សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរយៈសារសំឡេង របស់សម្តេចតេជោ ហ៊ុន សែន នារសៀលថ្ងៃទី២៦ ខែកក្កដា ឆ្នាំ២០២៣នេះ បានប្រកាសថា សម្តេចមិនបន្តតំណែងជានាយករដ្ឋមន្ត្រីក្នុងអាណត្តិថ្មីនោះឡើយ។ ការដែលសម្តេចប្រញាប់ប្រញាល់លាឈប់ពីតំណែងជា នាយករដ្ឋមន្ត្រីនេះ គឺជាការរៀបចំទុកជាមុនសម្រាប់ការរក្សាស្ថេរភាពរយៈពេលវែង ដែលជាមូលដ្ឋានគ្រឹះសម្រាប់ការអភិវឌ្ឍ។
សម្តេចតេជោ ហ៊ុន សែន បានថ្លែងថា ការចូលកាន់តំណែងរបស់ លោក ហ៊ុន ម៉ាណែត ជានាយករដ្ឋមន្ត្រី មិនបានរំលងនីតិវិធីទាំងឡាយនោះឡើយ។ សម្តេចតេជោ ហ៊ុន សែន បានថ្លែងថា ក្រោយពេលសម្តេចលាឈប់ពីរាជរដ្ឋាភិបាល សម្តេចនឹងត្រូវព្រះមហាក្សត្រត្រាស់បង្គាប់តែងតាំងជាប្រធានឧត្តមក្រុមប្រឹក្សាព្រះមហាក្សត្រផងដែរ។
សម្តេចតេជោ ថ្លែងថា នយោបាយជ្រុលនិយមចាំបាច់ត្រូវលុបបំបាត់ឱ្យអស់ពីកម្ពុជា។ សម្ដេចតេជោ បន្តថា ក្រុមណាក៏ដោយ ដែលភ្ជាប់ខ្លួនជាមួយក្រុមជ្រុលនិយម ចាំបាច់ត្រូវតែកម្ចាត់ចោល មិនឱ្យមាននៅក្នុងប្រទេសកម្ពុជាទៀតទេ។
សម្តេចតេជោ ថ្លែងថា ការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ គឺជាការបោះឆ្នោតបំបែកឯតទគ្គកម្ម ដែលមានអ្នកចូលរួមមកបោះឆ្នោតច្រើនជាងគេ ដែលចំនួន៨៤,៥៨ភាគរយ។
សម្តេចតេជោ បានថ្លែងអំណរគុណដល់បងប្អូនជនរួមជាតិទាំអស់ ដែលបានជឿទុកចិត្តចំពោះគណបក្សប្រជាជនកម្ពុជា និងបន្តបោះឆ្នោតគាំទ្រដល់គណបក្សប្រជាជនកម្ពុជា យ៉ាងច្រើនលើសលុប ដើម្បីដឹកនាំរាជរដ្ឋាភិបាល។
សម្តេចតេជោ ថ្លែងថា សម្ដេចនឹងមិនបន្តកាន់មុខតំណែងជានាយករដ្ឋមន្រ្ដីទៀតទេ។ សម្តេចតេជោ បញ្ជាក់ថា គឺជាការចាំបាច់ខ្លាំងណាស់ក្នុងការរៀបចំ គណៈរដ្ឋមន្រ្ដីថ្មីមួយ ដែលមានថ្នាក់ដឹកនាំវ័យក្មេងជំនាន់ក្រោយ ដឹកនាំរាជរដ្ឋាភិបាល។
សម្តេចតេជោ ថ្លែងថា មូលហេតុដែលសម្ដេចប្រញាប់លាលែងពីតំណែងនាយករដ្ឋមន្រ្ដី គឺជាការរៀបចំទុកជាមុន ដើម្បីការរក្សាស្ថិរភាពរយៈពេលវែងរបស់ប្រទេសកម្ពុជា ហើយសន្ដិភាព ស្ថិរភាពរយៈពេលវែងនេះហើយ ដែលជាមូលដ្ឋានគ្រឹះក្នុងការអភិវឌ្ឍប្រទេសកម្ពុជា។
សម្តេចតេជោ ថ្លែងថា សម្ដេច ,សម្ដេច ម៉ែន សំអន និងសម្ដេច ក្រឡាហោម ស ខេង ជាដើម ក៏នឹងចាកចេញពីតួនាទីដែរ។ ប៉ុន្ដែសម្ដេចតេជោ បានបញ្ជាក់ថា សម្ដេចនឹងនៅតែបន្តតំណែងជាប្រធានគណបក្សប្រជាជនកម្ពុជា។
សម្តេចតេជោ ថ្លែងថា សម្ដេចនឹងមិនជ្រៀតជ្រែកទៅលើកិច្ចការងាររបស់នាយករដ្ឋមន្រ្ដីនោះទេ។
សម្តេចតេជោ បានបញ្ជាក់ថា ប្រមាណ ៣សប្ដាហ៍ទៀតប៉ុណ្ណោះឯកឧត្ដមបណ្ឌិត ហ៊ុន ម៉ាណែត និងក្លាយជានាយករដ្ឋមន្រ្ដីថ្មី។
សម្តេចតេជោ ថ្លែងថា ព្រឹកមិញនេះ ក្នុងពេលចូលគាល់ព្រះមហាក្សត្រទ្រង់ទទួលយល់ព្រមតាមការស្នើសុំរបស់គណបក្សដែលទទួលបានសំឡេងឆ្នោតច្រើនជាងគេ ក្នុងការចេញព្រះរាជក្រឹត្យតែងតាំងឯកឧត្ដមបណ្ឌិត ហ៊ុន ម៉ាណែត ជានាយករដ្ឋមន្រ្ដី។
សម្តេចតេជោ ថ្លែងថា សម្ដេចនឹងកាន់តួនាទីជាប្រធានព្រឹទ្ធសភា ហើយនឹងជួយដល់ព្រះមហាក្សត្រ ក្នុងពេលដែលព្រះអង្គអវត្តមានក្នុងឱកាសណាមួយ ដែលចំណុចនេះ គឺជាការរៀបចំឱ្យការដំណើរការទៅរបស់ប្រទេសកម្ពុជាជាប្រក្រតីភាព។
សម្តេចតេជោ ថ្លែងថា សម្ដេចអគ្គមហាពញាចក្រី ហេង សំរិន ,សម្ដេចកិត្តិសង្គហបណ្ឌិត ម៉ែន សំអន និងសម្ដេចពិជ័យសេនា ទៀ បាញ់ ក៏នឹងត្រូវចុះចេញពីតំណែង និងត្រូវតែងតាំងជាឧត្តមក្រុមប្រឹក្សាព្រះមហាក្សត្រផងដែរ។
សម្តេចតេជោ ប្រកាសអំពាវនាវដល់បងប្អូនជនរួមជាតិទាំងអស់ សូមកុំមានការបារម្ភចំពោះការចាកចេញពីតំណែងជានាយករដ្ឋមន្រ្ដីរបស់សម្ដេច។
សម្តេចតេជោ ថ្លែងថា សម្ដេចនឹងចាកចេញពីតំណែងនាយករដ្ឋមន្រ្ដី ចាប់ពីថ្ងៃទី ២២ ខែសីហា ឆ្នាំ ២០២៣ បន្ទាប់ពីសម្ដេចបានកាន់តំណែងជានាយករដ្ឋមន្រ្ដី អស់រយៈពេល ២.២១៤សប្ដាហ៍ បើគិតជាខែ៤៦៣ខែ បើគិតជាឆ្នាំ៣៨ឆ្នាំ៧ ខែ និងគិតជាថ្ងៃ ១៦.២៩៧ថ្ងៃ ដែលនេះ ជាពេលវេលាធ្វើជានាយករដ្ឋមន្រ្ដីវែងជាងគេនៅលើពិភពលោក។
សម្តេចតេជោ ថ្លែងថា បើសិនជាលោកបណ្ឌិត ហ៊ុន ម៉ាណែត មិនមែនជាកូនរបស់សម្ដេច ក៏សម្ដេចគាំទ្រឱ្យធ្វើជានាយករដ្ឋមន្រ្ដីដែរដោយសារ ហ៊ុន ម៉ាណែត មានលក្ខខណ្ឌគ្រប់គ្រាន់។
សម្តេចតេជោ ថ្លែងថា មានកត្តាធំៗចំនួន៤ ដែលត្រូវឱ្យឯកឧត្តម ហ៊ុន ម៉ាណែត ក្លាយទៅជានាយករដ្ឋមន្រ្តី គឺ១-មានការឯកភាពផ្ទៃក្នុងពីគណបក្ស ,២-ជាប់តំណាងរាស្ត្រ ,៣-ត្រូវតែងតាំងពីព្រះមហាក្សត្រ និងទី៤ ត្រូវឆ្លងកាត់ពីសភាជាតិ។
សម្តេចតេជោ ថ្លែងថា នយោបាយជ្រុលនិយមចាំបាច់ត្រូវលុបបំបាត់ឱ្យអស់ពីកម្ពុជា។ សម្ដេចតេជោ បន្តថា ក្រុមណាក៏ដោយ ដែលភ្ជាប់ខ្លួនជាមួយក្រុមជ្រុលនិយម ចាំបាច់ត្រូវតែកម្ចាត់ចោល មិនឱ្យមាននៅក្នុងប្រទេសកម្ពុជាទៀតទេ៕
ដោយ៖ ស តារា
