សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តម៉ាក lexus RX400h មួយគ្រឿងបានរងការខូចខាតផ្នែកខាងមុខយ៉ាងដំណំ ខណៈបុរសម្នាក់បេីកបរក្នុងល្បឿនលឿនខ្វះការប្រុងប្រយ័ត្នបានរេចង្កូតទៅបុកខឿនធ្វើឱ្យរថយន្តកល់ជាប់ កាលពីវេលាម៉ោង ១០និង ៥០នាទីយប់ថ្ងៃទី១៨ ខែកក្កដាឆ្នាំ២០២៣ នៅចំណុចភ្លើងស្តុបឫស្សីផ្អែម តាមបណ្ដោយផ្លូវ ៥០ម៉ែត្រ ក្នុងសង្កាត់ព្រៃស ខណ្ឌដង្កោ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តម៉ាក Lexus RX400h ពណ៌ស្ករមួយគ្រឿង ពាក់ផ្លាកលេខភ្នំពេញ 2BE-6712 បើកបរដោយបុរសម្នាក់ធ្វើដំណើរតាមបណ្ដោយផ្លូវ៥០ម៉ែត្រទិសដៅពីលិចទៅកើតក្នុងល្បឿនលឿន ។ លុះមកដល់ចំណុចកើតហេតុស្រាប់តែរេចង្កូតទៅខាងឆ្វេងដៃជ្រុលទៅបុកឡើងលើខឿនកល់ជាប់ទៅមុខលែងរួច បណ្ដាលឱ្យរថយន្តបាក់កាឡេកង់មុខ និងកាងខូចខាតយ៉ាងដំណំ តែសំណាងល្អមិនបង្កឱ្យមានគ្រោះថ្នាក់ដល់មនុស្ស។
ក្រោយកេីតហេតុ សមត្ថកិច្ចមូលដ្ឋានបានចុះមកដល់រួចពិនិត្យជាក់ស្ដែងឃើញប៉ះពាល់ទៅលើទ្រព្យសម្បត្តិរដ្ឋនិងមិនប៉ះពាល់ដល់អ្នកដទៃ ទេីបសមត្ថកិច្ចឱ្យម្ចាស់រថយន្តបង្កស្ទូចយករថយន្តចេញពីកន្លែងកេីតហេតុដោយខ្លួនឯង ៕
ដោយ ៖ ភារ៉ា ដង្កោ
