដែរ។ ទស្សនៈប្រជាជនអាមេរិកាំងនិយាយតៗគ្នាថា មេធាវីដែលល្អពូកែច្បាប់ ប៉ុន្តែមេធាវីដែលអស្ចារ្យស្គាល់ចៅក្រម (A good lawyer knows the law but a great lawyer knows the judge) ។ ស្តាប់ទៅដូចជានិយាយកំប្លែងលេង ប៉ុន្តែវាជាការពិត ហើយកាន់តែត្រឹមត្រូវក្នុងសង្គមខ្មែរថែមទៀតផង។ មេធាវីដែលមានទំនាក់ទំនងល្អជាមួយសមត្ថកិច្ចនគរបាលយុត្តិធម៌ ក្រឡាបញ្ជី តំណាងអយ្យការ និង ចៅក្រម រមែងមានលក្ខណៈងាយស្រួលក្នុងការដំណើរការនីតិវិធីក៏ដូចជាការរៀបចំដាក់សំណើរផ្សេងៗ។ ក្រៅពីនេះ មេធាវីនៅមានទំនាក់ទំនងល្អជាមួយអាជ្ញាធរ និង អ្នកជំនាញផ្សេងទៀត ដែលអាចជួយសម្រួលការចាំបាច់ផ្នែកស៊ើបអង្កេត ដែលពាក់ព័ន្ធក្នុងសំណុំរឿងជាដើម។  ទោះយ៉ាងណាក្តី មេធាវីត្រូវស្ថិតនៅក្រោមបន្ទាត់ក្រមសីលធម៌វិជ្ជាជីវៈរបស់ខ្លួន ដែលមិនមែនជាការអួតអាងលើជ័យជំនះ ដោយគ្មានសមត្ថភាពផ្នែកច្បាប់ពិតប្រាកដនោះទេ ហើយក៏មិនត្រូវប្រើទំនាក់ទំនងល្អរបស់ខ្លួនជាមួយចៅក្រម ដើម្បីដាក់សម្ពាធលើភាគីម្ខាងទៀតដោយខុសច្បាប់នោះដែរ។ 

១០. មេធាវីអាចជួយឱ្យអ្នកទទួលនូវការកាត់ទោស ឬការខាតបង់ទាបបំផុត

ឧទាហរណ៍ថា អ្នកបានប្រព្រឹត្តិនូវកំហុសព្រហ្មទណ្ឌណាមួយហើយនោះ អ្នកអាចនឹងត្រូវរកឃើញថាមានទោស។ ហើយក្នុងករណីដែលអ្នកត្រូវរកឃើញថាមានទោសនោះមេធាវីអាចជួយអ្នកឱ្យទទួលរងនូវទណ្ឌកម្មទាបបំផុតដោយស្របច្បាប់ ទៅតាមជំនាញនិងសមត្ថភាពរបស់មេធាវីរូបនោះ។ ដូចបានរៀបរាប់ខាងដើមរួចហើយ ទោះបីអំពើដែលអ្នកបានប្រព្រឹត្តិជាបទល្មើសដែលហាមឃាត់ និង ត្រូវផ្តន្ទាទោសដោយច្បាប់ក្តី ក៏មានកត្តាជាច្រើនដែលមេធាវីជំនាញ អាចលើកនូវចំណុចល្អៗរបស់អ្នកដើម្បីទទួលបាននូវការសណ្តោសប្រណីពីតុលាការ។ ពីព្រោះថាមេធាវី អាចជជែកអំពីហេតុផលនៃចំណុចល្អៗទាំងនោះ ដើម្បីបង្ហាញជូនតុលាការ ប្រសើរជាងអ្នកដែលមិនបានយល់នូវចំណុចសំខាន់ៗដែលអាចធ្វើឱ្យតុលាការពិចារណាដល់ចំណុចដែលនាំឱ្យមានក្តីមេត្តា។  ក្នុងករណីរដ្ឋប្បវេណី ក៏ស្រដៀងគ្នាដែរ។ មេធាវី អាចជួយសម្របសម្រួលអ្នកឱ្យបង់សំណងនិងការខូចខាតតិច ហើយអាចជួយកំណត់ការទាមទារនូវចំនួនសមរម្យក្នុងករណីអ្នកជាដើមចោទ។ 

ការរៀបរាប់ខាងលើសម្រាប់ជាស្មារតី ជួយអ្នកក្នុងការសម្រេចចិត្តជ្រើសរើសយកសេវាមេធាវីណាមួយសម្រាប់ប្រឹក្សាយោបល់ផ្នែកច្បាប់ ក៏ដូចជាសម្រាប់តំណាងឬការពារក្តីរបស់ខ្លួន។ ទោះបីច្បាប់កម្ពុជា មិនតម្រូវឱ្យមានមេធាវីតំណាង ឬការពារក្តីគ្រប់ករណីទាំងអស់ នៅតាមតុលាការគ្រប់ជាន់ថ្នាក់ក៏ដោយ ប៉ុន្តែ វាជាការល្អសម្រាប់អ្នក បើអ្នកអាចរកមេធាវីតំណាងឬការពារក្តីឱ្យអ្នកបាន។ មេធាវី ជាអ្នកមានវិជ្ជាជីវៈច្បាប់ដែលមានសមត្ថភាពផ្តល់ប្រឹក្សាយោបល់អំពីច្បាប់ តំណាងឬការពារក្តីឱ្យអ្នកកាលបើអ្នកមានបញ្ហាប្រឈមផ្នែកច្បាប់។ មេធាវីបំពេញការងារដោយឯករាជ្យ សេរី និង តាមសម្បជញ្ញៈរបស់ខ្លួនទៅតាមច្បាប់ និង ក្រមសីលធម៌វិជ្ជាជីវៈមេធាវីដើម្បីការពារសិទ្ធិនិងផលប្រយោជន៍របស់អ្នក ៕

ដោយ៖ មេធាវី គង់ សំអុន