ការបាញ់ប្រហារនៅប្រទេសនូវែលហ្សេឡង់មុនការប្រកួតបាល់ទាត់ពិភពលោកនារីឆ្នាំ ២០២៣

ចែករំលែក៖

ប៉ូលិសនូវែលហ្សេឡង់បាននិយាយនៅថ្ងៃទី 20 ខែកក្កដាថា មនុស្សពីរនាក់និងខ្មាន់កាំភ្លើងម្នាក់បានស្លាប់និង6នាក់ផ្សេងទៀតបានរងរបួសនៅក្នុងការបាញ់ប្រហារនៅឯការដ្ឋានសំណង់មួយក្នុងទីក្រុង Auckland ដែលជាទីក្រុងធំបំផុតរបស់ប្រទេសនូវែលហ្សេឡង់។
ការបាញ់ប្រហារនេះបានកើតឡើងប៉ុន្មានម៉ោងមុនពេលការប្រកួតបើកឆាកនៃការប្រកួតបាល់ទាត់នារីពិភពលោកឆ្នាំ 2023 នៅ Eden Park ក្នុងទីក្រុង Auckland នាល្ងាចថ្ងៃទី 20 ខែកក្កដា។
ប៉ូលិសនូវែលហ្សេឡង់បាននិយាយនៅលើ Twitter ថា ការបាញ់ប្រហារនេះគឺជា “ឧប្បត្តិហេតុដាច់ដោយឡែក” និង “មិនមែនជាការគំរាមកំហែងដល់សន្តិសុខជាតិនោះទេ” ដោយបន្ថែមថា ខ្មាន់កាំភ្លើងប្រុសក៏បានស្លាប់ផងដែរ។
នាយករដ្ឋមន្ត្រីនូវែលហ្សេឡង់ លោក Chris Hipkins បាននិយាយថា ការប្រកួតបាល់ទាត់នឹងប្រព្រឹត្តទៅតាមការគ្រោងទុក។ លោកបានបន្ថែមថា ការបាញ់ប្រហារនេះ ហាក់ដូចជាសកម្មភាពរបស់បុគ្គលម្នាក់ ហើយប៉ូលិសមិនបានស្វែងរកនរណាម្នាក់ផ្សេងទៀតដែលពាក់ព័ន្ធនឹងការបាញ់ប្រហារនោះឡើយ។
លោក Hipkins បាននិយាយនៅក្នុងសន្និសីទសារព័ត៌មានតាមទូរទស្សន៍ថា “គ្មានហេតុផលនយោបាយឬមនោគមវិជ្ជាណាមួយត្រូវបានគេកំណត់អត្តសញ្ញាណពាក់ព័ន្ធនឹងការបាញ់ប្រហារនោះឡើយហើយដូច្នេះវាមិនមានហានិភ័យសន្តិសុខជាតិទេ” ។

អភិបាលក្រុង Auckland លោក Wayne Brown បានសរសេរនៅលើ Twitter ថា “នេះគឺជាស្ថានភាពដ៏គួរឱ្យភ័យខ្លាចមួយសម្រាប់ Aucklanders ក្នុងដំណើររបស់ពួកគេទៅធ្វើការនៅព្រឹកថ្ងៃព្រហស្បតិ៍ សូមស្នាក់នៅផ្ទះ និងជៀសវាងកណ្តាលទីក្រុង” ៕ ដោយ៖ ធីរីណា